ফুটবল বিশ্বকাপ আৰম্ভ হ‘বলৈ আৰু বেছি দিন নাই। বিশ্বকাপৰ জ্বৰ ক্ৰমান্বয়ে চাৰিওফালে বিয়পি পৰিছে। এনে সময়তে বাংলাদেশৰ শ্বেৰপুৰত এক আচৰিত ঘটনা দেখিবলৈ পোৱা গৈছে। এজন যুৱকে গাখীৰেৰে স্নান কৰি আৰ্জেণ্টিনাৰ শিবিৰ এৰি ব্ৰাজিলৰ সমৰ্থক হৈ পৰিছে। এই ঘটনাৰ ছবি বৰ্তমান সকলোৰে মাজত বিয়পি পৰিছে আৰু ই চৰ্চাৰ বিষয় হৈ পৰিছে।
জানিব পৰা মতে, এই ঘটনাটো যোৱা সোমবাৰে নিশা সংঘটিত হৈছে। শ্বেৰপুৰৰ চাপাতলি অঞ্চলৰ এখন নিচামুক্তি কেন্দ্ৰৰ মুধচত দেৱপ্ৰিয় দাস নামৰ যুৱকজনে প্ৰায় দহ লিটাৰ গাখীৰেৰে স্নান কৰে। সেই সময়ত তেওঁৰ লগত প্ৰায় কুৰিৰ পৰা পঁচিশজন ব্ৰাজিলৰ সমৰ্থক উপস্থিত আছিল। তেওঁলোকৰ সন্মুখতেই যুৱকজনে এই কাণ্ড সংঘটিত কৰে।
দেৱপ্ৰিয়ৰ বিষয়ে জানিবলৈ দি তাত উপস্থিত থকা মহম্মদ আলিম নামৰ এজন ব্ৰাজিলৰ সমৰ্থকে কয় যে দেৱপ্ৰিয়ই দীৰ্ঘদিন ধৰি লিঅ‘নেল মেছিক সমৰ্থন কৰি আহিছিল। মেছিৰ বিদায়ী বিশ্বকাপৰ আগতেই তেওঁ নিজৰ প্ৰিয় খেলুৱৈৰ দলটোৰ পৰা সমৰ্থন আঁতৰাই আনিলে। এতিয়াৰ পৰা তেওঁ ব্ৰাজিলৰ সমৰ্থক। ইমান দিনে আৰ্জেণ্টিনাক সমৰ্থন কৰি তেওঁ যেন পাপহে কৰিছিল, আৰু সেই পাপ খণ্ডন কৰিবলৈকে তেওঁ গাখীৰেৰে গা ধুই প্ৰায়শ্চিত্ত কৰিলে।
ইফালে বাংলাদেশৰ সংবাদ মাধ্যমৰ আগত দেৱপ্ৰিয়ই কয় যে আৰ্জেণ্টিনা দলটোৰ ওপৰত তেওঁৰ আৰু কোনো বিশ্বাস নাই, কাৰণ দলটোত এতিয়া আৰু বেছি নামজ্বলা খেলুৱৈ নাই। আনহাতে ব্ৰাজিলৰ ফুটবলৰ কলাত্মক দিশটোৱে তেওঁক বাৰুকৈয়ে আকৰ্ষিত কৰে। নেইমাৰৰ খেলো তেওঁৰ বহুত ভাল লাগে। সেয়েহে বিশ্বকাপৰ আগতে তেওঁ আৰ্জেণ্টিনা এৰি ব্ৰাজিলৰ সমৰ্থক হৈ পৰিল। গা ধোৱাৰ পিছত ব্ৰাজিলৰ সমৰ্থকসকলে তেওঁক ডিঙিত মালা পিন্ধাই আদৰণি জনায়। উল্লেখযোগ্য যে বিশ্বকাপ ফুটবলত এই উপমহাদেশৰ কোনো দলে অংশগ্ৰহণ নকৰে বাবে প্ৰতিবাৰেই মানুহে বিভিন্ন দেশৰ দলক সমৰ্থন কৰে। এই সমৰ্থনক লৈ বহু সময়ত কাজিয়া বা মাৰপিটৰ দৰে ঘটনাও সংঘটিত হয়। বাংলাদেশো ইয়াৰ ব্যতিক্ৰম নহয় আৰু দেৱপ্ৰিয়ৰ এই ঘটনাই পুনৰ প্ৰমাণ কৰিলে যে বাংলাদেশৰ মানুহো ফুটবলৰ উন্মাদনাত ডুবি আছে।
