গিগ এণ্ড প্লেটফৰ্ম চাৰ্ভিচ ৱৰ্কাৰ্ছ ইউনিয়নৰ আহ্বানত সোমবাৰে দেশজুৰি গিগ আৰু প্লেটফৰ্ম কৰ্মীসকলে তেওঁলোকৰ এপসমূহ বন্ধ কৰি এক অনলাইন ধৰ্মঘট কাৰ্যসূচী ৰূপায়ণ কৰে। প্লেটফৰ্ম অৰ্থনীতিত অব্যাহত থকা শোষণ আৰু নিৰাপত্তাহীনতাৰ বিৰুদ্ধে ইউনিয়নটোৱে ঘোষণা কৰা এক ধাৰাবাহিক প্ৰতিবাদী কাৰ্যসূচীৰ এয়া আছিল প্ৰথম পৰ্যায়।
ইউনিয়নটোৱে জনোৱা মতে, এই আন্দোলনৰ পৰৱৰ্তী পৰ্যায় হিচাপে অহা ৩ ফেব্ৰুৱাৰীত দেশৰ বিভিন্ন প্ৰান্তত শাৰীৰিকভাৱে প্ৰতিবাদী কাৰ্যসূচী গ্ৰহণ কৰা হ’ব।
GIPSWU-ৰ তথ্য অনুসৰি, এই ‘এপ চুইচ-অফ’ (App Switch-off) কাৰ্যসূচীত টেক্সী সেৱা, খাদ্য আৰু সামগ্ৰী যোগান, ঘৰুৱা সেৱা, সৌন্দৰ্য আৰু সুস্থতা, লজিষ্টিকছ, ই-কমাৰ্চ আৰু ডিজিটেল সেৱাৰ সৈতে জড়িত হাজাৰ হাজাৰ কৰ্মীয়ে অংশগ্ৰহণ কৰে।
ইউনিয়নটোৱে বিশেষভাৱে উল্লেখ কৰিছে যে এই প্ৰতিবাদৰ নেতৃত্ব দিছে মহিলা গিগ আৰু প্লেটফৰ্ম কৰ্মীসকলে। এপ-ভিত্তিক কামৰ ক্ষেত্ৰত মহিলাসকলে সন্মুখীন হোৱা নিৰ্দিষ্ট প্ৰত্যাহ্বানসমূহৰ প্ৰতি লক্ষ্য ৰাখি ইয়াৰ জৰিয়তে চৰকাৰৰ দৃষ্টি আকৰ্ষণৰ চেষ্টা কৰা হৈছে। ইউনিয়নটোৰ অভিযোগ অনুসৰি, কৰ্মীসকলে প্ৰায়ে আই ডি ব্লক কৰা, অস্বচ্ছ ৰেটিং ব্যৱস্থা, উপাৰ্জনৰ অনিশ্চয়তা, অভাৱ-অভিযোগ নিবাৰণৰ সুনিশ্চিত ব্যৱস্থা নথকা আৰু কৰ্মনীতিৰ একপক্ষীয় পৰিৱৰ্তনৰ দৰে চৰম সমস্যাৰ সন্মুখীন হৈ আহিছে।
মহিলা কৰ্মীসকলৰ নিৰাপত্তা, মৰ্যাদা আৰু আইনী সুৰক্ষাৰ ক্ষেত্ৰত থকা দুৰ্বলতাসমূহৰ বিষয়েও ইউনিয়নটোৱে উদ্বেগ প্ৰকাশ কৰিছে। তেওঁলোকৰ দাবী যে ন্যায্য মজুৰি বিচাৰিলে বহু সময়ত কৰ্মীসকল হাৰাশাস্তি বা হিংসাৰ বলি হ’বলগীয়া হয় আৰু পৰৱৰ্তী সময়ত তেওঁলোকৰ আই ডি ব্লক কৰি জীৱিকা কাঢ়ি লোৱা হয়।
GIPSWU-ৰ ৰাষ্ট্ৰীয় সভানেত্ৰী সীমা সিঙে কয় যে তেওঁলোকে কেন্দ্ৰীয় চৰকাৰক বাৰম্বাৰ স্মাৰকপত্ৰ প্ৰদান কৰিছে যদিও মূল দাবীসমূহ এতিয়াও অপূৰণীয় হৈ আছে। তেওঁ কয় যে “আমাৰ দাবীসমূহৰ ভিতৰত আছে এক পৃথক কেন্দ্ৰীয় আইনৰ অধীনত গিগ আৰু প্লেটফৰ্ম কৰ্মীক ‘শ্ৰমিক’ হিচাপে স্বীকৃতি দিয়া, স্বেচ্ছাচাৰীভাৱে আই ডি ব্লক কৰা কাৰ্য বন্ধ কৰা, স্বচ্ছ মূল্যায়ন আৰু কাম বিতৰণ ব্যৱস্থা, উন্নত মজুৰিৰ হাৰ আৰু বৰ্তমানৰ আইনৰ অধীনত ‘অভ্যন্তৰীণ অভিযোগ সমিতি’সহ এক কাৰ্যকৰী অভিযোগ নিবাৰণ ব্যৱস্থা গঢ়ি তোলা।”
প্লেটফৰ্মৰ কৰ্মনীতিৰ সন্দৰ্ভত শেহতীয়াকৈ চৰকাৰে কৰা ঘোষণাসমূহৰ স্পষ্টতাৰ ওপৰতো ইউনিয়নে প্ৰশ্ন উত্থাপন কৰিছে। তেওঁলোকৰ মতে, এই সন্দৰ্ভত এতিয়ালৈকে কোনো লিখিত নিৰ্দেশনা বা চৰকাৰী আদেশ প্ৰকাশ পোৱা নাই। এই অনলাইন ধৰ্মঘট আৰু ৩ ফেব্ৰুৱাৰীৰ প্ৰস্তাৱিত প্ৰতিবাদৰ জৰিয়তে GIPSWU-এ কৰ্মীসকলৰ দীৰ্ঘদিনীয়াকৈ লম্বিত হৈ থকা দাবীসমূহৰ প্ৰতি জনসাধাৰণ আৰু চৰকাৰৰ দৃষ্টি আকৰ্ষণৰ লক্ষ্য নিৰ্ধাৰণ কৰিছে।
