আই পি এল ২০২৬ৰ কোৱালিফায়াৰ মেচৰ পূৰ্বে ৰাজস্থান ৰয়েলছৰ অধিনায়ক ৰিয়ান পৰাগ আৰু দলৰ যুৱ অ’পেনাৰ বৈভৱ সূৰ্যবংশীৰ এটা আমোদজনক ভিডিঅ’ ছ’চিয়েল মিডিয়াত দ্ৰুতগতিত ভাইৰেল হৈ পৰিছে।
বিমানবন্দৰত ৰেকৰ্ডিং কৰা এই ভিডিঅ’টোত পাপাৰাজীয়ে দুয়োজন তাৰকাক একেলগে ফটো এখনৰ বাবে পোজ দিবলৈ কৈছিল, যাৰ উত্তৰত অধিনায়ক পৰাগে হাঁহি হাঁহি উত্তৰ দিছিল, “আমি কোনো ফিল্মষ্টাৰ নহয়।” কাষতে থিয় হৈ থকা ১৫ বছৰীয়া বৈভৱে যিধৰণে প্ৰতিক্ৰিয়া দিলে সি বাতৰিৰ শিৰোনাম দখল কৰিলে।
দৰাচলতে ভাইৰেল ভিডিঅ’টোত দিয়া বক্তব্যৰ লগে লগে বৈভৱে ৰিয়ান পৰাগক যিদৰে চালে সেয়া ভাইৰেল হৈছে। ভিডিঅ’টোত বৈভৱে পৰাগলৈ কেই ছেকেণ্ডৰ বাবে ধেমেলীয়া অভিব্যক্তিৰে চাই থকা দেখা গৈছে। অনুৰাগীসকলে তেওঁৰ প্ৰতিক্ৰিয়া ভাল পালে, আৰু ক্লিপটো মিনিটৰ ভিতৰতে ভাইৰেল হৈ পৰিল। অনুৰাগীয়ে ধেমেলীয়া মিম বনাইছে, আনহাতে একাংশই কৈছে যে বৈভৱৰ এই প্ৰতিক্ৰিয়া সমগ্ৰ আই পি এলৰ আটাইতকৈ আমোদজনক মুহূৰ্ত।
এই ভিডিঅ’টো ৰাজস্থান ৰয়েলছে মুম্বাই ইণ্ডিয়ানছক পৰাস্ত কৰি আই পি এল ২০২৬ প্লে অফলৈ যোগ্যতা অৰ্জন কৰাৰ পিছত পোহৰলৈ আহিছে। ছিজনৰ মাজভাগত দলটোৱে ধাৰাবাহিক পৰাজয়ৰ সন্মুখীন হোৱাৰ বাবে ৰিয়ান পৰাগৰ অধিনায়কত্বক লৈ প্ৰশ্ন উত্থাপন হৈছিল যদিও টীম মেনেজমেন্টে তেওঁক সমৰ্থন কৰিছিল।
শেহতীয়াকৈ ৰাজস্থান ৰয়েলছৰ মুখ্য প্ৰশিক্ষক কুমাৰ ছাংগাকাৰাই ৰাজস্থানৰ অধিনায়ক ৰিয়ান পৰাগকো প্ৰশংসা কৰে। তেওঁ কয়, ‘যেতিয়া আমি ৰিয়ানক অধিনায়ক হিচাপে নিযুক্তি দিছিলো তেতিয়া আমি জানিছিলোঁ যে তেওঁ এই দলৰ নেতৃত্ব দিবলৈ উপযুক্ত ব্যক্তি।’ ছাংগাকাৰাই লগতে কয় যে ৰিয়ানে বছৰ বছৰ ধৰি ট্ৰলিঙৰ সন্মুখীন হৈ আহিছে, কিন্তু মানুহে তেওঁক ভালদৰে বুজি পোৱা নাই।
চলিত ছিজনত বৈভৱ সূৰ্যবংশীয়ে এটা শতক আৰু তিনিটা অৰ্ধশতককে ধৰি ১৪খন মেচত গড়ে ৪১.৬৪ আৰু ২৩২.২৭ ষ্ট্ৰাইক ৰেটত ৫৮৩ ৰান সংগ্ৰহ কৰি আক্ৰমণাত্মক বেটিং কৰি আহিছে। তেওঁৰ সৰ্বোত্তম স্ক’ৰ হৈছে ১০৩ ৰান। এই ছিজনত তেওঁ ৫৩টা ছয় মাৰিছে, যিটো আই পি এলৰ এটা সংস্কৰণত এজন ভাৰতীয়ৰ সৰ্বাধিক ছয়। ২০১২ চনত গেইলৰ ৫৯টা ছয়ৰ অভিলেখৰ পৰা তেওঁ মাত্ৰ সাতটা ছয়ৰ পিছত আছে।
শেহতীয়াকৈ বৈভৱে ইংলেণ্ডৰ কিংবদন্তি বেটছমেন কেভিন পিটাৰছনৰ ইউটিউব চেনেল দ্য চুইচত উপস্থিত হৈছিল। ভিডিঅ’ শ্বুটিঙৰ সময়ত পিটাৰচেনে বৈভৱক ৫০টা বলত ১০০ ৰান সংগ্ৰহ কৰিবলৈ প্ৰত্যাহ্বান জনায়। অৱশ্যে ১৫ বছৰীয়া বেটছমেনগৰাকীয়ে মাত্ৰ ২৫টা বলত লক্ষ্য অৰ্জন কৰি ইংলেণ্ডৰ প্ৰাক্তন অধিনায়কগৰাকীৰ শ্ব’ত এক নতুন অভিলেখ গঢ়িবলৈ সক্ষম হয়।
তেওঁ লগতে কয় যে তেওঁৰ লক্ষ্য কেৱল ৱেষ্ট ইণ্ডিজৰ কিংবদন্তি ক্ৰীছ গেইলৰ টি-২০ অভিলেখ ১৭৫* ভংগ কৰাই নহয়, এই ফৰ্মেটত দ্বিশতক অৰ্জন কৰা প্ৰথমজন বেটছমেন হোৱাটোও। পিটাৰচেনে যেতিয়া তেওঁক সুধিলে যে তেওঁ নিজৰ অৰ্ধশতক উদযাপন কৰি ভাল পায় নেকি, তেতিয়া সূৰ্য্যবংশীয়ে উত্তৰ দিলে, “নাই, ইমান নহয়।” ইয়াৰ পিছত তেওঁ কয়, “মই টি-২০ত ২০০ ৰান কৰিব বিচাৰো। মই গেইলৰ অভিলেখ ভংগ কৰিব বিচাৰো।”
গেইলে ২০১৩ চনৰ আই পি এলত পুনে ৱাৰিয়ৰ্ছ ইণ্ডিয়াৰ বিৰুদ্ধে ৰয়েল চেলেঞ্জাৰছ বেংগালুৰু (আৰ চি বি)ৰ হৈ ১৭৫* ৰান সংগ্ৰহ কৰিছিল। এই ইনিংছত তেওঁ ১৩টা চাৰি আৰু ১৭টা ছয়ৰ সহায়ত ৬৬টা বলত ২৬৫.১৫ ষ্ট্ৰাইক ৰেটত খেলিছিল। সেই মেচত তেওঁ মাত্ৰ ৩০টা বলত শতক অৰ্জন কৰিছিল, যিটো আজিও আই পি এলৰ আটাইতকৈ দ্ৰুততম শতক হৈয়ে আছে।
