কেৰালাত প্ৰাক্তন মুখ্যমন্ত্রী পিনাৰায়ী বিজয়ন আৰু তেওঁৰ কন্যাৰ সৈতে জড়িত বিভিন্ন স্থানত প্ৰৱৰ্তন সঞ্চালকালয় চমুকৈ ইডিয়ে চলোৱা অভিযানৰ পিছতে এক উত্তপ্ত পৰিস্থিতিৰ সৃষ্টি হৈছে। বুধবাৰে ইডিৰ বিষয়া কঢ়িয়াই নিয়া এখন বাহনৰ ওপৰত চিপিআইএমৰ কৰ্মীসকলে আক্ৰমণ চলায়। উত্তেজিত প্ৰতিবাদকাৰীসকলে ইডিৰ গাড়ীখন আগভেটি ধৰে আৰু ইয়াৰ সন্মুখৰ কাঁচ ভাঙি পেলায়। এই ঘটনাক কেন্দ্ৰ কৰি ৰাজ্যখনৰ ৰাজধানীত তীব্ৰ প্ৰতিবাদ আৰু আৰক্ষীৰ লাঠীচালনাৰ দৰে ঘটনা সংঘটিত হয়।
ইডিৰ দলটোত মহিলা বিষয়ায়ো আছিল আৰু এই উত্তপ্ত পৰিস্থিতিৰ মাজতে তেওঁলোকৰ বাহনখনক লক্ষ্য কৰি লোৱা হয়। আৰক্ষী আৰু কেন্দ্ৰীয় সুৰক্ষা বাহিনীয়ে পৰিস্থিতি নিয়ন্ত্ৰণ কৰিবলৈ যথেষ্ট কষ্ট কৰিবলগীয়া হয়। প্ৰ প্রাক্তন মুখ্যমন্ত্রীজনৰ তিৰুৱনন্তপুৰমৰ বৰ্তমানৰ বাসস্থান, কান্নুৰত থকা পৈতৃক গৃহ আৰু তেওঁৰ জোঁৱায়েক তথা প্ৰাক্তন মন্ত্ৰী মহম্মদ ৰিয়াছৰ কোঝিকোড়ৰ বাসস্থানকে ধৰি কেৰালাৰ ১০টা স্থানত ইডিয়ে এই অভিযান চলাইছিল। এই অভিযানৰ সময়ত বিজয়ন আৰু তেওঁৰ পৰিয়ালৰ সদস্যসকল ঘৰৰ ভিতৰতে আছিল আৰু বাহিৰত চিপিআইএমৰ শ শ কৰ্মীয়ে ইডিৰ বিৰুদ্ধে শ্লোগান দিছিল। একাংশ প্ৰতিবাদকাৰীয়ে সুৰক্ষা কৰ্মীসকললৈ প্লাষ্টিকৰ বটল, হেলমেট আৰু শিলগুটিও নিক্ষেপ কৰে, যদিও পিছত দলৰ জ্যেষ্ঠ নেতাসকলে পৰিস্থিতি নিয়ন্ত্ৰণ কৰে।
পিনাৰায়ী বিজয়নৰ কন্যা টি বীণাৰ মালিকানাধীন এক্সালজিক চিলিউচনছ নামৰ কোম্পানীটোক কোচিন মিনাৰেলছ এণ্ড ৰুটাইল লিমিটেড চমুকৈ চিএমআৰএল নামৰ কোম্পানীটোৱে কোনো সেৱা নোলোৱাকৈয়ে ১.৭২ কোটি টকা আদায় দিয়াৰ অভিযোগ উত্থাপন হৈছে। ২০১৮ আৰু ২০১৯ চনৰ ভিতৰত হোৱা এই লেনদেনৰ গোচৰটোক লৈয়ে ইডিয়ে এই পদক্ষেপ গ্ৰহণ কৰিছে। কেৰালা উচ্চ ন্যায়ালয়ে চিএমআৰএলে ইডিৰ কাৰ্যধাৰা খাৰিজ কৰিবলৈ কৰা আবেদন অগ্ৰাহ্য কৰাৰ ঠিক পিছদিনাই এই অভিযান চলোৱা হয়।
আনহাতে চিপিআইএমৰ সাধাৰণ সম্পাদক এম এ বেবিয়ে ইডিৰ এই অভিযানক সম্পূৰ্ণ ৰাজনৈতিকভাৱে প্ৰেৰিত বুলি অভিহিত কৰিছে আৰু ইয়াক এক জঘন্য আক্ৰমণ বুলি আখ্যা দিছে। তেওঁ কয় যে এই অভিযানৰ আঁৰত থকা ৰাজনৈতিক উদ্দেশ্য তেওঁলোকে ৰাইজৰ আগত প্ৰমাণ কৰিব। ইফালে পিনাৰায়ী বিজয়নে পূৰ্বতেই তেওঁৰ কন্যাৰ বিৰুদ্ধে অনা সকলো অভিযোগ অস্বীকাৰ কৰি আহিছে আৰু ইয়াক তেওঁৰ ভাবমূৰ্তি নষ্ট কৰাৰ চেষ্টা বুলি কৈছে। উল্লেখ্য যে অলপতে অনুষ্ঠিত হোৱা কেৰালা বিধানসভা নিৰ্বাচনত কংগ্ৰেছ নেতৃত্বাধীন ইউডিএফৰ হাতত পৰাজিত হৈ বিজয়ন শাসনৰ পৰা আঁতৰি যাবলগীয়া হৈছিল আৰু বৰ্তমান তেওঁ কেৰালা বিধানসভাৰ বিৰোধী দলপতি হিচাপে কাৰ্যনিৰ্বাহ কৰি আছে।
