বিবাহ বিচ্ছেদৰ বাবে আবেদন দাখিল কৰাৰ ২৩ বছৰ পিছত ব্ৰিটেইনত থকা ভাৰতীয় মূলৰ এগৰাকী মহিলাই লাভ কৰিছে ৮৫ কোটি টকা। ২০০২ চনৰ পৰা আৰম্ভ হৈছিল এই ঘটনা। বৰ্ষা গোহিলে ব্যভিচাৰ আৰু অযুক্তিকৰ আচৰণৰ কাৰণ দৰ্শাই স্বামী ভদ্ৰেশ গোহিলৰ সৈতে বিবাহ বিচ্ছেদৰ গোচৰ দাখিল কৰিছিল।
দুটা দশক ধৰি চলি থকা ব্ৰিটেইনৰ এই বিতৰ্কিত গোচৰটোত অৱশেষত আদালতে বৰ্ষাক ৬৬ লাখ পাউণ্ড (৮৫ কোটি টকা) প্ৰাপ্য হিচাপে দিয়াৰ ৰায় দিছে। গোচৰ আৰম্ভ হোৱাৰ সময়ত গোহিল দম্পতীৰ তিনিটা সন্তান আছিল। সেই সময়ত টকা-পইচাও ভাগ কৰা হৈছিল। সেই সময়ত বৰ্ষাই ৩.৫ কোটি টকা আৰু এখন পৰিয়ালৰ গাড়ী ভাগ হিচাপে পাইছিল।
কিন্তু তেওঁৰ সন্দেহ হৈছিল যে স্বামীৰ সম্পত্তিৰ প্ৰকৃত পৰিমাণ আচলতে বহুত বেছি, যিটো তেওঁ লুকুৱাই ৰাখিছিল। বহু বছৰৰ পাছত ভদ্ৰেশ ধন সৰবৰাহৰ গোচৰত তদন্তৰ আওতালৈ আহিছিল।
তদন্তকাৰীয়ে দাবী কৰিছে যে ভদ্ৰেশে বিদেশত বিভিন্ন আৰ্থিক অনিয়ম, প্ৰৱঞ্চনা আৰু ধন সৰবৰাহ সংঘটিত কৰিছিল। দীৰ্ঘদিনীয়া তদন্তৰ অন্তত ২০১১ চনত তেওঁক দহ বছৰৰ কাৰাদণ্ড বিহা হয়। সেই তদন্তৰ সময়ত দেখা যায় যে ভদ্ৰেশ আচলতে কোটি কোটি টকাৰ মালিক আছিল, যিটো বিবাহ বিচ্ছেদৰ সময়ত পোহৰলৈ অহা নাছিল।
ভদ্ৰেশে অবৈধভাৱে বিপুল পৰিমাণৰ ধন লাভ কৰিছিল। ইয়াৰে ২.৮ কোটি পাউণ্ড তদন্তকাৰীয়ে জব্দ কৰে। ফলত বৰ্ষাই যি দাবী কৰি আহিছিল সেয়া প্ৰমান হ’ল আৰু তেওঁৰ পাবলগীয়া ধনৰ পৰিমাণ যথেষ্ট বৃদ্ধি পালে।
২০১৫ চনত দেশখনৰ উচ্চতম ন্যায়ালয়ে গোহিল দম্পতীহালৰ বিবাহ বিচ্ছেদৰ ফাইল পুনৰ খোলাৰ অনুমতি দিছিল। চৰকাৰৰ দাবী আছিল অপৰাধৰ জৰিয়তে উপাৰ্জন কৰা সকলো ধন জব্দ কৰিব লাগে। আনহাতে, বৰ্ষাই ওলোটাই দাবী কৰিলে যে এই ধনৰ কিছু অংশ পৰিয়ালৰ ব্যৱসায়ৰ পৰা পোৱা আয়। গতিকে তেওঁৰ এটা ভাগ থাকিব লাগে।
ইপিনে, ভদ্ৰেশে সদায় কৈ আহিছে যে এই সকলোবোৰ সম্পত্তি তেওঁৰ একেবাৰেই নহয়। অৱশেষত আদালতে সকলো পক্ষৰ শুনানি গ্ৰহণ কৰি ৰায় দিয়ে যে ভদ্ৰেশৰ মুঠ সম্পত্তিৰ এটা অংশ বৈধ আৰু বৰ্ষাই সেই সম্পত্তি লাভ কৰিব লাগে।
