আইআইটিৰ ডিগ্ৰী আৰু বহুজাতিক কোম্পানীৰ মোটা দৰমহাৰ চাকৰি এৰি এতিয়া বিদেশত চাহ বিক্ৰী কৰিছে এজন ভাৰতীয় যুৱকে। লছ এঞ্জেলছৰ ফাৰ্মাৰ মাৰ্কেটত চাহ আৰু পোহা বিক্ৰী কৰি এতিয়া ছচিয়েল মিডিয়াত চৰ্চাৰ কেন্দ্ৰবিন্দু হৈ পৰিছে প্ৰভাকৰ প্ৰসাদ নামৰ এই মেধাবী ছাত্ৰজন। বিহাৰৰ এক অতি দৰিদ্ৰ পৰিয়ালত জন্মগ্ৰহণ কৰা প্ৰভাকৰৰ জীৱনৰ সংগ্ৰাম সঁচাকৈয়ে আচৰিত ধৰণৰ।
আইআইটিৰ পৰা উত্তীৰ্ণ হোৱাৰ পিছত ২০০৮ চনত তেওঁ এটা নামী প্ৰতিষ্ঠানত কেৰিয়াৰ আৰম্ভ কৰিছিল। কিন্তু গতানুগতিক জীৱনৰ পৰা আঁতৰি আহিবলৈ তেওঁ চাকৰি এৰি মুম্বাইত মডেলিং কৰিবলৈ লৈছিল। তাৰ পিছত ২০১৪ চনত তেওঁ টেক্সাছলৈ যায়। কিন্তু বিদেশত তেওঁৰ দিনবোৰ সুখৰ নাছিল। একাধিক কোম্পানীৰ পৰা তেওঁক ছাটাই কৰা হৈছিল আৰু আনকি তেওঁৰ প্ৰেমিকাৰ সৈতেও সম্পৰ্ক বিচ্ছেদ হৈছিল। এই সকলোবোৰ দুৰ্ঘটনাৰ পিছত তেওঁ মানসিকভাৱে ভাগি পৰিছিল যদিও হাৰ মনা নাছিল।
অৱশেষত কেলিফৰ্ণিয়াত অকলে থকাৰ সিদ্ধান্ত লৈ প্ৰভাকৰে চাহৰ দোকান এখন আৰম্ভ কৰে। বৰ্তমান তেওঁ ছচিয়েল মিডিয়াত বিহাৰী চাহৱালা নামেৰে অতি জনপ্ৰিয়। তেওঁৰ ইনষ্টাগ্ৰাম একাউণ্টত চাহ বনোৱা আৰু গ্ৰাহকৰ সৈতে কথা পতাৰ বহুতো ভিডিঅ’ দেখা যায়। আমেৰিকাৰ বজাৰত তেওঁ একাপ চাহ প্ৰায় ৭৮০ টকাত আৰু এক প্লেট পোহা ১৩৫০ টকাত বিক্ৰী কৰে। ভাৰতৰ তুলনাত এই দাম বহুত বেছি যেন লাগিলেও প্ৰভাকৰৰ দোকানত গ্ৰাহকৰ ভিৰ সদায় থাকে।
সৰু থাকোঁতে আৰ্থিক সংকটৰ মাজেৰে দিন পাৰ কৰা আৰু হিন্দী মাধ্যমৰ পৰা আহি ইংৰাজী ক’ব নোৱাৰাৰ বাবে ঠাট্টাৰ পাত্ৰ হোৱা প্ৰভাকৰে আজি নিজৰ পৰিচয় নিজেই গঢ়ি তুলিছে। সকলো বাধা নেওচি তেওঁ এতিয়া লছ এঞ্জেলছৰ বজাৰত এজন সফল ব্যৱসায়ী হিচাপে প্ৰতিষ্ঠিত হৈছে। তেওঁৰ এই কাহিনীয়ে প্ৰমাণ কৰে যে ভাগ্যৰ চকা কেতিয়া কেনেকৈ ঘূৰে তাক কোনেও ক’ব নোৱাৰে।
