ভাৰত আৰু আমেৰিকা যুক্তৰাষ্ট্ৰৰ মাজত স্বাক্ষৰিত শেহতীয়া বাণিজ্য চুক্তিক লৈ কেন্দ্ৰীয় চৰকাৰৰ বিৰুদ্ধে সৰৱ হৈ পৰিছে ভাৰতীয় কমিউনিষ্ট পাৰ্টি (মাৰ্ক্সবাদী)। দেওবাৰে এক চৰকাৰী বিবৃতিত চিপিআই(এম)-এ এই চুক্তিক “ৰাষ্ট্ৰীয় সাৰ্বভৌমত্বৰ ওপৰত আক্ৰমণ” বুলি অভিহিত কৰি কয় যে আমেৰিকাক দিয়া “ব্যাপক ৰেহাইয়ে” দেশৰ অৰ্থনীতি আৰু কৃষি খণ্ডলৈ ভয়াৱহ সংকট কঢ়িয়াই আনিব।
চিপিআই(এম) পলিট ব্যুৰোৱে এক বিবৃতিত জনাইছে যে এই তথাকথিত ‘অন্তৱৰ্তীকালীন চুক্তি’ৰ সবিশেষ তথ্য কেন্দ্ৰীয় চৰকাৰে অবিলম্বে সংসদত দাঙি ধৰিব লাগে। শ্ৰমিক, কৃষক আৰু দেশৰ সাধাৰণ জনতাৰ স্বাৰ্থ বিঘ্নিত কৰিব পৰা কোনো চুক্তিতেই চৰকাৰে যাতে স্বাক্ষৰ নকৰে, তাৰ বাবে চৰকাৰক বাধ্য কৰাবলৈ দলটোৱে আহ্বান জনাইছে।
দলটোৰ মতে, বাণিজ্য চুক্তিৰ তথ্যসমূহ ক্ৰমান্বয়ে পোহৰলৈ অহাৰ লগে লগে বিজেপি নেতৃত্বাধীন চৰকাৰখনৰ দুৰ্বলতা স্পষ্ট হৈ পৰিছে। চিপিআই(এম)-ৰ গুৰুতৰ অভিযোগ যে বৰ্তমান আমেৰিকাই ভাৰতৰ নীতি নিৰ্ধাৰণ কৰিবলৈ আৰম্ভ কৰিছে। আনকি ৰাছিয়াৰ পৰা তেল ক্ৰয় কৰাৰ দৰে গুৰুত্বপূৰ্ণ বিষয়তো আমেৰিকাৰ নিৰ্দেশনাত চৰকাৰে কাম কৰা কাৰ্য্যক দলটোৱে চৰকাৰৰ “লজ্জাজনক আত্মসমৰ্পণ” বুলি কটাক্ষ কৰে।
চুক্তিখনৰ চৰ্ত অনুসৰি আমেৰিকাৰ পৰা আমদানি কৰা কপাহ, আপেল, বাদাম, চয়াবিন তেল আৰু অন্যান্য খাদ্য সামগ্ৰীৰ ওপৰত ভাৰতে কোনো শুল্ক আৰোপ নকৰাৰ সিদ্ধান্ত লৈছে। ইয়াৰ ফলত দেশৰ লাখ লাখ খেতিয়ক, বিশেষকৈ হিমাচল প্ৰদেশ আৰু জম্মু-কাশ্মীৰৰ আপেল খেতিয়কসকল তীব্ৰ প্ৰত্যাহ্বানৰ মুখত পৰিব।
পলিট ব্যুৰোৱে উল্লেখ কৰে যে, “নিউজিলেণ্ডৰ দৰে দেশৰ সৈতে হোৱা চুক্তিয়ে ইতিমধ্যে আমাৰ আপেল খেতিয়কসকলক জুৰুলা কৰিছে। এতিয়া আমেৰিকাৰ সৈতে হোৱা এই নতুন চুক্তিয়ে তেওঁলোকৰ জীৱিকা সম্পূৰ্ণৰূপে ধ্বংস কৰিব।” ইয়াৰ উপৰি অ-শুল্ক বাধা আঁতৰাই দিয়াৰ ফলত ভাৰতীয় কৃষকসকলে আমেৰিকাৰ উচ্চ ৰাজসাহায্যযুক্ত সামগ্ৰীৰ সৈতে প্ৰতিযোগিতাত টিকি থকাটো অসম্ভৱ হৈ পৰিব।
কেৱল কৃষিয়েই নহয়, প্ৰতিৰক্ষা ক্ষেত্ৰতো আমেৰিকাৰ ওপৰত নিৰ্ভৰশীলতা বৃদ্ধি কৰাৰ চৰকাৰী প্ৰৱণতাক তীব্ৰ সমালোচনা কৰিছে বাওঁ দলটোৱে। তেওঁলোকৰ মতে, আমেৰিকাৰ প্ৰতিৰক্ষা সঁজুলিৰ ওপৰত অত্যধিক নিৰ্ভৰশীলতাই ভাৰতৰ সামৰিক আৰু কৌশলগত স্বাৰ্থৰ ক্ষতি সাধন কৰিব।
উল্লেখ্য যে, পশ্চিম বংগত কংগ্ৰেছে চিপিআই(এম)-ৰ সৈতে মিত্ৰতাৰ দুৱাৰ বন্ধ কৰি নিৰ্বাচনত অকলে যুঁজাৰ সিদ্ধান্ত লোৱাৰ মাজতে কেন্দ্ৰীয় চৰকাৰৰ বিৰুদ্ধে চিপিআই(এম)-ৰ এই তীব্ৰ আক্ৰমণে বিশেষ তাৎপৰ্য বহন কৰিছে।
