ৰাজ্যৰ জৰুৰীকালীন স্বাস্থ্য সেৱা ‘১০৮ মৃত্যুঞ্জয়’ৰ নামত সংঘটিত হৈছে ব্যাপক দুৰ্নীতি আৰু অনিয়ম। চৰকাৰ আৰু ৰাইজক অন্ধকাৰত ৰাখি ১০৮ সেৱা পৰিচালনা কৰা সংস্থা ‘জি ভি কে ই এম আৰ আই’য়ে (GVK EMRI) চলাইছে লুণ্ঠনৰাজ। এই গুৰুতৰ অভিযোগ উত্থাপন কৰিছে সদৌ অসম ১০৮ মৃত্যুঞ্জয় কৰ্মচাৰী সন্থাই। বিগত ১ ডিচেম্বৰৰ পৰা গুৱাহাটীৰ চচলত ধৰ্মঘট পালন কৰি অহা কৰ্মচাৰী সন্থাই সংস্থাটোৰ বিৰুদ্ধে কেইবাটাও বিস্ফোৰক তথ্য ৰাজহুৱা কৰিছে।
সন্থাই অভিযোগ কৰা মতে, অসমত এই সেৱাৰ নামত ৮০৩ খন এম্বুলেন্স আছে যদিও ইয়াৰে প্ৰায় ১৫০ ৰ পৰা ২০০ খন গাড়ী কেৱল দিনৰ ভাগতহে চলোৱা হয়। নিয়ম অনুসৰি এখন গাড়ীত চাৰিজন কৰ্মচাৰী ( দুজন ই এম টি আৰু দুজন পাইলট) থাকিব লাগে যদিও, ধন বচাবৰ বাবে সংস্থাটোৱে মাত্ৰ এজন ই এম টি আৰু এজন পাইলটেৰে গাড়ী চলাই বাকী দুজন কৰ্মচাৰীৰ দৰমহা আত্মসাৎ কৰি আহিছে। তদুপৰি, কাৰিকৰী বিজুটিৰ বাবে বহু গাড়ী গেৰেজত পৰি থকাৰ ফলত প্ৰতিদিনে প্ৰায় ৫০ শতাংশ গাড়ী সেৱাৰ বাবে উপলব্ধ নহয়।
ইপিনে, ৰাষ্ট্ৰীয় স্বাস্থ্য অভিযানক দেখুৱাবৰ বাবে সংস্থাটোৱে কৰ্মচাৰীৰ ভুৱা তালিকা প্ৰস্তুত কৰাৰো অভিযোগ উঠিছে। সন্থাই দাবী কৰা মতে, প্ৰায় ৩৯০০ কৰ্মচাৰীৰ প্ৰয়োজন হোৱা ঠাইত বৰ্তমান মাত্ৰ ২৮০০ মান কৰ্মচাৰীহে আছে। অথচ চৰকাৰক জমা দিয়া তালিকাত মৃত ব্যক্তি, চৰকাৰী চাকৰিয়াল আৰু বৰ্খাস্ত হোৱা ব্যক্তিৰ নামো অন্তৰ্ভুক্ত কৰা হৈছে।
কৰ্মচাৰী সন্থাই লগতে জানিবলৈ দিয়ে যে, বহু এম্বুলেন্সৰ কোনো বীমা নাই আৰু পৰিবহণ বিভাগৰ নিৰ্দেশনা অমান্য কৰি ফিটনেছ নথকা গাড়ী চলাবলৈ চালকক বাধ্য কৰোৱা হয়। আনকি AS 01 FC 6438, AS 01 FC 8714, AS 01 EC 7924, AS 01 EC 8829 আদি নম্বৰৰ কেইবাখনো বিকল এম্বুলেন্স গেৰেজত বা বিষয়াৰ ঘৰত পেলাই থৈ, সেই গাড়ীৰ জিপিএছ মটৰ চাইকেলত লৈ গাড়ী চলি থকা দেখুৱাই ভুৱা বিলৰ জৰিয়তে চৰকাৰী ধন হৰলুকি কৰি অহা হৈছে।
নৌকা এম্বুলেন্সৰ ক্ষেত্ৰতো একেই দুৰ্নীতিৰ আশ্ৰয় লোৱাৰ অভিযোগ উঠিছে। কাগজ-কলমে ৫ খন নৌকা এম্বুলেন্স চলি থকা বুলি দেখুৱাই হিতাধিকাৰী বিষয়াই ভুৱা বিল বনাই আছে যদিও বাস্তৱত ৪ খনেই অচল হৈ পৰি আছে। ইফালে জৰুৰীকালীন ফোন গ্ৰহণ কৰা কেন্দ্ৰটোতো পৰ্যাপ্ত কৰ্মচাৰী নথকাৰ বাবে ৰোগীয়ে যথা সময়ত সেৱা লাভৰ পৰা বঞ্চিত হ’ব লগা হৈছে।
বৰ্তমান চলি থকা কৰ্মবিৰতিৰ সময়ছোৱাত চৰকাৰক দেখুৱাবৰ বাবে অ-প্ৰশিক্ষিত লোকৰ দ্বাৰা এম্বুলেন্স সেৱা চলাই এক ভয়াৱহ পৰিস্থিতিৰ সৃষ্টি কৰা বুলিও সন্থাই অভিযোগ কৰে। এই অ-প্ৰশিক্ষিত কৰ্মচাৰীসকলক ভুৱা ‘কেছ’ সৃষ্টি কৰাৰ লক্ষ্য বান্ধি দিয়া হৈছে, যাৰ ফলত প্ৰকৃত ৰোগী সেৱাৰ পৰা বঞ্চিত হৈছে। এনে অদক্ষ কৰ্মচাৰীৰ বাবে শেহতীয়াকৈ বহু গাড়ী দুৰ্ঘটনাত পতিত হোৱাৰ লগতে প্ৰসূতি আৰু জৰুৰীকালীন ৰোগীৰ মৃত্যুৰ দৰে ঘটনাও সংঘটিত হৈছে। আনকি একাংশ কৰ্মচাৰী ড্ৰাগছ সৰবৰাহতো জড়িত থকাৰ গুৰুতৰ অভিযোগ উত্থাপন হৈছে।
১০৮ মৃত্যুঞ্জয় কৰ্মচাৰী সন্থাই এই সমগ্ৰ বিষয়টোৰ ওপৰত উচিত তদন্ত কৰি দোষীক শাস্তি প্ৰদান কৰিবলৈ আৰু ৰাইজক সজাগ হ’বলৈ আহ্বান জনাইছে।
