এই শৃংখলাত ভাৰতে জয়ী হ’ব বুলি জনাই গৈছিল। কিন্তু হয়তো কোনো ক্ৰিকেট বিশেষজ্ঞই ভৱিষ্যদ্বাণী কৰিব পৰা নাছিল যে শুভমন গিলে বাহিনীয়ে শৃংখলাটো জয় কৰিবলৈ এনেদৰে মূৰৰ ঘাম মাটিত পেলাব লাগিব।
জন কেম্পবেল-শ্বাই হোপৰ ৱেষ্ট ইণ্ডিজে ভাৰতে জাপি দিয়া ফ’ল’ অন চম্ভালি চতুৰ্থ ইনিংছত ভাৰতক বেটিং কৰিবলৈ বাধ্য কৰাব বুলি এনে ডাঙৰ ভৱিষ্যদ্বাণীও কোনেও কৰা নাছিল। অৱশেষত ভাৰতে মেচখনৰ লগতে শৃংখলাত জয়লাভ কৰে যদিও কেৰিবিয়ানৰ এই মৰণপন যুঁজখনে ক্ৰিকেট অনুৰাগীৰ মনত দাগ বহুৱাই থৈ গ’ল।
ঘjj মাটিত প্ৰথমবাৰৰ বাবে জাতীয় দলৰ নেতৃত্ব দি আছে শুভমনে। তেওঁৰ অধিনায়কত্বত আহমেদাবাদত অনুষ্ঠিত হোৱা শৃংখলাৰ প্ৰথমখন টেষ্টত কেৰিবিয়ান বাহিনীয়েপ্ৰায় আত্মসমৰ্পন কৰে। মাত্ৰ আঢ়ৈ দিনৰ ভিতৰতে ভাৰতীয় দলে জয়লাভ কৰে। ক্ৰিকেট জগতে ধৰি লৈছিল যে দ্বিতীয়খন টেষ্টো একেদৰেই শেষ হ’ব। সেইবাবেই টেষ্ট মেচতকৈ ৰোহিত শৰ্মাৰ অনুশীলন চাবলৈ মুম্বাইত অধিক ভিৰ হৈছিল।
কিন্তু ৱেষ্ট ইণ্ডিজৰ ক্ৰিকেটাৰসকলে অন্য ধৰণে চিন্তা কৰিছিল। টছৰ সময়ত কেৰিবিয়ানৰ অধিনায়কগৰাকীয়ে কৈছিল যে তেওঁৰ লক্ষ্য ৯০ অভাৰ বেটিং কৰা। খেলখনৰ শেষত স্ক’ৰকাৰ্ডত লিখা আছিল যে ৱেষ্ট ইণ্ডিজে দুয়োটা ইনিংছতে প্ৰায় ২০০ অভাৰ বেটিং কৰিছিল। সেইটো নৈতিক জয়তকৈ কম নে?
দিল্লীৰ অৰুণ জেটলী ষ্টেডিয়ামত প্ৰথমে বেটিং কৰি শুভমন গিল বাহিনীয়ে ৫১৮ ৰান সংগ্ৰহ কৰে। ইয়াৰ উত্তৰত কেৰিবিয়ান ইনিংছ ২৪৫ ৰানতে অন্ত পৰে। শুভমন লগে লগে ৱেষ্ট ইণ্ডিজক ফলো অন কৰায়। কিন্তু ২৭০ ৰানত পিছ পৰি থকাৰ পাছতো ৱেষ্ট ইণ্ডিজে দ্রুত প্রত্যাৱর্তন ঘটায়৷ প্ৰথমে জন কেম্পবেল, তাৰ পিছত শ্বাই হোপ- দুটা শতকেৰে দলক ইনিংছ পৰাজয়ৰ পৰা ৰক্ষা কৰে। ৰষ্টন চেজৰ দলটোৱে ভাৰতক জয়ী হ’বলৈ ১২১ ৰানৰ লক্ষ্য নিৰ্ধাৰণ কৰে।
এই সামান্য ৰাণৰ লক্ষ্য অনুসৰণ কৰিও ভাৰতে তিনিটা উইকেট হেৰুৱায়। শেষত কে এল ৰাহুলে নিজৰ ঠাণ্ডা মেজাজ ধৰি ৰাখি অৰ্ধশতক অৰ্জন কৰি ভাৰতক জয়ৰ দিশে আগুৱাই লৈ যায়। এই শৃংখলাত তেওঁ দ্বিতীয় সৰ্বাধিক ৰান সংগ্ৰহকাৰী। যশস্বী জয়ছোৱালে সৰ্বাধিক ২১৯ ৰান সংগ্ৰহ কৰিছে।
সৰ্বাধিক সফল বলাৰ কুলদীপ যাদৱ। তেওঁ ১২ টা উইকেট দখল কৰে। অহা মাহত ঘৰৰ মাটিত টেষ্ট চেম্পিয়ন দক্ষিণ আফ্ৰিকাৰ বিৰুদ্ধে শৃংখলা খেলিব ভাৰতে। ভাৰতৰ বিৰুদ্ধে ৱেষ্ট ইণ্ডিজে যিদৰে প্ৰত্যাহ্বান জনাইছে, ইয়াৰ ফলত প্ৰটিয়াছৰ বিৰুদ্ধে নমাৰ আগতে গৌতম গম্ভীৰ চিন্তা কিছু বাঢ়িব পাৰে।
সংক্ষিপ্ত স্কোৰঃ
ভাৰতৰ প্ৰথম ইনিংছ: ৫১৮/৫ ঘোষণা (যাশস্বী ১৭৫, শুভমন ১২৯*, ৱাৰিকন ৩/৯৮)
ৱেষ্ট ইণ্ডিজৰ প্ৰথম ইনিংছ: ২৪৮ (আথানাছে ৪১, কুলদীপ ৫/৮২, জাডেজা ৩/৪৬)
ৱেষ্ট ইণ্ডিজৰ দ্বিতীয় ইনিংছ: ৩৯০ (কেম্পবেল ১১৫, হোপ ১০৩, বুমৰাহ ৩/৪৪, কুলদীপ ৩/১০৪)
ভাৰত দ্বিতীয় ইনিংছ: ১২৪/৩ (ৰাহুল ৫৮*, সুদৰ্শন ৩৯, চেজ ২/৩৬)
ভাৰতে ৭ উইকেটত জয়লাভ কৰে
