স্বামীৰ সৈতে মধুচন্দ্ৰিকালৈ গৈ এগৰাকী নৱবিবাহিতা মহিলাৰ কৰুণ মৃত্যু ঘটে। দিল্লীত তথ্যপ্ৰযুক্তি খণ্ডত কৰ্মৰত সাতাইশ বছৰীয়া এগৰাকী যুৱতীৰ মৃতদেহ উত্তৰাখণ্ডৰ মুচৌৰীৰ এটা আলহীঘৰৰ পৰা উদ্ধাৰ কৰা হৈছে। সোমবাৰে পুৱা আলহীঘৰৰ কোঠাত ৰাধা নামৰ যুৱতীগৰাকীৰ বিবস্ত্ৰ আৰু ৰক্তাক্ত মৃতদেহ উদ্ধাৰ হয়। এই ঘটনাক লৈ আৰক্ষীয়ে অস্বাভাৱিক মৃত্যুৰ গোচৰ ৰুজু কৰি তদন্ত আৰম্ভ কৰিছে। এয়া কেৱল দুৰ্ঘটনা নে নিৰ্মম হত্যাকাণ্ড সেয়া আৰক্ষীয়ে গভীৰভাৱে পৰীক্ষা কৰি আছে।
যোৱা বছৰৰ নৱেম্বৰ মাহত ৰাধা গায়ত্ৰীৰ সৈতে সৌম্য শ্ৰীচৰণৰ বিবাহ সম্পন্ন হৈছিল। দুয়োগৰাকী ব্যক্তি মূলতঃ অন্ধ্ৰপ্ৰদেশৰ বাসিন্দা। ৰাধাই দিল্লীত কাম কৰিছিল যদিও স্বামী সৌম্যই কৰ্মসূত্ৰে পুনেত বাস কৰিছিল। কেইদিনমান আগতে দুয়ো মুচৌৰীলৈ ফুৰিবলৈ গৈছিল আৰু চৈধ্য জুন তাৰিখে তেওঁলোকে টিপৰি ধাৰৰ ওচৰৰ এটা আলহীঘৰত আশ্ৰয় লৈছিল। স্বামী সৌম্যই জনোৱা অনুসৰি দেওবাৰে নিশা প্ৰায় তিনি বজালৈকে দুয়োৱে একেলগে সুৰাপান কৰিছিল আৰু তাৰ পিছত শুই পৰিছিল। সোমবাৰে পুৱা সাৰ পাই তেওঁ দেখে যে পত্নী ৰাধা মজিয়াত উলংগ অৱস্থাত পৰি আছে আৰু তেওঁৰ নাকৰ পৰা তেজ ওলাই আছিল।
লগে লগে স্থানীয় আৰক্ষীক খবৰ দিয়া হয়। আৰক্ষীয়ে মৃতদেহটো উদ্ধাৰ কৰি মৃত্যুৰ প্ৰকৃত কাৰণ জানিবলৈ মৰণোত্তৰ পৰীক্ষাৰ বাবে প্ৰেৰণ কৰে। আনহাতে আৰক্ষীয়ে জানিবলৈ দিয়া মতে মহিলাগৰাকী যি ঠাইত পৰি আছিল সেই ঠাইখিনি প্ৰস্ৰাৱেৰে উপচি পৰিছিল। বিচনাৰ চাদৰতো তেজৰ দাগ পোৱা গৈছে আৰু লগতে সুৰাৰ দুটা খালী বটল উদ্ধাৰ কৰা হৈছে। প্ৰাথমিকভাৱে আৰক্ষীয়ে অস্বাভাৱিক মৃত্যুৰ গোচৰ ৰুজু কৰি তদন্ত আৰম্ভ কৰিলেও স্বামী সৌম্যক আৰক্ষীয়ে সন্দেহৰ আৱৰ্তত ৰাখিছে। তেওঁক জেৰা কৰি তদন্তকাৰী বিষয়াসকলে এই ৰহস্যময় ঘটনাৰ সমাধান কৰিবলৈ চেষ্টা অব্যাহত ৰাখিছে।
