দেশৰ ৰাষ্ট্ৰীয় ৰাজনৈতিক দলসমূহৰ বিত্তীয় অৱস্থাৰ শেহতীয়া এক প্ৰতিবেদন পোহৰলৈ অহাৰ পিছতে চৰ্চা চলিছে সমগ্ৰ দেশত। এছ’চিয়েশ্যন ফৰ ডেম’ক্ৰেটিক ৰিফৰ্ম অৰ্থাৎ এডিআৰৰ এক শেহতীয়া প্ৰতিবেদন অনুসৰি, ২০২৪-২৫ বিত্তীয় বৰ্ষত দেশৰ ছয়টা ৰাষ্ট্ৰীয় ৰাজনৈতিক দলৰ মুঠ আয় আছিল প্ৰায় সাত হাজাৰ নশ ষাঠি কোটি টকা। এই বিশাল পৰিমাণৰ ধনৰাজিৰ ভিতৰত সিংহভাগ অৰ্থাৎ ৮৫ শতাংশতকৈও অধিক ধন কেৱল শাসকীয় দল বিজেপিৰ একাউন্টলৈ গৈছে। প্ৰতিবেদনত উল্লেখ কৰা তথ্য অনুসৰি, বিজেপিয়ে এই বিত্তীয় বৰ্ষত মুঠ ৬,৭৬৯.১৪ কোটি টকা উপাৰ্জন কৰিবলৈ সক্ষম হৈছিল। ইয়াৰ বিপৰীতে দ্বিতীয় স্থানত থকা কংগ্ৰেছৰ আয় আছিল মাত্ৰ ৯১৮.২৮ কোটি টকা, যিটো বিজেপিৰ তুলনাত বহু গুণে কম।
কেৱল আয়ৰ ক্ষেত্ৰতেই নহয়, ব্যয়ৰ ক্ষেত্ৰতো বিজেপি সকলো দলতকৈ বহু আগত। দলটোৱে এই বৰ্ষত মুঠ ৩,৭৭৪.৫৮ কোটি টকা বিভিন্ন খণ্ডত খৰচ কৰিছে। ইয়াৰ বিপৰীতে কংগ্ৰেছে তেওঁলোকৰ আয়তকৈও বেছি ধন খৰচ কৰিছে, যিটো প্ৰায় এক হাজাৰ এশ এঘাৰ কোটি টকাৰ ওপৰত। অন্যান্য দলসমূহৰ ভিতৰত চিপিএমৰ আয় ১৭২.৬০ কোটি, বিএছপিৰ ৫৮.৫৮ কোটি, আম আদমী পাৰ্টিৰ ৩৯.২৮ কোটি আৰু নেচনেল পিপলছ পাৰ্টিৰ আয় ২.১৮ কোটি টকা বুলি প্ৰতিবেদনত প্ৰকাশ পাইছে। আনহাতে, চিপিএম আৰু বিএছপিৰ দৰে দলসমূহে নিজৰ উপাৰ্জনতকৈ অধিক ব্যয় কৰা দেখা গৈছে।
ৰাজনৈতিক দলসমূহৰ এই বিশাল পৰিমাণৰ ধনৰ আচল উৎস কি সেই বিষয়েও প্ৰতিবেদনত স্পষ্ট ইংগিত পোৱা গৈছে। দেশৰ ৰাষ্ট্ৰীয় দলসমূহৰ মুঠ আয়ৰ ৮৫ শতাংশতকৈ অধিক ধন অহা দেখা গৈছে সাধাৰণ অনুদান আৰু বিভিন্ন বৰঙণিৰ পৰা। ইয়াৰে ভিতৰত কেৱল বিজেপিয়ে অনুদানৰ জৰিয়তে ৬,১২৪.৮৫ কোটি টকা সংগ্ৰহ কৰিছে, যি তেওঁলোকৰ মুঠ আয়ৰ ৯০ শতাংশতকৈ অধিক। কংগ্ৰেছৰ আয়ৰ ক্ষেত্ৰত অনুদানৰ লগতে কুপন বিক্ৰীৰ পৰা অহা ধনৰ অংশও লক্ষণীয়।
ব্যয়ৰ দিশবোৰ পৰ্যবেক্ষণ কৰিলে দেখা যায় যে দলসমূহে সৰ্বাধিক ধন নিৰ্বাচনী প্ৰচাৰ কাৰ্য আৰু প্ৰশাসনিক খৰচৰ নামত ব্যয় কৰিছে। বিজেপিয়ে নিৰ্বাচনী প্ৰচাৰত ৩,৩৩৫.৩৬ কোটি টকা খৰচ কৰাৰ বিপৰীতে কংগ্ৰেছে ৮৯৬.২২ কোটি টকা ব্যয় কৰিছে। মুঠৰ ওপৰত ক’বলৈ গ’লে এই প্ৰতিবেদনখনে দেশৰ ৰাষ্ট্ৰীয় ৰাজনীতিত বিজেপিৰ আৰ্থিক আধিপত্য কিমান গভীৰ, তাক স্পষ্ট কৰি তুলিছে। সাধাৰণ ৰাইজৰ মাজত এতিয়া এই বিশাল ধনৰ উৎস আৰু ব্যয়ক লৈ ব্যাপক কৌতূহল আৰু চৰ্চাৰ সৃষ্টি হৈছে।
