ৰাষ্ট্ৰীয় স্বয়ংসেৱক সংঘৰ শতবাৰ্ষিকী উপলক্ষে প্ৰধানমন্ত্ৰী নৰেন্দ্ৰ মোদীয়ে ডাক টিকট আৰু মুদ্ৰা মুকলি কৰাৰ এদিন পাছতে বৃহস্পতিবাৰে কেৰেলাৰ মুখ্যমন্ত্ৰী পিনাৰায়ী বিজয়নে ইজৰাইলৰ জিয়নিষ্টসকলৰ সৈতে আৰএছএছক তুলনা কৰি “যমজ ভাতৃ” বুলি অভিহিত কৰে।
বুধবাৰে কান্নুৰত অনুষ্ঠিত ৰাজহুৱা সভাত বিজয়নে কয় যে ইজৰাইলৰ জিয়নিষ্ট আৰু ভাৰতৰ আৰএছএছ যমজ ভাতৃ।
ইয়াৰ পূৰ্বে এক্সত বিজয়নে এটা পোষ্টত কৈছিল যে আৰ এছ এছৰ শতবাৰ্ষিকী উদযাপন কৰাটো “আমাৰ দেশৰ সংবিধানৰ প্ৰকাশ্য অপমান”।
বিজয়নে লিখিছে, ‘এই শতবাৰ্ষিকী উদযাপনে স্বাধীনতা সংগ্ৰামৰ পৰা নিজকে আঁতৰাই ৰখা আৰু ঔপনিৱেশিকতাবাদত শিপাই থকা বিভাজনকাৰী মতাদৰ্শক প্ৰসাৰিত কৰা এটা সংগঠনক বৈধতা প্ৰদান কৰে। এই কাৰ্য আমাৰ দেশৰ প্ৰকৃত স্বাধীনতা সংগ্ৰামীসকলে কল্পনা কৰা ধৰ্মনিৰপেক্ষ, ঐক্যবদ্ধ ভাৰতৰ সপোনৰ ওপৰত হোৱা প্ৰত্যক্ষ আক্ৰমণ।’
ভাৰতীয় কমিউনিষ্ট পাৰ্টি (মাৰ্ক্সবাদী)ৰ সাধাৰণ সম্পাদক ডি ৰাজায়ো সামাজিক আৰু সাংস্কৃতিক ইতিহাসত আৰএছএছৰ অৱদানক লৈ প্ৰশ্ন উত্থাপন কৰি এই কাৰ্যক প্ৰতিক্ৰিয়াশীল, বিভাজনকাৰী আৰু সাম্প্ৰদায়িক বুলি অভিহিত কৰে।
ৰাজায়ে কয়, ‘সামাজিক আৰু সাংস্কৃতিক ইতিহাসত আৰএছএছে কি অৱদান আগবঢ়াইছে? ই এক প্ৰতিক্ৰিয়াশীল, বিভাজনকাৰী, সাম্প্ৰদায়িক, আৰু মেৰুকৰণকাৰী সংগঠন। এইটো সংগঠনে দেশৰ ঐক্য আৰু অখণ্ডতাৰ প্ৰতি ভাবুকি কঢ়িয়াই আনিছে। স্বাধীনতা আন্দোলনত আৰএছএছৰ ভূমিকা স্পষ্ট কৰিবলৈ প্ৰধানমন্ত্ৰীক প্ৰত্যাহ্বান জনাইছো। তেওঁ ৰাইজক এই বিষয়ে বুজাই দিব লাগে।’
একেদৰে আম আদমী পাৰ্টিৰ ৰাজ্যসভাৰ সাংসদ সঞ্জয় সিঙেও চৰকাৰক সমালোচনা কৰি কয় যে চৰকাৰে ৫২ বছৰ ধৰি জাতীয় পতাকা উত্তোলন নকৰা আৰু ঔপনিৱেশিক শাসনৰ সময়ত ব্ৰিটিছক সমৰ্থন কৰা সংগঠন এটাৰ শতবাৰ্ষিকী উদযাপন কৰিছে।
ভাৰতীয় কমিউনিষ্ট পাৰ্টি (মাৰ্ক্সবাদী-লেনিনবাদী)ৰ সাধাৰণ সম্পাদক দিপাংকৰ ভট্টাচাৰ্যই এই অনুষ্ঠানটোক ‘দুৰ্ভাগ্যজনক’ বুলি অভিহিত কৰি কয় যে, “এইটো এটা সংগঠন যিটোক ভাৰতৰ তদানীন্তন গৃহমন্ত্ৰী চৰ্দাৰ পেটেলে মহাত্মা গান্ধীৰ হত্যাকাণ্ডত ভূমিকা লোৱাৰ বাবে নিষিদ্ধ কৰিছিল। ইয়াৰ শতবাৰ্ষিকী উদযাপনৰ লগত গান্ধী জয়ন্তীৰ লগত মিল থকাটো এক দুৰ্ভাগ্যজনক কাকতলীয় সংযোগ।’
তেওঁ আৰু কয়, ‘তাতোকৈ বেয়া কথাটো হ’ল বৰ্তমানৰ চৰকাৰে ইমান উৎসাহেৰে আৰএছএছৰ শতবাৰ্ষিকী উদযাপন কৰিছে যে বিজেপি চৰকাৰ আৰু আৰএছএছৰ মাজৰ ৰেখাডাল ম্লান হৈ পৰিছে।’
