শুকুৰবাৰে (৩ অক্টোবৰ) পুৱতি নিশা প্ৰায় ৩ বজাত গুৱাহাটী মহানগৰীৰৰ ব্যস্ত ফাঁচী বজাৰৰ এছ এছ ৰোডৰ চাইবাৰ মাৰ্টত সংঘটিত হোৱা এক ভয়াৱহ অগ্নিকাণ্ডত এজনৰ মৃত্যু ঘটাৰ লগতে আন তিনিজন গুৰুতৰভাৱে আহত হয়।
বিষয়াসকলে জনোৱা মতে, বাণিজ্যিক চৌহদৰ ভিতৰত আবদ্ধ হৈ থকা চাৰিজন লোকক উদ্ধাৰকাৰীয়ে উলিয়াই আনি গুৱাহাটী চিকিৎসা মহাবিদ্যালয় হাস্পাতাললৈ প্ৰেৰণ কৰে।
এই ঘটনাত ৩২ বছৰীয়া ছলমান কুৰেশ্বীয়ে বেয়াকৈ অগ্নিদগ্ধ হোৱাৰ লগতে প্ৰচণ্ড ধোঁৱাৰ ফলত শ্বাসৰুদ্ধ হৈ মৃত্যুবৰণ কৰে।
আনহাতে, ২৪ বছৰীয়া তাছিব, ২২ বছৰীয়া ছাহাৰিম আৰু ২২ বছৰীয়া আৰিফ নামৰ আন তিনিজন লোক চিকিৎসাধীন হৈ আছে। চিকিৎসকে ইয়াৰে দুজনৰ অৱস্থাক “সংকটজনক” বুলি জানিবলৈ দিয়ে।
ঘটনাস্থলীত বহুকেইখন অগ্নিনিৰ্বাপক বাহিনীৰ গাড়ীয়ে জুই নুমুৱাবলৈ চেষ্টা কৰে। শ্বৰ্ট চাৰ্কিটৰ ফলত সংঘটিত হোৱা বুলি ধাৰণা কৰা এই অগ্নিকাণ্ড প্ৰায় অনিয়ন্ত্ৰিত হৈ পৰে।
ধোঁৱাৰ কুণ্ডলীয়ে উদ্ধাৰৰ প্ৰচেষ্টা আৰু অগ্নিনিৰ্বাপক বাহিনীৰ অভিযান দুয়োটাতে যথেষ্ট বাধাৰ সৃষ্টি কৰিছে। এতিয়ালৈ অগ্নিনিৰ্বাপক বাহিনীৰ অভিযান চলি আছে আৰু সা-সম্পত্তিৰ ক্ষয় ক্ষতিৰ সৱিশেষ জানিব পৰা হোৱা নাই।
