দেশৰ পৰা দূৰ হোৱা নাই ধৰ্মীয় বিদ্বেষ। মুছলমান হোৱা বাবে ৰোগীক চিকিৎসা কৰিবলৈ অস্বীকাৰ এগৰাকী চিকিৎসকৰ। এই চাঞ্চল্যকৰ ঘটনা সংঘটিত হৈছে উত্তৰ প্ৰদেশৰ এখন চৰকাৰী চিকিৎসালয়ত।
জানিব পৰা মতে এগৰাকী গৰ্ভৱতী মহিলাক উত্তৰ প্ৰদেশৰ এখন চৰকাৰী চিকিৎসালয়ৰ এগৰাকী চিকিৎসকে তেওঁ মুছলমান ধৰ্মৰ হোৱা বাবে চিকিৎসা কৰিবলৈ অস্বীকাৰ কৰাৰ অভিযোগ উত্থাপন হৈছে। ভাৰতীয় জনতা পাৰ্টি চৰকাৰৰ বিভাজনকাৰী নীতিক দোষাৰোপ কৰি বিৰোধী শিবিৰে তীব্ৰ ক্ষোভ প্ৰকাশ কৰিছে।
প্ৰকাশিত তথ্য অনুসৰি বীৰবাৰী গাঁৱৰ ২৭ বছৰীয়া ছামা পাৰবীন নামৰ যুৱতীগৰাকীক ৩০ ছেপ্টেম্বৰৰ নিশা প্ৰসৱৰ বাবে ততাতৈয়াকৈ চিকিৎসালয়লৈ যোৱা হৈছিল। চিকিৎসালয়ৰ ভিতৰত ৰেকৰ্ড কৰা এটা ভিডিঅ’ত পাৰবীনে দাবী কৰে যে কৰ্তব্যৰত মহিলা চিকিৎসকগৰাকীয়ে তেওঁক ঘণ্টাৰ পিছত ঘণ্টা অকলে এৰি থৈ গৈছিল আৰু চিকিৎসা কৰিবলৈ অস্বীকাৰ কৰি কৈছিল, “আপুনি এগৰাকী মুছলমান, আমি আপোনাৰ চিকিৎসা নকৰো।”
তেওঁৰ স্বামী মহম্মদ পাৰভেজে সাংবাদমাধ্যমৰ আগত কয় যে চিকিৎসকগৰাকীয়েও কৈছিল, “তাইক অপাৰেচন থিয়েটাৰলৈ নানিব… তাই এগৰাকী মুছলমান… মই তাইৰ চিকিৎসা নকৰো।” পিছত পৰিয়ালটোৱে পাৰবীনক ব্যক্তিগত ক্লিনিকলৈ লৈ যায় আৰু তাতেই নিৰাপদে এটি কন্যা সন্তান প্ৰসৱ কৰে।
জানিব পৰা মতে ইতিমধ্যে ঘটনা সন্দৰ্ভত চিকিৎসালয়খনে তদন্ত আৰম্ভ কৰিছে। মুখ্য অধীক্ষক ডাঃ মহেন্দ্ৰ গুপ্তাই চিকিৎসক আৰু কৰ্মচাৰীৰ পৰা ব্যাখ্যা বিচাৰিছে আৰু দাবী সত্য প্ৰমাণিত হ’লে ব্যৱস্থা গ্ৰহণৰ প্ৰতিশ্ৰুতি প্ৰদান কৰিছে। তেওঁ লগতে কয় যে আন চাৰি-পাঁচগৰাকী মুছলমান মহিলাৰো চিকিৎসা কৰা হৈছিল আৰু সেইদিনা চিকিৎসালয়ত সন্তান জন্ম দিয়া হৈছিল।
ইফালে বিৰোধী দলৰ নেতাসকলে এই ঘটনাক গৰিহণা দি উত্তৰ প্ৰদেশত বিজেপি শাসনৰ অধীনত বৃদ্ধি পোৱা সাম্প্ৰদায়িক পক্ষপাতিত্ব আখ্যা দিয়ে। কংগ্ৰেছৰ সাংসদ ইমৰাণ মাছুদে ইয়াক “কোনো সভ্য সমাজত গ্ৰহণযোগ্য নহয়” আৰু বিজেপিৰ “অবিৰত ঘৃণাৰ ৰাজনীতি”ৰ ফচল বুলি অভিহিত কৰে। আম আদমী পাৰ্টিৰ সাংসদ সঞ্জয় সিঙে কয় যে “ঈশ্বৰৰ অন্য ৰূপ” বুলি গণ্য কৰা চিকিৎসকে ধৰ্মৰ ভিত্তিত বৈষম্য কৰিব নালাগে। তেওঁ লগতে কয়, “এয়া মোদী আৰু যোগীৰ সপোনৰ নতুন ভাৰত।”
সমাজবাদী পাৰ্টিৰ সাংসদ আফজল আনছাৰীয়ে সম্পূৰ্ণ তদন্তৰ দাবী জনাই কয় যে চিকিৎসকে ৰোগীৰ মাজত বৈষম্য কৰিব নালাগে, তেওঁ আৰু কয় এই ঘটনাৰ পৰা প্ৰতিফলিত হৈছে যে ক্ষমতাত থকাসকলে এটা বিশেষ সম্প্ৰদায়ক লক্ষ্য কৰি লৈছে। অৱশ্যে এই পৰ্যন্ত বিজেপিৰ ফালৰ পৰা বা ৰাজ্য চৰকাৰৰ ফালৰ পৰা কোনো ধৰণৰ প্ৰতিক্ৰিয়া প্ৰকাশ কৰা নাই।
