দিল্লীৰ ডাঃ বিষ্ণু দাস মাৰ্গত অৱস্থিত ব্ৰহ্মপুত্ৰ এপাৰ্টমেণ্টত আজি এক ভয়ংকৰ অগ্নিকাণ্ড সংঘটিত হোৱাৰ ফলত ৰাজ্যসভাৰ অধিকাংশ সাংসদৰ বাসগৃহ ভস্মীভূত হৈছে। সংসদ ভৱনৰ পৰা মাত্ৰ ২০০ মিটাৰ দূৰত্বত অৱস্থিত এই এলেকাৰ অট্টালিকাটোত সংঘটিত ঘটনাই স্থানীয় বাসিন্দা আৰু নিৰাপত্তাৰক্ষীৰ মাজত তীব্ৰ আতংকৰ সৃষ্টি কৰিছে।
প্ৰাৰম্ভিক তথ্য অনুসৰি, অগ্নিকাণ্ডৰ কাৰণ এতিয়াও জানিব পোৱা নাই, আৰু এই অঞ্চলটোত অগ্নিনিৰ্বাপক বাহিনীৰ বিলম্ব হোৱাৰ বাবে এতিয়া বহু প্ৰশ্ন অৱতাৰণা কৰিছে।
জানিব পৰা মতে, অগ্নিকাণ্ড আজি দিনৰ ভাগতে সংঘটিত হৈছিল। ঘটনাস্থলীত উপস্থিত সাক্ষীসকলৰ মতে, অগ্নি সমগ্ৰ অট্টালিকাটোত আৱৰি ধৰে। অগ্নিকাণ্ড সংঘটিত হোৱাৰ ৩০ মিনিটৰ অধিক সময় পাৰ হৈ যোৱাৰ পিছত্হে অগ্নিনিৰ্বাপক বাহিনীৰ বাহনসমূহ ঘটনাস্থলীত উপস্থিত হৈছিল। জুই নিয়ন্ত্ৰণৰ বাবে ছটা অগ্নিনিৰ্বাপক ইঞ্জিন মোতায়েন কৰাৰ লগতে বাহিনীয়ে কাম কৰি আছে বুলি জানিব পৰা গৈছে। এতিয়ালৈকে কোনো লোকৰ হতাহতিৰ খবৰ পোৱা নাই, কিন্তু বহুলাখ টকা মূল্যৰ সামগ্ৰী নষ্ট হৈছে বুলি খবৰ পোৱা গৈছে।
টিএমচিৰ ৰাজ্যসভাৰ সাংসদ সাকেত গোখলেই এক্সত প্ৰকাশ কৰা অনুসৰি দিল্লীৰ বিডি মাৰ্গৰ ব্ৰহ্মপুত্ৰ এপাৰ্টমেণ্টত এক বৃহৎ অগ্নিকাণ্ড সংঘটিত হৈছে। আটাইকেইজন বাসিন্দা ৰাজ্যসভাৰ সাংসদ। সংসদ ভৱনৰ পৰা ২ৰ০০ মিটাৰ দূৰত্বত অট্টালিকাখন। ৩০ মিনিটত অগ্নিনিৰ্বাপক বাহিনীৰ লোক আহি পোৱা নাই। জুই এতিয়াও জ্বলি আছে। বাৰে বাৰে ফোন কৰাৰ পিছতো অগ্নিনিৰ্বাপক বাহিনী আহি পোৱা নাই। দিল্লী চৰকাৰ, অলপ চৰম কৰক।”
উল্লেখ্য যে দিল্লীৰ এই অঞ্চলক অতি স্পৰ্শকাতৰ আৰু গুৰুত্বপূৰ্ণ চৰকাৰী এলেকা বুলি গণ্য কৰা হয়, য’ত ৰাজ্যসভাৰ সাংসদসকলৰ বাসগৃহসমূহ আছে। সেয়েহে অগ্নিকাণ্ডৰ সময়ত অগ্নিনিৰ্বাপক বাহিনীৰ বিলম্ব হোৱাৰ দৰে কাৰ্য্যই নিৰাপত্তা ব্যৱস্থাৰ ওপৰত গুৰুতৰ প্ৰশ্ন উত্থাপন কৰিছে। প্ৰাথমিকভাৱে কোনো বৃহৎ ক্ষয়-ক্ষতিৰ খবৰ নাই যদিও আৰক্ষী আৰু অগ্নিনিৰ্বাপক বাহিনীয়ে তদন্ত আৰম্ভ কৰিছে। অগ্নি নিয়ন্ত্ৰণৰ পিছত ক্ষয়-ক্ষতিৰ পূৰ্ণাঙ্গ মূল্যায়ন কৰা হ’ব বুলি জানিবলৈ দিছে। অৱশ্যে দিল্লী চৰকাৰ আৰু সংশ্লিষ্ট বিভাগসমূহৰ পৰা এতিয়ালৈকে কোনো অফিচিয়েল বিবৃতি প্ৰকাশ পোৱা নাই।
