অসম বিধানসভা নিৰ্বাচনৰ ৰণশিঙা বাজি উঠাৰ লগে লগে ৰাজ্যৰ ৰাজনৈতিক পৰিৱেশ উত্তাল হৈ পৰিছে। বিশেষকৈ ঐতিহাসিক শিৱসাগৰ সমষ্টিত নিৰ্বাচনী প্ৰচাৰ আৰু বাকযুদ্ধই এতিয়া চৰম পৰ্যায় পাইছে। সমষ্টিটোৰ বৰ্তমানৰ বিধায়ক তথা ৰাইজৰ দলৰ সভাপতি অখিল গগৈয়ে সংবাদ মাধ্যমৰ আগত নিজৰ বিজয়ক লৈ তীব্ৰ আত্মবিশ্বাস প্ৰকাশ কৰিছে। কাজিৰঙাত সংবাদ মাধ্যমৰ সৈতে হোৱা কথা-বতৰাত গগৈয়ে দাবী কৰে যে আগন্তুক নিৰ্বাচনত তেওঁৰ জয় কেৱল নিশ্চিতই নহয়, বৰঞ্চ এই সম্ভাৱনা ‘এহেজাৰ শতাংশ’ ধ্ৰুৱ সত্য।
নিৰ্বাচনী প্ৰচাৰৰ মাজতে অখিল গগৈয়ে তেওঁৰ প্ৰতিদ্বন্দ্বী তথা বিজেপিৰ ঘোষিত প্ৰাৰ্থী, প্ৰাক্তন বিধায়ক কুশল দুৱৰীক তীব্ৰ ভাষাৰে আক্ৰমণৰ লক্ষ্য কৰি লয়। গগৈয়ে অভিযোগ কৰে যে ৯৬ নং শিৱসাগৰ বিধানসভা সমষ্টিত বিজেপি দলে যিজন কুশল দুৱৰী ওৰফে জয়ন্ত হাজৰিকাক প্ৰাৰ্থিত্ব দিছে, তেওঁৰ বিৰুদ্ধে কাজিৰঙা ৰাষ্ট্ৰীয় উদ্যানত বন্যপ্ৰাণী চিকাৰৰ গুৰুতৰ অভিযোগ আছে। গগৈয়ে কয়, “২০১০ চনৰ ১৩০/২০১০ নং এটা গোচৰৰ অধীনত তেওঁ কাজিৰঙা ৰাষ্ট্ৰীয় উদ্যানত জীৱ হত্যা কৰিছিল। এই সন্দৰ্ভত আমি আগতেও আপত্তি দৰ্শাইছিলো।”
অখিল গগৈয়ে তথ্য দাঙি ধৰি অধিক অভিযোগ কৰে যে কাজিৰঙাৰ ভিতৰত জিতেন গগৈ আৰু কুশল দুৱৰীয়ে জীৱ হত্যা কৰা গোচৰটোত ২০২২ চনত আদালতৰ ৰায় আহিছিল। তেওঁৰ মতে, উক্ত গোচৰত কুশল দুৱৰী আৰু জিতেন গগৈৰ লগতে আন এজনক আদালতে দোষী সাব্যস্ত কৰি দুবছৰৰ কাৰাদণ্ডৰ নিৰ্দেশ দিছিল। এনে এজন ‘কনভিক্টেড’ বা দোষী সাব্যস্ত হোৱা ব্যক্তিক বিজেপিয়ে প্ৰাৰ্থিত্ব প্ৰদান কৰাটো দুৰ্ভাগ্যজনক বুলি তেওঁ অভিহিত কৰে। বিজেপি চৰকাৰ আৰু তেওঁলোকৰ প্ৰতিনিধিয়ে কেৱল মিছা প্ৰতিশ্ৰুতিৰে ৰাইজক আভুৱা ভাঁৰি আহিছে বুলিও গগৈয়ে অভিযোগ কৰে।
ইফালে, ব্যক্তিগত আক্ৰমণৰ লগতে সমষ্টিটোৰ ঐতিহ্য ৰক্ষা আৰু সামগ্ৰিক বিকাশৰ প্ৰশ্নও উত্থাপন কৰে ৰাইজৰ দলৰ সভাপতিগৰাকীয়ে। তেওঁ স্পষ্টকৈ কয় যে বিজেপিৰ কোনো কুচক্ৰান্তই তেওঁক জনসাধাৰণৰ পৰা আঁতৰাই ৰাখিব নোৱাৰে। কাজিৰঙাত তেওঁ পুনৰ দোহাৰে যে শিৱসাগৰৰ ৰাইজে বিগত সময়ছোৱাত প্ৰতিজন প্ৰতিনিধিৰ কাৰ্যকাল প্ৰত্যক্ষ কৰিছে আৰু সেয়েহে এইবাৰো তেওঁলোকে সজাগ হৈ সঠিক সিদ্ধান্ত গ্ৰহণ কৰিব। কুশল দুৱৰীয়ে সমষ্টিটোত কোনো ধৰণৰ প্ৰভাৱ পেলাব নোৱাৰে বুলি গগৈয়ে একপ্ৰকাৰ প্ৰত্যাহ্বান জনায়।
২০২৬ৰ এই নিৰ্বাচন অখিল গগৈৰ ৰাজনৈতিক ভৱিষ্যতৰ বাবে অগ্নিপৰীক্ষা স্বৰূপে বিবেচিত হৈছে। কাৰাগাৰৰ পৰাই বিগত নিৰ্বাচনত ইতিহাস ৰচা গগৈয়ে এইবাৰ পোনপটীয়া নিৰ্বাচনী যুঁজত কিমান ফলপ্ৰসূ হ’ব, সেয়া এতিয়া লক্ষণীয় হ’ব। বিজেপিৰ দুৰ্গ দখলৰ পৰিকল্পনা আৰু অখিল গগৈৰ এই আক্ৰমণাত্মক স্থিতিৰ ফলত শিৱসাগৰৰ ৰাজনৈতিক যুঁজখন অধিক আকৰ্ষণীয় হৈ পৰিছে।
