চচলত দেওবাৰে ভূমি উচ্ছেদ আৰু নিগমলৈ অবৈধ ভূমি হস্তান্তৰৰ বিৰুদ্ধে এক বৃহৎ প্ৰতিবাদ সমাৱেশ অনুষ্ঠিত হয়। ভূমি অধিকাৰ যৌথ সংগ্ৰাম সমিতিৰ উদ্যোগত আয়োজিত ‘অধিকাৰ সমৱেশ’ত সমগ্ৰ অসমৰ পৰা সহস্ৰাধিক লোকে অংশগ্ৰহণ কৰি ন্যায়ৰ দাবী জনায়।
প্ৰতিবাদকাৰীসকলে প্ৰয়াত কণ্ঠশিল্পী জুবিন গাৰ্গক শ্ৰদ্ধাঞ্জলি জনায় আৰু ঐক্য আৰু প্ৰতিবাদৰ প্ৰতীক ৰূপে জুবিন গাৰ্গৰ গীত পৰিৱেশন কৰি প্ৰতিবাদ সাব্যস্ত কৰে।
আয়োজক সমিতিৰ সুব্ৰত তালুকদাৰে ৰাজ্য চৰকাৰক খিলঞ্জীয়া লোকৰ অধিকাৰক আওকাণ কৰাৰ অভিযোগ উত্থাপন কৰি কয়, “খিলঞ্জীয়া লোকে আটাইতকৈ বেছি ক্ষতিগ্ৰস্ত হৈছে। চৰকাৰে হাজাৰ বিঘা ভূমি জনজাতীয় ভূমি কৰ্পৰেট দৈত্যক গতাই দিছে। আমি এই অবৈধ উচ্ছেদসমূহ শীঘ্ৰে বন্ধ কৰাৰ লগতে মূল বাসিন্দাসকলক ভূমি পট্টা প্ৰদানৰ দাবী জনাইছো।”
আন এগৰাকী প্ৰতিবাদকাৰীয়ে মহিলাসকলে সন্মুখীন হোৱা সমস্যাসমূহৰ ওপৰত আলোকপাত কৰি কয়, “মাইক্ৰ’ফাইনেন্স আঁচনিৰ জৰিয়তে আমাৰ মহিলাসকলক ঋণৰ ফান্দত ঠেলি দিয়া হৈছে, আৰু এতিয়া আমাৰ মাটি কাঢ়ি লোৱা হৈছে। আমি একত্ৰিত হ’ব লাগিব – হিমন্ত বিশ্ব শৰ্মা, সাৱধান হওক।”
বিশিষ্ট বুদ্ধিজীৱী ড° হীৰেন গোহাঁই, ৰাজ্যসভাৰ সাংসদ অজিত ভূঞা, কংগ্ৰেছৰ বিধায়িকা নন্দিতা দাস, এজেপিৰ সভাপতি লুৰিনজ্যোতি গগৈ, প্ৰাক্তন সাংসদ আব্দুল খালেকেকে ধৰি কেইবাগৰাকীও এই প্ৰতিবাদত অংশগ্ৰহণ কৰি ভূমি অধিকাৰ আন্দোলনলৈ সমৰ্থন প্ৰকাশ কৰে।
প্ৰতিবাদকাৰীসকলে চৰকাৰক এখন স্মাৰকপত্ৰ দাখিল কৰি সকলো উচ্ছেদ শীঘ্ৰে বন্ধ কৰা, পৰম্পৰাগত ভূমি মালিকীস্বত্ব স্বীকৃতি দিয়া আৰু খিলঞ্জীয়া অধিকাৰ সুৰক্ষিত কৰাৰ দাবী জনায়।
ৰাজ্য চৰকাৰৰ ভূমি বিতৰণ নীতি আৰু কৰ্পৰেট সম্প্ৰসাৰণৰ বিৰুদ্ধে এইদৰে ৰাজ্যৰ সহস্ৰাধিক লোকৰ ক্ষোভ প্ৰকাশ কৰে। আৰু তেওঁলোকৰ দাবীক আওকাণ কৰিলে আন্দোলনৰ অধিক তীব্ৰতৰ কৰি তুলা হ’ব বুলিও সকীয়াই দিয়ে।
