সাধাৰণতে মাটি-বাৰী, হত্যা, নিৰ্যাতন, বিবাহ বিচ্ছেদ আদি নিস্তেজ বিষয়ৰ স্থান আদালত। য’ত ব্যক্তিগত আৱেগৰ স্থান নাই, তাত আইনৰ শাসনেই শেষ কথা। তাতেই হেনো এগৰাকী মহিলাক চুমা খাই ভাইৰেল হ’ল এজন অধিবক্তা!
এই ঘটনা দিল্লী উচ্চ ন্যায়ালয়ৰ। ছচিয়েল মিডিয়াত ভাইৰেল হৈ পৰিছে এটা বিতৰ্কিত ভিডিঅ’। জানিব পৰা মতে এই ভিডিঅ’টো উচ্চ ন্যায়ালয়ত গোচৰৰ ভাৰ্চুৱেল শুনানিৰ আগৰ মুহূৰ্তৰ।
মঙলবাৰৰ দিনটোত এই ঘটনা সংঘটিত হোৱা বুলি জানিব পৰা গৈছে। আদালতৰ শুনানি তেতিয়াও আৰম্ভ হোৱা নাছিল। সকলো পক্ষই বিচাৰকৰ বাবে অপেক্ষা কৰি আছিল। সেই সময়ত আপত্তিজনক ঘটনাটো সংঘটিত হৈছিল।
ভিডিঅ’ ফুটেজত দেখা গৈছে যে অধিবক্তাজনে আদালতৰ সাজ পিন্ধি নিজৰ কোঠাত বহি আছে। তেওঁৰ মুখৰ এটা অংশহে দেখা যায়। সন্মুখত শাৰী পিন্ধা এগৰাকী মহিলা থিয় হৈ আছে। হঠাৎ উকীলে মহিলাগৰাকীৰ হাতখন ধৰি টানিবলৈ আৰম্ভ কৰে। মহিলাগৰাকীয়ে অস্বস্তি অনুভৱ কৰি বাধা দিবলৈ চেষ্টা কৰে।
অৱশ্যে অধিবক্তাই মহিলাগৰাকীক জোৰকৈ চুম্বন কৰে। ইয়াৰ পিছত মহিলাগৰাকী খৰধৰকৈ পিছুৱাই যায়। নৰ্থ ইষ্টনাওৱে এই ভিডিঅ’টোৰ সত্যতা পৰীক্ষা কৰা নাই।
এই ভিডিঅ’টো ছ’চিয়েল মিডিয়াত ভাইৰেল হৈ পৰিছে। ৰাজহুৱা স্থানত অধিবক্তাগৰাকীৰ আপত্তিজনক আচৰণক লৈ প্ৰশ্ন উত্থাপন কৰিছে নেটিজেনসকলে।
এজন ব্যক্তিয়ে লিখিছে, “লজ্জাজনক কাণ্ড।” এজন ব্যক্তিৰ মতে বহুতে এনেকুৱা কাম কৰে, কিন্তু এইটোহে পোহৰলৈ আহিছে। আন এজনে কয়, “যদি আপুনি এইটোৱেই কৰিব বিচাৰিছিল, তেন্তে আপুনি অধিবক্তা হোৱাৰ কি প্ৰয়োজন আছিল?” অৱশ্যে ভিডিঅ’টোত দেখা অধিবক্তাজন আৰু তেওঁৰ লগত থকা মহিলাগৰাকীৰ পৰিচয় জানিব পৰা হোৱা নাই।
