তামিলনাডুৰ ৰাজনৈতিক মানচিত্ৰ সলনি হৈছে। তাত হালধীয়া ৰঙৰ প্ৰাদুৰ্ভাৱ। বহুতে বিশ্বাস কৰে যে সাধাৰণতে চেন্নাই ছুপাৰ কিংছৰ সৈতে জড়িত হালধীয়া ঢৌ এতিয়া ৰাজনৈতিক ক্ষেত্ৰতো প্ৰতিফলিত হৈছে। বহুতে থালাপতি বিজয়ৰ ৰাজনৈতিক অভিষেকক ‘চিনেমাৰ ব্লকবাষ্টাৰ’ৰ দৰে সফলতা বুলি অভিহিত কৰিছে।
অৱশ্যে তেওঁৰ সমৰ্থকৰ এটা অংশই দাবী কৰে যে এই জয়ৰ আঁৰত ‘কেপ্তেইন কুল’ৰ সুলভ কৌশল।
যোৱা বছৰ টিভিকেত যোগদান কৰাৰ পিছত ৰাজনৈতিক কৌশলবিদ প্ৰশান্ত কিশোৰে কয়, “মই তামিলনাডুৰ আটাইতকৈ জনপ্ৰিয় বিহাৰী হ’ব বিচাৰো। তাৰ বাবে মই চিএছকেক জয়ী কৰোৱা ধোনিৰ দৰে হ’ব লাগিব। মই আপোনালোকৰ নেতাৰ নেতৃত্বত টিভিকেক জিকাম।”
ধোনিৰ নাম উত্থাপন কৰি কিশোৰে এটা স্পষ্ট লক্ষ্য নিৰ্ধাৰণ কৰিছিল, ৰাজনৈতিক মহলে বিশ্বাস কৰে যে তেওঁ তামিলনাডুৰ ক্ৰিকেটপ্ৰেমী জনসাধাৰণকো আকৰ্ষণ কৰিবলৈ সক্ষম হৈছিল।
টিভিকেৰ নিৰ্বাচনী প্ৰতীক আছিল ‘হুইচেল’, যিটো চিএছকে সমৰ্থকসকলৰ বাবে অতি চিনাকি। চি এছ কেৰ গীত হৈছে হুইচেল পৰু। গোটেই নিৰ্বাচনী প্ৰচাৰৰ সময়ছোৱাত টিভিকেৰ ৰেলী চিপকোৰ গেলেৰীত চিএছকে সমৰ্থকসকলৰ আনন্দৰ ৰাজনৈতিক সংস্কৰণ হৈ পৰিছিল।
এইবাৰ প্ৰথমবাৰৰ বাবে ভোটদান কৰা বহু যুৱকে থালাপতি বিজয়ক সমৰ্থন কৰিছে। একেদৰে আই পি এলতো তেওঁলোকৰ সমৰ্থন মহেন্দ্ৰ সিং ধোনিৰ প্ৰতি।
নিৰ্বাচনৰ অন্তিম পৰ্যায়ত যেতিয়া টিভিকে ১০০ ৰান অতিক্ৰম কৰিছিল, তেতিয়া বহুতে বিজয়ৰ ‘ফিনিচিং’ আৰু ফিনিছাৰ ধোনিৰ মাজত সাদৃশ্য বিচাৰি পাইছিল। “ধোনী ফেক্টৰ”ৰ মাজতে আছে এক প্ৰকাৰৰ প্ৰত্যাহ্বান। ১০৮খন আসন লাভ কৰাৰ পিছতো চৰকাৰ গঠনৰ বাবে প্ৰয়োজনীয় ১১৮খন আসনৰ যাদুকৰী সংখ্যাত পিছ পৰি আছে টিভিকে। ফলত ৰাজ্যৰ ৰাজনীতি এতিয়া এক প্ৰকাৰৰ ‘ছুপাৰ অভাৰ’ পৰিস্থিতিৰ দিশে আগবাঢ়িছে, য’ত ক্ষমতাৰ চাবিকাঠি মিত্ৰতা আৰু আপোচৰ ওপৰত নিৰ্ভৰশীল।
