ভাৰতৰ উচ্চতম ন্যায়ালয়ে অপৰাধমূলক বিচাৰত অভিযোগনামা (Charge Sheet) দাখিল কৰাৰ বাবে সমগ্ৰ দেশৰ নিম্ন আদালতসমূহৰ বাবে কঠোৰ সময়সীমা নিৰ্ধাৰণ কৰাৰ নিয়ম প্ৰণয়নৰ পৰিকল্পনা কৰিছে। বিচাৰ প্ৰক্ৰিয়াত দীৰ্ঘদিনীয়া বিলম্ব ৰোধ কৰি ন্যায়ৰ গতি ক্ষিপ্ৰ কৰাৰ লক্ষ্যৰে এই সিদ্ধান্ত গ্ৰহণ কৰা বুলি সদৰী কৰিছে বিচাৰপীঠে।
ন্যায়াধীশ অৰবিন্দ কুমাৰ আৰু ন্যায়াধীশ এন.ভি. অঞ্জাৰিয়াৰ বিচাৰপীঠে অমন কুমাৰ নামৰ এজন ব্যক্তিৰ জামিন আবেদন শুনানিৰ সময়ত এই বিষয়টো পৰ্যবেক্ষণ কৰে। উল্লেখ্য যে ডকাইতি আৰু হত্যাৰ চেষ্টাৰ অভিযোগত ২০২৪ চনৰ আগষ্ট মাহৰ পৰা কাৰাগাৰত বন্দী হৈ আছে অমন কুমাৰ। ২০২৪ চনৰ ছেপ্টেম্বৰ মাহত আৰক্ষীয়ে অভিযোগনামা দাখিল কৰিছিল যদিও এবছৰতকৈও অধিক সময়ৰ পাছতো নিম্ন আদালতে অভিযোগ সন্দৰ্ভত এতিয়াও ৰায় প্ৰদান কৰা নাই। কুমাৰৰ আবেদনত তেওঁ দাবী কৰিছে যে, তেওঁৰ বিৰুদ্ধে মিছা অভিযোগ উত্থাপন কৰা হৈছে। তেওঁ আৰু কয় যে, বিচাৰ অবিহনে তেওঁক দীৰ্ঘদিন ধৰি জেলত ৰখা হৈছে। ২০২৪ চনৰ অক্টোবৰ মাহত নিম্ন আদালতে তেওঁৰ জামিন আবেদন নাকচ কৰিছিল। তাৰ পিছত ২০২৫ চনৰ মাৰ্চ মাহত পাটনা উচ্চ ন্যায়ালয়েও তেওঁৰ আবেদন নাকচ কৰে।
শুনানিৰ সময়ত বিচাৰপীঠে এটা গুৰুত্বপূৰ্ণ সমস্যাৰ ওপৰত দৃষ্টি নিক্ষেপ কৰি কয় যে, “আমি বাৰে বাৰে এই দৃশ্য দেখিছোঁ আৰক্ষীয়ে চূড়ান্ত প্ৰতিবেদন দাখিল কৰাৰ মাহ বা বছৰৰ পিছতো অভিযোগ নামা প্ৰস্তুত কৰা নহয়। যিটো বিচাৰত পলম হোৱাৰ প্ৰধান কাৰণ বুলি উল্লেখ কৰে। অভিযোগ নামা অবিহনে একো আগবাঢ়ি নাযায়।”
গতিকে “এই ব্যৱস্থা অব্যাহত ৰাখিব নোৱাৰে” বুলি আদালতে স্পষ্ট কৰি দিছে। আৰক্ষীয়ে চূড়ান্ত প্ৰতিবেদন দাখিল কৰাৰ লগে লগে অভিযোগনামা প্ৰস্তুত কৰিব লাগে। বিচাৰপীঠে আৰু কয় যে, ভাৰতৰ বেছিভাগ আদালতত এই সমস্যা সুলভ। “এই বিষয়ত সমগ্ৰ দেশৰ বাবে কিছুমান নিৰ্দেশৰ প্ৰয়োজন,” বুলিও উল্লেখ কৰে।
এই বিষয়ত সহায় কৰিবলৈ বিচাৰপীঠে অধিবক্তা সিদ্ধাৰ্থ লুথ্ৰাক এমিকাছ কুৰিয়া (আদালতৰ বন্ধু) হিচাপে নিযুক্তি দিছে। আৰু গোচৰৰ নথিসমূহ এটৰ্নী জেনেৰেললৈ পঠোৱাৰ নিৰ্দেশ দিয়া হৈছে। আদালতে সমগ্ৰ দেশতে অভিযোগ ফ্ৰেমিং আৰু বিচাৰৰ সময়সীমা নিৰ্ধাৰণৰ ক্ষেত্ৰত তেওঁলোকৰ মতামত শুনিব বিচাৰে।
এই পদক্ষেপৰ ফলত ন্যায় ব্যৱস্থাৰ বৃহৎ পৰিৱৰ্তন সাধন হ’ব পাৰে। কুমাৰৰ দৰে দীৰ্ঘ সময় ধৰি বিচাৰাধীন বন্দীসকলৰ ন্যায় ক্ষিপ্ৰতৰে প্ৰদান হ’ব পাৰে, যিয়ে ভাৰতীয় বিচাৰ ব্যৱস্থাক অধিক দক্ষ কৰি তুলিব বুলি আশা কৰা হৈছে।
