নাবালিকাক ধৰ্ষণৰ অভিযোগত অভিযুক্ত কৰ্ণাটকৰ মহীছুৰুৰ লিংগায়ত ধৰ্মগুৰু শিৱমূৰ্তি মুৰুগা শৰণাৰুক দোষমুক্ত ঘোষণা কৰা হৈছে। তেওঁৰ বিৰুদ্ধে দাখিল কৰা গোচৰ দুটাৰ ভিতৰত এটা গোচৰত আজি নিম্ন আদালতে তেওঁক দোষমুক্ত কৰে। ২০২২ চনৰ ১ ছেপ্টেম্বৰত ১৪ মাহ কাৰাগাৰত থকাৰ পিছত জামিনত মুকলি কৰি দিয়া হয় যদিও পুনৰ গ্ৰেপ্তাৰ হয়।
শিৱমূৰ্তি নামৰ এগৰাকী ধৰ্মীয় গুৰুৰ বিৰুদ্ধে প্ৰায় তিনি বছৰ ধৰি ১৫ আৰু ১৬ বছৰীয়া দুগৰাকী ছোৱালীক ধৰ্ষণ কৰাৰ অভিযোগ উত্থাপন হৈছিল। অৱশেষত ২০২২ চনৰ আগষ্ট মাহত এগৰাকী নাবালিকা মঠৰ পৰা পলায়ন কৰি মহীচুৰুৰ এটা স্বেচ্ছাসেৱী সংগঠনৰ কাষ চাপিছিল। ইয়াৰ পিছত লিংগায়ত ধৰ্মীয় গুৰুজনৰ বিৰুদ্ধে মহীচুৰু থানাত এফআইআৰ দাখিল কৰা হয়। প্ৰথমতে যেতিয়া তেওঁক আটক কৰি মুকলি কৰি দিয়া হৈছিল, তেতিয়া মহীচুৰু চহৰত প্ৰতিবাদৰ সূত্ৰপাত হৈছিল। পিছত তেওঁক গ্ৰেপ্তাৰ কৰা হয়। কিন্তু ২০২৩ চনৰ নৱেম্বৰ মাহত উচ্চ ন্যায়ালয়ে তেওঁক জামিন মঞ্জুৰ কৰে। কিন্তু ২০ নৱেম্বৰত পুনৰ দ্বিতীয়টো গোচৰৰ বাবে গ্ৰেপ্তাৰ কৰা হয়। নাবালিকাকেইগৰাকীৰ শাৰীৰিক পৰীক্ষাত তিনি বছৰ ধৰি যৌন নিৰ্যাতন চলোৱাৰ কথা জানিব পৰা গৈছে।
২০২২ চনৰ ২৬ আগষ্টত অভিযুক্ত ধৰ্মগুৰুজনৰ বিৰুদ্ধে প্ৰথমটো গোচৰ ৰুজু হৈছিল।তাৰ পিছত দ্বিতীয়টো গোচৰ ৰুজু কৰিছিল নিৰ্যাতিত ছোৱালী দুগৰাকীৰ মাতৃয়ে। পৰিয়ালে POCSO আইনৰ অধীনত এজাহাৰ দাখিল কৰে । তেওঁ দাবী কৰে যে অভিযুক্তই তেওঁৰ দুগৰাকী কন্যাৰ উপৰিও আৰু দুগৰাকী নাবালিকাক যৌন নিৰ্যাতন চলাইছিল। ২০১৯ চনৰ পৰা ২০২২ চনলৈ একেৰাহে তিনি বছৰ ধৰি এই নিৰ্যাতন চলি থকাৰ অভিযোগ উত্থাপন কৰে পৰিয়ালে।এই গোচৰত উচ্চতম ন্যায়ালয়ে তেওঁৰ জামিন আবেদন নাকচ কৰি শিৱমূৰ্তিক আত্মসমৰ্পণৰ নিৰ্দেশ দিছিল। অৱশেষত POCSO আইনৰ অধীনত দাখিল কৰা গোচৰত তেওঁক দোষমুক্ত কৰা হয়।
