ভাৰতৰ পৰা আম আমদানিৰ ক্ষেত্ৰত পুনৰ কঠোৰ ব্যৱস্থা গ্ৰহণ কৰিছে জাপানে। প্ৰায় ২০ বছৰৰ মূৰত পুনৰ ভাৰতীয় আমৰ ওপৰত নিষেধাজ্ঞা জাৰি কৰিছে দেশৰ প্ৰশাসনে। ইয়াৰ ফলত ভাৰতীয় আম ৰপ্তানি উদ্যোগত উদ্বেগৰ সৃষ্টি হৈছে। ইয়াৰ ফলত আলফনছো, কেশৰ, লেংৰা আৰু বংগনাপল্লী জাতৰ আম ৰপ্তানিত প্ৰভাৱ পৰিব বুলি ধাৰণা কৰা হৈছে।
জানিব পৰা মতে, জাপানৰ খাদ্য আৰু কৃষি সুৰক্ষা প্ৰাধিকৰণে ভাৰতীয় আমত পোক-পৰুৱাৰ লগত জড়িত সমস্যাৰ কিছু ইংগিত পোৱাৰ পিছতে এই সিদ্ধান্ত গ্ৰহণ কৰিছে। জাপানে দীৰ্ঘদিন ধৰি কৃষিজাত সামগ্ৰীৰ ক্ষেত্ৰত অতি কঠোৰ সুৰক্ষা নীতি মানি চলি আহিছে। বিশেষকৈ ফলমূলৰ দৰে ক্ষতিকাৰক পোক-পৰুৱা যাতে দেশৰ কৃষি খণ্ডত প্ৰৱেশ কৰিব নোৱাৰে তাৰ প্ৰতি বিশেষ সাৱধানতা অৱলম্বন কৰে। সেইবাবেই ভাৰতৰ পৰা ৰপ্তানিৰ পূৰ্বে আমৰ বীজাণুনাশক আৰু ফিউমিগেছন প্ৰক্ৰিয়াটো বাধ্যতামূলক কৰা হৈছিল।
প্ৰতিবেদন অনুসৰি চলিত বৰ্ষৰ মাৰ্চ মাহত জাপানৰ এটা পৰিদৰ্শনকাৰী দলে ভাৰতৰ কিছুমান ভেপাৰ হিট ট্ৰিটমেন্ট কেন্দ্ৰ পৰিদৰ্শন কৰিছিল। সেই সময়ত বীজাণুনাশক আৰু ফিউমিগেছন ব্যৱস্থাত কিছু ত্ৰুটি পোৱাৰ অভিযোগ উত্থাপন হৈছিল। ইয়াৰ পিছত জাপানৰ যোকোহামা উদ্ভিদ সুৰক্ষা সংস্থাই সিদ্ধান্ত লয় যে ২০২৬ চনৰ ২৫ মাৰ্চৰ পিছত ভাৰতে প্ৰদান কৰা পৰিদৰ্শনৰ প্ৰমাণ পত্ৰ থকা আম আৰু গ্ৰহণ কৰা নহ’ব।
ইয়াৰ পূৰ্বে ১৯৮৬ চনত জাপানে ফলৰ মাখিৰ সংক্ৰমণৰ অভিযোগত ভাৰতীয় আমৰ ওপৰত নিষেধাজ্ঞা আৰোপ কৰিছিল। পিছলৈ প্ৰায় দুটা দশকৰ দীঘলীয়া সময়ৰ অন্তত ২০০৬ চনত এই নিষেধাজ্ঞা উঠাই লোৱা হয় আৰু কিছুমান নিয়ম মানি পুনৰ ৰপ্তানি আৰম্ভ হয়।
যদিও জাপান ভাৰতীয় আমৰ সৰ্ববৃহৎ বজাৰ নহয়, তথাপিও এই সিদ্ধান্তক ৰপ্তানিকাৰীসকলৰ বাবে এক ডাঙৰ বিপৰ্যয় হিচাপে গণ্য কৰা হৈছে। কাৰণ জাপানত ভাৰতীয় প্ৰিমিয়াম আমৰ বিশেষ চাহিদা আছে। তাৰ উপৰি অত্যধিক গৰম আৰু পৰিবহণ ব্যয় বৃদ্ধিৰ বাবে ইতিমধ্যে ৰপ্তানিকাৰীসকল চাপত পৰিছিল।
