আহমেদাবাদৰ নৰেন্দ্ৰ মোডী ষ্টেডিয়ামত ইতিহাস ৰচনা কৰিলে টিম ইণ্ডিয়াই। ফাইনেলত ২৫৫ ৰানৰ বিশাল লক্ষ্যৰ পিছত খেদি নিউজিলেণ্ডে প্ৰথমে যুঁজৰ পৰিচয় দেখুৱাইছিল যদিও শেষত যশস্প্ৰীত বুমৰাহৰ দুৰ্দান্ত স্পেল আৰু ভাৰতৰ অনুশাসিত বলিঙৰ সন্মুখত নিউজিলেণ্ড ভাঙি পৰে। বুমৰাহে একেৰাহে ইয়ৰ্কাৰৰ সহায়ত কিউইৰ বেটিং লাইন আপ ধ্বংস কৰি বাস্তৱিকতে মেচখন শেষ কৰে। আহমেদাবাদ ষ্টেডিয়াম আনন্দ উল্লাসত কঁপি উঠে। টিম ইণ্ডিয়াই পুনৰবাৰ বিশ্ব চেম্পিয়নৰ মুকুট পিন্ধিলে।
সঞ্জু চেমচন আৰু অভিষেক শৰ্মাই বেটেৰে ভাৰতৰ জয়ৰ ভেটি স্থাপন কৰে। আৰম্ভণিৰে পৰাই কিউই বলাৰৰ ওপৰত ধুমুহাৰ সৃষ্টি কৰিছিল। পাৱাৰপ্লে’ত অভিলেখ সৃষ্টি কৰি ৯২ ৰান সংগ্ৰহ কৰি মেচখনৰ গতি ঘূৰাই দিয়ে। ছেমছনৰ ৮৯ ৰানৰ বিস্ফোৰক আৰু ঈশান কিষানৰ দ্ৰুত অৰ্ধশতকেৰে ভাৰতে নিৰ্ধাৰিত ২০ অভাৰত ২৫৫ ৰান সংগ্ৰহ কৰে। পিছত অক্ষৰ পেটেল, বুমৰাহ আদি বলাৰসকলে একেৰাহে উইকেট দখল কৰি খেলখন ভাৰতৰ হাতৰ মুঠিত ৰাখি অৱশেষত কিউইৰ প্ৰতিৰোধ ভাঙি বিশ্বকাপৰ ট্ৰফী টিম ইণ্ডিয়াৰ হাতত তুলি দিয়ে।
শেষত ভাৰতৰ উদযাপনেৰে সকলো সামৰণি পৰিল। নিউজিলেণ্ডক ৯৬ ৰানত পৰাস্ত কৰি একেৰাহে দ্বিতীয়বাৰৰ বাবে টি-২০ বিশ্বকাপ চেম্পিয়ন হ’ল ভাৰত। অভিষেক শৰ্মাই শেষ উইকেটটো লয়, আৰু তিলক ভাৰ্মাই লং অন বাউণ্ডেৰীত এটা দুৰ্দান্ত কেচ লয়। নিমিষতে সমগ্ৰ ষ্টেডিয়ামতে উদযাপন আৰম্ভ হৈ পৰে । ঘৰুৱা খেলপথাৰত বিশ্বকাপ জয়ৰ এই স্মৰণীয় নিশা ভাৰতীয় দলটোৱে প্ৰমাণ কৰিলে যে এই দলটো হয়তো টি-২০ ইতিহাসৰ অন্যতম শ্ৰেষ্ঠ দল।
কিউইৰ সন্মুখত লক্ষ্য ইমানেই বেছি আছিল যে মেচখন প্ৰায় একপক্ষীয় হৈ পৰিছিল। বিশাল ৰান খেদি নিউজিলেণ্ডে প্ৰথম পাঁচ অভাৰত ফিন এলেন, ৰাচিন ৰবীন্দ্ৰ আৰু গ্লেন ফিলিপছক হেৰুৱাই চাপত পৰিছিল। পিছত হাৰ্দিক পাণ্ডিয়াই মাৰ্ক চেপমেনক ঘূৰাই পঠিয়ায়। টিম ছেইফাৰ্টে অৱশ্যে যুঁজি অৰ্ধশতক অৰ্জন কৰে যদিও তেওঁ আউট হোৱাৰ লগে লগে কিউই দলটোৱে প্ৰায় মেচখনৰ পৰা আঁতৰি গৈছিল। ইয়াৰ পিছত অবিৰতভাৱে উইকেট পৰিগৈ থাকিল—ডেৰিল মিচেলও অক্ষৰ পেটেলৰ চিকাৰ হ’ল। শেষত যশপ্ৰীত বুমৰাহে ৪ উইকেট আৰু অক্ষৰ পেটেলে ৩ উইকেট দখল কৰি নিউজিলেণ্ডৰ ইনিংছৰ মেৰুদণ্ড ভাঙিবলৈ সক্ষম হয়।
ইয়াৰ পূৰ্বে ভাৰতীয় বেটছমেনসকলে বেটিঙেৰে আহমেদাবাদৰ আকাশত ধুমুহাৰ সৃষ্টি কৰিছিল। অভিষেক শৰ্মাৰ ২১ বলত ৫২ ৰান আৰু সঞ্জু চেমছনৰ ৮৯ ৰানৰ বিস্ফোৰক ইনিংছে নিউজিলেণ্ডৰ বলিং আক্ৰমণক একেবাৰে দিশহাৰা কৰি পেলায়। শক্তি আৰু শৈলীৰ সংমিশ্ৰণেৰে চেমচনৰ বেটৰ পৰা ধাৰাবাহিকভাৱে ছয় ওলাই আহিছিল — লং অন, স্কেৱৰ লেগ আৰু চিধাই বলটো পোনে পোনে খেলপথাৰৰ ওপৰেৰে উৰি গৈছিল।
তেওঁৰ সৈতে একেলগে তাণ্ডৱ চলাই ঈশান কিষাণে মাত্ৰ ২৫টা বলত ৫৪ ৰান সংগ্ৰহ কৰি দলৰ স্ক’ৰ আৰু অধিক বৃদ্ধি কৰে। তিনিওজন বেটছমেনৰ বিস্ফোৰক বেটিঙৰ জৰিয়তে ভাৰতে নিৰ্ধাৰিত ২০ অভাৰত ২৫৫ ৰানৰ পাহাৰ গঢ়ি তোলে। অভিষেক আৰু চেমছনৰ অপেনিং ৪৩টা বলত ৯৮ ৰানৰ পাৰ্টনাৰশ্বিপে খেলখনৰ আৰম্ভণিতে ভাৰতৰ আধিপত্য স্পষ্ট কৰি দিয়ে। পিছত ঈশান কিষানৰ সৈতে ৪৮ বলত ১০৫ ৰানৰ পাৰ্টনাৰশ্বিপে ভাৰতক ২০০ৰ সীমা অতিক্ৰম কৰি পেলায়।
যদিও জিমি নিছামৰ এটা অভাৰত ছেমছন, কিষাণ আৰু সূৰ্যকুমাৰ যাদৱ আউট হোৱাত সামান্য বিপৰ্যয়ৰ সন্মুখীন হ’বলগীয়া হৈছিল, তেতিয়ালৈকে খেলখনৰ নিয়ন্ত্ৰণ সম্পূৰ্ণৰূপে ভাৰতৰ হাতত আছিল। শেষৰ ফালে শিৱম ডুবেৰ নিৰ্দয় প্ৰহাৰে ভাৰতৰ স্ক’ৰ ২৫০ৰ বহু ওপৰলৈ লৈ গ’ল আৰু সেই বৃহৎ ৰানে অৱশেষত ভাৰতৰ বাবে বিশ্বকাপ জয়ৰ মঞ্চ তৈয়াৰ কৰিলে।
