ইন্দোৰৰ তাপতী কমপ্লেক্সত সংঘটিত এটা অতি কৰুণ ঘটনাই সমগ্ৰ অঞ্চলটোতে চাঞ্চল্যৰ সৃষ্টি কৰিছে। ২৩ বছৰীয়া ৰাজ মাকৱানা নামৰ এজন যুৱকে আৰক্ষীয়ে চৰ মৰাৰ পাছতে ভীতিগ্ৰস্ত হৈ নিজৰ ফ্লেটৰ পঞ্চম মহলাৰ পৰা জপিয়াই আত্মহত্যা কৰে।
জানিব পৰা মতে বৃস্পতিবাৰে নিশা প্ৰায় ২ বজাৰ পৰা ৩ বজাৰ ভিতৰত এই ঘটনাটো সংঘটিত হয়। পৰিয়ালৰ লোকে জনোৱা অনুসৰি ৰাজ দীৰ্ঘদিন ধৰি মানসিক চাপত ভুগি আছিল আৰু তেওঁৰ চিকিৎসাও চলি আছিল। অসুস্থতাৰ বাবে তেওঁ প্ৰায়েই উশাহ লোৱাত কষ্ট পাইছিল আৰু সেইবাবেই নিশা অলপ মুকলি বতাহ খাবলৈ তেওঁ বাহিৰলৈ ওলাই আহিছিল।
কিন্তু সেইদিনা নিশা তেওঁ বাহিৰলৈ ওলাই অহাৰ সময়তে এজন নিৰাপত্তাৰক্ষীয়ে তেওঁক বাধা দিয়ে আৰু ইমান পলমকৈ কিয় বাহিৰত আছে তাক লৈ প্ৰশ্ন কৰে। এই কথাক লৈ দুয়োৰে মাজত তৰ্কাতৰ্কি হয় আৰু নিৰাপত্তাৰক্ষীজনে ওচৰৰে টহল দি থকা আৰক্ষীক খবৰ দিয়ে। ৰাজৰ ভগ্নী নিকিতাই জনোৱা মতে তেওঁলোকে আৰক্ষীক বাৰে বাৰে বুজাবলৈ চেষ্টা কৰিছিল যে ৰাজ মানসিকভাৱে অসুস্থ আৰু তেওঁৰ ঔষধ চলি আছে। পৰিয়ালৰ লোকে আৰক্ষীক ৰাজক এৰি দিবলৈ অনুৰোধ জনাইছিল আৰু তেওঁক ঘৰৰ ভিতৰত ৰখাৰ প্ৰতিশ্ৰুতিও দিছিল।
পৰিয়ালৰ অভিযোগ অনুসৰি ৰাজে পৰিস্থিতি শান্ত কৰিবলৈ আৰক্ষীৰ ওচৰত ক্ষমাও খুজিছিল। কিন্তু অভিযোগ উঠিছে যে এজন আৰক্ষী বিষয়াই ক্ষমা খোজাৰ পাছতো ৰাজক এটা চৰ মাৰে। এই ঘটনাত ৰাজ অত্যন্ত ভয় খাই যায় আৰু আৰক্ষীয়ে তেওঁক ধৰি লৈ যাব বুলি আতংকিত হৈ পৰে। ঘৰলৈ দৌৰি গৈ তেওঁ লুকুৱাই থাকিম বুলি কৈছিল যদিও কিছু সময়ৰ পাছতেই তেওঁ পঞ্চম মহলাৰ পৰা তললৈ জপিয়াই দিয়ে। থিতাতে ৰাজৰ মৃত্যু হয় আৰু আৰক্ষীয়ে তেওঁক হাস্পতাললৈ লৈ যায় যদিও চিকিৎসকে তেওঁক মৃত ঘোষণা কৰে।
আনহাতে আৰক্ষীয়ে এই সমগ্ৰ ঘটনাটোৰ এক বেলেগ ৰূপহে দাঙি ধৰিছে। অতিৰিক্ত আৰক্ষী উপ-আয়ুক্ত ৰাজেশ দাণ্ডোটিয়াই জনোৱা মতে নিৰাপত্তাৰক্ষীৰ খবৰ পাই আৰক্ষীৰ এটা দল সেই স্থানত উপস্থিত হৈছিল আৰু ৰাজক তেওঁৰ পৰিয়ালৰ সৈতে বুজাই-বঢ়াই থৈ আহিছিল। আৰক্ষীৰ মতে তেওঁলোকে ৰাজক কোনো ধৰণৰ প্ৰহাৰ কৰা নাছিল আৰু তেওঁলোক সেই স্থানৰ পৰা গুচি যোৱাৰ প্ৰায় ৪৫ মিনিটৰ পাছতহে ৰাজে এই চৰম পদক্ষেপ গ্ৰহণ কৰে। বৰ্তমান আৰক্ষীয়ে এটা গোচৰ ৰুজু কৰি সমগ্ৰ বিষয়টোৰ তদন্ত আৰম্ভ কৰিছে। এজন সাধাৰণ ৰান্ধনীৰ পুত্ৰ ৰাজৰ এনে অকাল মৃত্যুত সমগ্ৰ পৰিয়ালটো এতিয়া শোকত ভাঙি পৰিছে।
