আমেৰিকা যুক্তৰাষ্ট্ৰ আৰু ইজৰাইলৰ যুটীয়া সামৰিক অভিযানৰ প্ৰত্যুত্তৰ দিবলৈ গৈ পশ্চিম এছিয়াৰ কেইবাখনো চুবুৰীয়া ৰাষ্ট্ৰত মিছাইল আক্ৰমণ চলোৱাৰ বাবে অৱশেষত ক্ষমা বিচাৰিলে ইৰানৰ ৰাষ্ট্ৰপতি মাছুদ পেজেস্কিয়ানে। যুদ্ধই দ্বিতীয় সপ্তাহত ভৰি দিয়াৰ সময়তে তেহৰানে চুবুৰীয়া দেশসমূহৰ ওপৰত আৰু কোনো ধৰণৰ আক্ৰমণ নচলায় বুলি স্পষ্ট কৰি দিছে। একে সময়তে, মাৰ্কিন ৰাষ্ট্ৰপতি ডনাল্ড ট্ৰাম্পে কৰা ‘বিনা চৰ্তে আত্মসমৰ্পণ’ৰ দাবী ইৰানে কঠোৰ ভাষাৰে নাকচ কৰিছে।
ইৰানৰ ৰাষ্ট্ৰপতি মাছুদ পেজেস্কিয়ানে জানিবলৈ দিয়া মতে, দেশখনৰ অস্থায়ী নেতৃত্ব পৰিষদে চুবুৰীয়া ৰাষ্ট্ৰসমূহৰ ওপৰত আক্ৰমণ স্থগিত ৰখাৰ সিদ্ধান্ত গ্ৰহণ কৰিছে। এই প্ৰসংগত ৰাষ্ট্ৰপতিগৰাকীয়ে চুবুৰীয়া দেশসমূহৰ ওচৰত ক্ষমা প্ৰাৰ্থনা কৰি কয় যে অন্য ৰাষ্ট্ৰৰ ওপৰত আক্ৰমণ চলোৱাৰ তেওঁলোকৰ কোনো ইচ্ছা নাছিল। লগতে তেওঁ স্পষ্ট কৰি দিয়ে যে যদিহে সেই দেশসমূহৰ ভূখণ্ডৰ পৰা ইৰানৰ ওপৰত কোনো নতুন আক্ৰমণ নহয়, তেন্তে তেহৰানেও সেই দেশসমূহলৈ লক্ষ্য কৰি কোনো ধৰণৰ ক্ষেপণাস্ত্ৰ নিক্ষেপ কৰাৰ পৰা বিৰত থাকিব।
উল্লেখ্য যে, শেহতীয়াকৈ আমেৰিকা আৰু ইজৰাইলৰ যুটীয়া আক্ৰমণৰ প্ৰতিশোধ ল‘বলৈ গৈ ইৰানে চৌদি আৰব, কাটাৰ, কুৱেইট, ওমান আৰু বাহৰেইনকে ধৰি পশ্চিম এছিয়াৰ প্ৰায় দহখন প্ৰদেশত থকা মাৰ্কিন সেনা ঘাটিসমূহত ধাৰাবাহিকভাৱে মিছাইল আক্ৰমণ চলাইছিল। ইয়াৰ পিছতেই চৌদি আৰবে ইৰানক কঠোৰ সকিয়নী প্ৰদান কৰি কয় যে যদিহে তেহৰানে আক্ৰমণৰ পৰা বিৰত নাথাকে, তেন্তে তেওঁলোকো কঠোৰ পদক্ষেপ গ্ৰহণ কৰিবলৈ বাধ্য হ‘ব। ৰিয়াধৰ এই সকিয়নীৰ পিছতেই পাকিস্তানেও চৌদি আৰবৰ সমৰ্থনত থিয় দি প্ৰয়োজনত যুদ্ধত সামৰিক সাহায্য প্ৰদান কৰাৰ আশ্বাস দিয়ে।
ইপিনে, সংঘাত তীব্ৰতৰ হৈ পৰাৰ লগে লগে মাৰ্কিন ৰাষ্ট্ৰপতি ডনাল্ড ট্ৰাম্পে তেহৰানৰ ওপৰত নতুনকৈ হেঁচা প্ৰয়োগ কৰি ইৰানক বিনা চৰ্তে আত্মসমৰ্পণ কৰিবলৈ দাবী জনায়। কিন্তু ৰাষ্ট্ৰপতি পেজেস্কিয়ানে এই দাবী পোনচাতেই নাকচ কৰি ইয়াক এক অবাস্তৱ প্ৰত্যাশা বুলি অভিহিত কৰে। ইৰানে কোনো কাৰণতেই আমেৰিকাৰ ওচৰত আত্মসমৰ্পণ নকৰে বুলি দোহাৰি তেওঁ কয় যে ৱাশ্বিংটনৰ এই সপোন কেৱল সপোন হৈয়েই ৰ‘ব।
কূটনৈতিক মহলৰ মতে, চৌদি আৰবৰ কঠোৰ সকিয়নী আৰু বৰ্তমানৰ ভয়াৱহ পৰিস্থিতিৰ প্ৰতি লক্ষ্য ৰাখিয়েই ইৰানে হঠাতে নিজৰ সুৰ সলনি কৰিবলৈ বাধ্য হৈছে। ইজৰাইল আৰু আমেৰিকাৰ ভয়ংকৰ যুটীয়া আক্ৰমণত ইৰান ইতিমধ্যে জুৰুলা হৈ পৰিছে। প্ৰাপ্ত তথ্য অনুসৰি, এই আক্ৰমণত হাজাৰৰো অধিক লোকৰ মৃত্যু হোৱাৰ লগতে দেশখনৰ বিস্তীৰ্ণ অঞ্চল ধ্বংসস্তূপত পৰিণত হৈছে। এনে এক সংকটজনক অৱস্থাত চৌদি আৰব আৰু পাকিস্তানক একত্ৰিত কৰি নতুনকৈ যুদ্ধত লিপ্ত হ‘লে ইৰানে প্ৰতিৰোধ কৰাৰ ক্ষমতা সম্পূৰ্ণৰূপে হেৰুৱাই পেলাব বুলি বিশেষজ্ঞসকলে ধাৰণা কৰিছে।
