টেবল টেনিছ খেলৰ সৈতে যাৰ নাম ওতপ্ৰোতভাৱে জড়িত হৈ পৰিছে সেইগৰাকী প্ৰসিদ্ধ তাৰকা খেলুৱৈ মণিকা বাট্ৰাক বাদ দিয়া হৈছে আগন্তুক এছিয়াড আৰু কমনৱেলথ টেবল টেনিছ চেম্পিয়নশ্বিপৰ মূল দলৰ পৰা। বৰ্তমান তেওঁক কেৱল সংৰক্ষিত খেলুৱৈৰ তালিকাতহে স্থান দিয়া হৈছে। এই অনিয়মৰ বিৰুদ্ধে ক্ষুব্ধ হৈ অভিজ্ঞ খেলুৱৈগৰাকীয়ে এতিয়া পোনপটীয়াকৈ চৰকাৰৰ ওচৰ চাপিছে। দল নিৰ্বাচন প্ৰক্ৰিয়াত ব্যাপক অস্বচ্ছতাৰ অভিযোগ উত্থাপন কৰি মণিকাই দাবী কৰিছে যে কি যুক্তিত তেওঁক মূল দলৰ পৰা বাদ দিয়া হ’ল তাৰ স্পষ্ট উত্তৰ কৰ্তৃপক্ষই দিব লাগিব। ইয়াৰ উপৰিও টেবল টেনিছৰ নিৰ্বাচনী কমিটিৰ যোগ্যতা সন্দৰ্ভতো এতিয়া ডাঙৰ প্ৰশ্ন উত্থাপন কৰিছে এইগৰাকী জ্যেষ্ঠ খেলুৱৈয়ে।
বুধবাৰে মণিকা বাট্ৰাই সংবাদ মাধ্যমৰ আগত প্ৰকাশ কৰে যে তেওঁক দলৰ পৰা আঁতৰাই ৰখাৰ সঠিক কাৰণ আৰু যুক্তি কৰ্তৃপক্ষই স্পষ্ট কৰিব লাগিব। যদিহে উপযুক্ত তথ্য প্ৰমাণ আৰু কাৰণ দৰ্শাই এই প্ৰশ্নৰ উত্তৰ দিয়া নহয় তেন্তে তেওঁ টেবল টেনিছ ফেডাৰেচনৰ বিৰুদ্ধে আইনি পদক্ষেপ গ্ৰহণ কৰিবলৈ বাধ্য হ’ব বুলি তীব্ৰ হুংকাৰ প্ৰদান কৰিছে। একে সময়তে খেলুৱৈগৰাকীয়ে এই ক্ষেত্ৰত দেশৰ প্ৰধানমন্ত্ৰী নৰেন্দ্ৰ মোদী আৰু ক্ৰীড়ামন্ত্ৰী মনসুখ মাণ্ডব্যৰ জৰুৰী হস্তক্ষেপ কামনা কৰিছে। এক বিবৃতিত মণিকাই স্পষ্ট কৰি দিয়ে যে বহুতে হয়তো ভাবিব পাৰে তেওঁ এতিয়া এছিয়াডৰ দলত সোমাবলৈ জোৰ জুলুম কৰিছে কিন্তু কথাটো তেনে নহয়। তেওঁ ইতিমধ্যে ঘোষণা কৰা দলটোৰ কোনো সালসলনি নিবিচাৰে কিন্তু তেওঁক কিয় মূল দলত স্থান দিয়া নহ’ল তাৰ জবাবদিহি বিচাৰিছে।
মণিকাই নিজৰ অধিকাৰৰ বাবে যুঁজ দিয়াৰ লগতে বিগত এছিয়াডত দেশৰ হৈ ঐতিহাসিক পদক অৰ্জন কৰা ঐহিকা মুখোপাধ্যায়ৰ হৈয়ো মাত মাতিছে। তেওঁ প্ৰশ্ন উত্থাপন কৰিছে যে দেশৰ বাবে গৌৰৱ কঢ়িয়াই অনা এনে এগৰাকী সফল খেলুৱৈক এইবাৰ কিয় দলৰ পৰা সম্পূৰ্ণৰূপে বাদ দিয়া হ’ল। তেওঁৰ মতে দেশৰ হৈ পদক জয় কৰা খেলুৱেৰ সৈতে যদি এনেধৰণৰ দুৰ্যৱহাৰ কৰা হয় তেন্তে সমগ্ৰ নিৰ্বাচন প্ৰক্ৰিয়াটোৰ ওপৰতে প্ৰশ্ন উত্থাপন হোৱাটো স্বাভাৱিক। এই নিৰ্বাচক কমিটিৰ সদস্যসকলে নিজে কেইখন অলিম্পিক বা এছিয়াড খেলিছে বুলিও তীব্ৰ কটাক্ষ কৰে কমনৱেলথত সোণৰ পদক বিজয়ী মণিকাই।
মন কৰিবলগীয়া যে এইবাৰ এছিয়াডৰ পুৰুষৰ দলত মানব ঠক্কৰ, মনুশ শাহ, হৰমিত দেশাই, পায়াস জৈন আৰু গণশেখৰন সাথিয়ানক অন্তৰ্ভুক্ত কৰা হৈছে। এই দলটোৰ সংৰক্ষিত খেলুৱৈ হিচাপে ৰখা হৈছে অংকুৰ ভট্টাচাৰ্য আৰু ৰণিত ভঞ্জক। আনহাতে মহিলাৰ দলটোত সুতীৰ্থা আৰু চিণ্ড্ৰেলাৰ উপৰিও শ্ৰীজা আকুলা, দিয়া চিতালে আৰু যশস্বিনী ঘোৰপৰে স্থান লাভ কৰিছে। আন এগৰাকী জ্যেষ্ঠ খেলুৱৈ স্বস্তিকা ঘোষৰ সৈতে মণিকাক সংৰক্ষিত তালিকাত ৰখা হৈছে যদিও ঐহিকা মুখোপাধ্যায়ে কোনো এখন তালিকাতে স্থান লাভ কৰিবলৈ সক্ষম নহ’ল।
