পাক সেনাৰ বিৰুদ্ধে তীব্ৰ আন্দোলন গঢ়ি তোলা বালোচিস্তান বৰ্তমান সময়ত বিদ্ৰোহৰ জুইত জ্বলি উঠিছে। পাকিস্তানৰ পৰা সম্পূৰ্ণৰূপে সুকীয়া হোৱাৰ দাবীত দীৰ্ঘদিন ধৰি তাত ব্যাপক প্ৰতিবাদ চলি আহিছে। এই বিদ্ৰোহ দমন কৰাৰ নামত পাকিস্তানৰ সেনাই সাধাৰণ ৰাইজৰ ওপৰত চলোৱা অকথ্য নিৰ্যাতনৰ খবৰ সঘনাই প্ৰকাশ পাইছে।
ইয়াৰ মাজতে বালোচ স্বাধীনতা আন্দোলনৰ অন্যতম জনপ্ৰিয় নেত্ৰী তথা বালোচ সিংহী হিচাপে পৰিচিত মাহৰং বালোচক যাৱজ্জীৱন কাৰাদণ্ডৰ শাস্তি বিহিছে পাকিস্তানৰ শ্বাহবাজ শ্বৰীফৰ চৰকাৰে। পেচাত এগৰাকী চিকিৎসক মাহৰং বালোচ আছিল এগৰাকী আগশাৰীৰ মানৱ অধিকাৰ কৰ্মী আৰু বালোচ য়াকজেহতি কমিটিৰ প্ৰধান নেত্ৰী। বিগত প্ৰায় এটা দশক ধৰি বালোচিস্তানত পাক সেনাৰ বৰ্বৰতাৰ বিৰুদ্ধে তেওঁ অহৰহ সৰৱ হৈ আছিল। কোৱেটাৰ এখন সন্ত্ৰাসবাদ বিৰোধী আদালতে সোমবাৰে মাহৰঙৰ লগতে তেওঁৰ আন দুজন সতীৰ্থকো যাৱজ্জীৱন কাৰাদণ্ডৰ ৰায় শুনায়। পাকিস্তানৰ স্থানীয় সংবাদ মাধ্যমৰ খবৰ অনুসৰি সন্ত্ৰাসবাদী কাৰ্যকলাপৰ সৈতে জড়িত থকাৰ অভিযোগতে তেওঁলোকক এই শাস্তি প্ৰদান কৰা হৈছে। আদালতৰ এই সিদ্ধান্তক বালোচ সংগঠনে তীব্ৰ গৰিহণা দিছে আৰু এই ঘটনাৰ পিছত বালোচিস্তানত নতুনকৈ অশান্তি বৃদ্ধি পোৱাৰ সম্ভাৱনা প্ৰকট হৈ পৰিছে। ইয়াৰ পূৰ্বেও পাক সেনাৰ বিৰুদ্ধে প্ৰতিবাদ সাব্যস্ত কৰাৰ বাবে মাহৰঙক কেইবাবাৰো কাৰাগাৰলৈ প্ৰেৰণ কৰা হৈছিল।
পাক সেনাৰ এই অমানুষিক নিৰ্যাতনৰ প্ৰতিবাদতে বালোচিস্তানত বালোচ লিবাৰেচন আৰ্মী নামৰ এটা সশস্ত্ৰ সংগঠনৰ সৃষ্টি হৈছে। এই বাহিনীটোক মষিমূৰ কৰিবলৈ পাক সেনাই নিৰ্যাতনৰ সকলো সীমা অতিক্ৰম কৰিছে আৰু ইয়াৰ বিপৰীতে বিদ্ৰোহী সংগঠনটোৱেও তীব্ৰ প্ৰত্যাক্ৰমণ চলাইছে। বৰ্তমান সময়ত পাকিস্তান চৰকাৰ আফগানিস্তানৰ সৈতেও সীমান্তৰ সংঘাতত লিপ্ত হৈ আছে। একে সময়তে তেহৰিক ই তালিবান নামৰ আন এটা বিদ্ৰোহী সংগঠনেও পাকিস্তান চৰকাৰৰ নিদ্ৰা হৰণ কৰিছে। এই জটিল পৰিস্থিতিৰ পূৰ্ণ সুযোগ গ্ৰহণ কৰি বালোচ সংগঠনসমূহেও এতিয়া পাক সেনাৰ ওপৰত নিজৰ আক্ৰমণৰ জোৰ বৃদ্ধি কৰি তুলিছে।
