এই বছৰ বক্স অফিচত বহু ডাঙৰ বাজেটৰ বোলছবি ব্যৱসায়িকভাৱে সফল হৈছে। কিন্তু খৰচৰ তুলনাত লাভৰ হিচাপত সকলোকে আচৰিত কৰি তুলিছে মাত্ৰ ৭.৫ লাখ ডলাৰ বাজেটৰ এখন ছবিয়ে, যাৰ নাম অবচেশ্যন।
মাইকেল বা প্ৰজেক্ট হেইল মেৰীৰ দৰে বৃহৎ বাজেটৰ ব্লকবাষ্টাৰ ছবিসমূহক পিছ পেলাই এই বছৰৰ আটাইতকৈ লাভজনক ছবিৰ অভিলেখ এতিয়া এই ছবিখনৰ হাতত আছে। ইতিমধ্যে এই বোলছবিখনে নিজৰ বাজেটতকৈ ১০০ গুণতকৈও অধিক ধন উপাৰ্জন কৰিবলৈ সক্ষম হৈছে।
লেখক আৰু পৰিচালক কাৰি বাৰ্কাৰৰ স্বাধীন অৰ্থাৎ ইণ্ডিপেণ্ডেন্ট ধাৰাৰ হৰৰ ছবি অবসেশ্যন সম্ভৱতঃ এই বছৰৰ চিনেমাগৃহৰ আটাইতকৈ ডাঙৰ সফলতাৰ কাহিনী। চলিত মাহত মুক্তি পোৱা এই ছবিখনে যেন প্ৰতিদিনে বক্স অফিচত নিজৰ স্থিতি অধিক শক্তিশালী কৰি তুলিছে। মাত্ৰ ৭.৫ লাখ ডলাৰৰ বাজেটেৰে নিৰ্মাণ কৰা এই ছবিখনে সমগ্ৰ বিশ্বতে ইতিমধ্যে ৮০ মিলিয়ন ডলাৰ উপাৰ্জন কৰিছে। ইয়াৰ অৰ্থ হৈছে ছবিখনৰ লাভৰ হাৰ ১০ হাজাৰ শতাংশতকৈও অধিক। এই বছৰ লাভৰ হাৰৰ ক্ষেত্ৰত আন কোনো ছবিয়ে ইমান ডাঙৰ সফলতা লাভ কৰিব পৰা নাই।
মুক্তিৰ প্ৰথম সপ্তাহতে ছবিখনে উত্তৰ আমেৰিকাত ১৬ মিলিয়ন ডলাৰ উপাৰ্জন কৰিছিল, যাৰ পৰিমাণ দ্বিতীয় সপ্তাহত বৃদ্ধি পাই ২২ মিলিয়ন ডলাৰ হয়। অতি সীমিত সংখ্যক চিনেমাগৃহত মুক্তি লাভ কৰাৰ পাছতো ছবিখনে দেশৰ বাহিৰতো সুন্দৰ ব্যৱসায় কৰিছে। উত্তৰ আমেৰিকাৰ বাহিৰত ই ইতিমধ্যে ২১ মিলিয়ন ডলাৰ উপাৰ্জন কৰিছে।
অবচেশ্যনে এতিয়া ১০০ মিলিয়ন ডলাৰ উপাৰ্জনৰ লক্ষ্যৰ পিনে আগবাঢ়িছে। যদি এই সফলতা লাভ কৰে, তেন্তে পেৰানৰ্মেল এক্টিভিটি আৰু দ্য ব্লেয়াৰ উইচ প্ৰজেক্টৰ পিছত ১ মিলিয়ন ডলাৰতকৈ কম বাজেটত নিৰ্মিত এইখন হ’ব তৃতীয়খন ছবি, যিয়ে ১০০ মিলিয়ন ডলাৰ উপাৰ্জনৰ অভিলেখ গঢ়িব। ইয়াৰ বিপৰীতে মাইকেল ছবিয়ে এতিয়ালৈকে ৭৮৮ মিলিয়ন ডলাৰ উপাৰ্জন কৰিছে, যিটো ইয়াৰ বাজেটৰ মাত্ৰ ৫ গুণ। আনহাতে প্ৰজেক্ট হেইল মেৰী ছবিয়ে ৬৭৫ মিলিয়ন ডলাৰ উপাৰ্জন কৰিছে, যিটো ইয়াৰ বাজেটৰ প্ৰায় ৩ গুণ।
কাৰি বাৰ্কাৰে লিখা, পৰিচালনা কৰা আৰু সম্পাদনা কৰা এই ছবিখনত মাইকেল জনষ্টনে এটা মিউজিক ষ্ট’ৰৰ কৰ্মচাৰী বেয়াৰৰ চৰিত্ৰত অভিনয় কৰিছে। সি এটা অলৌকিক পুতলা কিনে, যিটোৱে তাক নিজৰ সৰুকালৰ বান্ধৱী নিকিক (ইন্দে নাভাৰেট) নিজৰ প্ৰেমত পেলাবলৈ সহায় কৰিব বুলি দাবী কৰা হয়। আৰু ইয়াৰ পিছৰ পৰাই আৰম্ভ হয় এক ভয়নক পৰিস্থিতি। যোৱা ১৫ মে’ত চিনেমাগৃহত মুক্তি পোৱাৰ পূৰ্বে টৰন্টো আন্তঃৰাষ্ট্ৰীয় চলচ্চিত্ৰ মহোৎসৱত অবচেশ্যনৰ প্ৰিমিয়াৰ হৈছিল। ছবিখনে সমালোচকসকলৰ পৰাও যথেষ্ট ইতিবাচক সঁহাৰি লাভ কৰিছে।
