প্ৰদেশ কংগ্ৰেছৰ সভাপতি গৌৰৱ গগৈৰ বিৰুদ্ধে মুখ্যমন্ত্ৰী হিমন্ত বিশ্ব শৰ্মাই উত্থাপন কৰি অহা ‘পাকিস্তান লিংক’ৰ অভিযোগক তীব্ৰ সমালোচনা ৰাইজৰ দলৰ সভাপতি তথা শিৱসাগৰৰ বিধায়ক অখিল গগৈৰ। সোমবাৰে লখিমপুৰত আয়োজিত এক সংবাদমেলত বিধায়কগৰাকীয়ে মুখ্যমন্ত্ৰীৰ এই সমগ্ৰ প্ৰচাৰক জনপ্ৰিয় কমেডী ধাৰাবাহিক ‘বেহাৰবাৰী আউটপোষ্ট’ৰ সৈতে তুলনা কৰি ইয়াক এক ‘কল্প কাহিনী’ বুলি অভিহিত কৰে।
অখিল গগৈয়ে মন্তব্য কৰে যে মুখ্যমন্ত্ৰীয়ে ইমান দিনে যি ধৰণৰ অভিযোগ উত্থাপন কৰি আহিছিল, কালিৰ সংবাদমেলৰ পাছত সেয়া একেবাৰে অসাৰ প্ৰমাণিত হৈছে। তেওঁ কয়, “গৌৰৱ গগৈয়ে নিজৰ পাকিস্তান ভ্ৰমণৰ সকলো তথ্য ইতিমধ্যে ৰাজহুৱা কৰিছে। তাত আপত্তি কৰিবলগীয়া একো নাই। মুখ্যমন্ত্ৰীয়ে ইয়াক যিধৰণে উপস্থাপন কৰিছে, সেয়া কোনো গুৰুতৰ বিষয় নহয়, বৰঞ্চ এক ৰাজনৈতিক নাটকহে।”
মুখ্যমন্ত্ৰীক উভটি ধৰি বিধায়কগৰাকীয়ে প্ৰশ্ন কৰে যে যদিহে গৌৰৱ গগৈৰ আই.এছ.আই. (ISI) ৰ সৈতে সম্পৰ্ক আছিল, তেন্তে ইমান দিনে ভাৰত চৰকাৰৰ গৃহ বিভাগে কিয় ব্যৱস্থা গ্ৰহণ কৰা নাছিল? তেওঁ আৰু কয় যে, “যদি মুখ্যমন্ত্ৰীয়ে গৌৰৱ গগৈক পাকিস্তানৰ এজেণ্ট বুলি জানিছিল, তেন্তে তেওঁক গ্ৰেপ্তাৰ নকৰি কিয় মুকলিকৈ ঘূৰি ফুৰিবলৈ দিলে? দেশৰ সাৰ্বভৌমত্বৰ ক্ষেত্ৰত আপোচ কৰা বাবে এই ক্ষেত্ৰত মুখ্যমন্ত্ৰী নিজেও জগৰীয়া।”
লগতে তেওঁ অভিযোগ কৰে যে এছ.আই.টি.ৰ প্ৰতিবেদন প্ৰকাশৰ নামত মুখ্যমন্ত্ৰীয়ে মিছা মাতিছে আৰু জনপ্ৰিয় শিল্পী জুবিন গাৰ্গৰ প্ৰসংগ টানি আনি আচল বিষয়টোৰ পৰা মানুহৰ দৃষ্টি আঁতৰাব বিচাৰিছে।
বিদেশী নাগৰিক বিতাড়নৰ প্ৰসংগতো অখিল গগৈয়ে বিজেপি চৰকাৰক কঠোৰ সমালোচনা কৰে। তেওঁৰ মতে, পূৰ্বৰ কংগ্ৰেছ বা অগপ চৰকাৰৰ তুলনাত সৰ্বানন্দ সোণোৱাল আৰু হিমন্ত বিশ্ব শৰ্মাৰ কাৰ্যকালত অতি নগণ্য সংখ্যক বিদেশীহে বিতাড়িত হৈছে। সংবাদমেলৰ শেষত তেওঁ আগন্তুক নিৰ্বাচনত বিজেপিক পৰাস্ত কৰিবলৈ ‘বিৰোধী ঐক্য মঞ্চ’ক আসন বুজাবুজিৰ প্ৰক্ৰিয়া ত্বৰান্বিত কৰিবলৈ আহ্বান জনায়।
