৩১ বছৰ পুৰণি গোচৰত গ্ৰেপ্তাৰ পাপ্পু যাদৱ; অসুস্থ হৈ চিকিৎসালয়ত ভৰ্তি সাংসদগৰাকী

৩১ বছৰ পুৰণি এটা গোচৰত বিহাৰ আৰক্ষীয়ে গ্ৰেপ্তাৰ কৰিছে পূৰ্ণীয়াৰ সাংসদ পাপ্পু যাদৱক। শুকুৰবাৰে মাজ নিশা পাটনাৰ মন্দিৰী অঞ্চলৰ নিজা বাসগৃহৰ পৰা গ্ৰেপ্তাৰ কৰে তেওঁক। গ্ৰেপ্তাৰৰ পিছত তেওঁক শাৰীৰিক অসুস্থতাৰ বাবে আৰক্ষীৰ পহৰাৰ মাজেৰে চিকিৎসালয়লৈ লৈ যোৱা হয় বুলি প্ৰশাসনিক সূত্ৰই সদৰী কৰিছে।

আদালতে সম্পত্তি জব্দ আৰু বাজেয়াপ্ত কৰাৰ নিৰ্দেশ দিয়াৰ মাত্ৰ তিনিদিন পিছতে এই পদক্ষেপ গ্ৰহণ কৰা হৈছে। এই গোচৰৰ সূত্ৰপাত ১৯৯৫ চনত হৈছিল। সেই সময়ত পাটনাৰ গৰ্ডানীবাগ থানাত এটা গোচৰ ৰুজু হৈছিল (এফআইআৰ নং ৫৫২/১৯৯৫)। অভিযোগকাৰী বিনোদ বিহাৰী লালে দাবী কৰে যে যদিও তেওঁৰ ঘৰ নামত ভাড়াত লৈ প্ৰকৃততে তাত সাংসদগৰাকীৰ কাৰ্যালয় চলি আছিল। অভিযোগ অনুসৰি এই তথ্য ভাড়া দিয়াৰ সময়ত গোপনে ৰখা হৈছিল।

ইয়াৰ পূৰ্বে আদালতে এই গোচৰৰ অভিযুক্তৰ বিৰুদ্ধে গ্ৰেপ্তাৰী পৰোৱানা জাৰি কৰিছিল। এই ৱাৰেণ্টৰ পিছতো কেইবাবাৰো আদালতত হাজিৰ নোহোৱাৰ বাবে অভিযুক্তৰ ঠিকনাত জাননী আঁৰিবলৈ নিৰ্দেশ দিয়ে। এই নিৰ্দেশ কাৰ্যকৰী হোৱাৰ পিছত অৱশেষত আদালতে সম্পত্তি জব্দ কৰাৰ চূড়ান্ত আদেশ জাৰি কৰে। এই নিৰ্দেশ জাৰি কৰাৰ তিনিদিনৰ ভিতৰতে আৰক্ষীয়ে গ্ৰেপ্তাৰ কৰিবলৈ ব্যৱস্থা গ্ৰহণ কৰে।

গ্ৰেপ্তাৰৰ পিছত পাপ্পু যাদৱে ছ’চিয়েল মিডিয়াত কেইবাটাও পোষ্টত দাবী কৰে যে তেওঁ কোনো কাৰণতে শিৰনত বা মৌনতা অৱলম্বন নকৰে। তেওঁ লিখিছে যে ন্যায়ৰ দাবীত তেওঁৰ স্থিতি অব্যাহত থাকিব আৰু তেওঁক গ্ৰেপ্তাৰ বা আন কোনো চাপ দি ৰখাব নোৱাৰিব।

একে সময়তে তেওঁ নিজৰ সুৰক্ষাৰ প্ৰতিও উদ্বেগ প্ৰকাশ কৰে। আৰক্ষীৰ কাৰ্য্যৰ সন্দৰ্ভত তেওঁ কয় যে যেতিয়া আদালতে আগদিনা তেওঁক হাজিৰ হোৱাৰ নিৰ্দেশ দিছিল, তেনেক্ষেত্ৰত আজি হঠাতে আৰক্ষী অহাৰ যুক্তি কি সেয়া তেওঁৰ বাবে স্পষ্ট নহয়। তেওঁৰ বিৰুদ্ধে ষড়যন্ত্ৰ ৰচনা কৰা বুলি অভিযোগ উত্থাপন কৰি তেওঁ কয় যে তেওঁ নিজৰ জীৱনৰ সুৰক্ষাৰ বাবে চিন্তিত।

উল্লেখযোগ্য যে পাপ্পু যাদৱে শেহতীয়াকৈ কেইবাটাও স্পৰ্শকাতৰ বিষয়ত সৰৱ হৈছিল। বিশেষকৈ NEET পৰীক্ষাৰ্থীৰ হত্যাকাণ্ড আৰু সুৰজ বিহাৰী হত্যাকাণ্ডৰ গোচৰত প্ৰশাসন আৰু চৰকাৰৰ ভূমিকাক লৈ তেওঁ ৰাজহুৱাভাৱে প্ৰশ্ন উত্থাপন কৰিছিল।

আদালতৰ নিৰ্দেশ অনুসৰি আইনী প্ৰক্ৰিয়া অনুসৰণ কৰিয়েই তেওঁক গ্ৰেপ্তাৰ কৰা বুলি আৰক্ষীয়ে জানিবলৈ দিয়ে। বিষয়টো এতিয়া আদালতত বিচাৰাধীন হৈ আছে আৰু আইন অনুসৰি অধিক ব্যৱস্থা গ্ৰহণ কৰা হ’ব। সম্প্ৰতি সমগ্ৰ ঘটনাৰ ওপৰত নজৰ ৰাখিছে প্ৰশাসন তথা ৰাজনৈতিক মহলে।