আত্মনিৰ্ভৰশীলতাই এখন দেশৰ বাবে আগুৱাই যোৱাৰ একমাত্ৰ পথ। সেয়েহে ৰাষ্ট্ৰীয় স্বয়ংসেৱক সংঘৰ মুৰব্বী মোহন ভাগৱতে দেশৰ জনতাক উদ্দেশ্যি বিদেশী সামগ্ৰী বৰ্জন আৰু থলুৱা সামগ্ৰী ক্ৰয়ৰ আহ্বান জনাইছে। কিছুদিন পূৰ্বে প্ৰধানমন্ত্ৰী নৰেন্দ্ৰ মোদীয়েও একেধৰণৰ বাৰ্তা দিছিল। এইবাৰ সংঘৰ মুৰব্বীৰ বক্তব্যটো একেধৰণৰ সুৰ শুনা গ’ল।
বৃহস্পতিবাৰে নাগপুৰস্থিত আৰ এছ এছৰ মুখ্য কাৰ্যালয়ৰ পৰা বিজয়া দশমী উপলক্ষে ভাষণ প্ৰদান কৰি তেওঁ কয়, “বৰ্তমানৰ পৃথিৱীৰ অন্য দেশৰ ওপৰত ভাৰত নিৰ্ভৰশীল হ’ব নালাগে। ভাৰতে থলুৱা সামগ্ৰীৰ ওপৰত গুৰুত্ব দিব লাগে। ভাৰত যেতিয়া আত্মনিৰ্ভৰশীল হ’ব তেতিয়াহে ভাৰতে নিজৰ ইচ্ছা অনুসৰি কাম কৰিব পাৰিব। থলুৱা সামগ্ৰী ব্যৱহাৰ কৰি আত্মনিৰ্ভৰশীল হোৱাৰ বিকল্প নাই।”
মোহনে ভাগৱতে আৰু কয়, “পৃথিৱীখন আন্তঃনিৰ্ভৰশীলতাৰ ওপৰত নিৰ্ভৰশীল। কোনো দেশেই ইখনে সিখনক বাদ দি জীয়াই থাকিব নোৱাৰে। কিন্তু এই আন্তঃনিৰ্ভৰশীলতাক বাধ্যবাধকতা হিচাপে গণ্য কৰা উচিত নহয়। আমি আত্মনিৰ্ভৰশীলতাৰ দিশত আগবাঢ়িব লাগিব। ইয়াৰ কোনো বিকল্প নাই।”
প্ৰসংগক্ৰমে আমেৰিকাৰ সৈতে ভাৰতৰ শুল্ক যুদ্ধই চৰম ৰূপ লৈছে। আমেৰিকাৰ ৰাষ্ট্ৰপতি ড’নাল্ড ট্ৰাম্পৰ ৫০ শতাংশ শুল্কৰ বোজা ভাৰতৰ ওপৰত কাৰ্যকৰী কৰা হৈছে। আমেৰিকালৈ ভাৰতীয় সামগ্ৰীৰ ৰপ্তানি কাৰ্যতঃ বন্ধ হৈ গৈছে। কেৱল সেয়াই নহয়, চাকৰি বিচাৰি আমেৰিকালৈ যোৱা ভাৰতীয়ৰ বাবে H1B ভিছাৰ খৰচ বহুগুণে বৃদ্ধি পাইছে। যিটো গৰিষ্ঠসংখ্যক মধ্যবিত্ত শ্ৰেণীৰ সামৰ্থ্যৰ বাহিৰত। ইয়াৰ দ্বাৰা ভাৰতত প্ৰত্যক্ষ প্ৰভাৱ পৰিব বুলি আশংকা কৰা হৈছে। আনহাতে আমেৰিকাৰ সৈতে বাণিজ্য চুক্তি লাহে লাহে আগবাঢ়িবলৈ আৰম্ভ কৰিছে। যদি সম্পূৰ্ণ হয়, তেন্তে ইয়াৰ বাবে আমেৰিকাৰ সামগ্ৰীয়ে কম শুল্কত ভাৰতীয় বজাৰত প্ৰৱেশ কৰিব পাৰিব। ভাৰতীয় ব্যৱসায়ীসকলৰ ওপৰত হেঁচা পৰিব। এনে পৰিস্থিতিত প্ৰধানমন্ত্ৰীয়ে ঘৰুৱা সামগ্ৰী ক্ৰয় কৰিবলৈ উল্লেখ কৰিছিল।
