বিশ্বকাপ ফুটবল প্ৰতিযোগিতাৰ মাজতেই ক্ৰীড়াপ্ৰেমীসকলৰ বাবে পোহৰলৈ আহিছে এক বিশেষ খবৰ। প্ৰাপ্ত তথ্য অনুসৰি, পৰ্তুগালৰ ফুটবল তাৰকা ক্ৰিষ্টিয়ানো ৰোনাল্ডোৱে বিশ্বকাপৰ সামৰণি পৰাৰ পাছতেই তেওঁৰ দীৰ্ঘদিনীয়া প্ৰেমিকা জৰ্জিনা ৰড্ৰিগেজৰ সৈতে আনুষ্ঠানিকভাৱে বিবাহপাশত আৱদ্ধ হোৱাৰ পূৰ্ণ সম্ভাৱনা আছে। স্পেইনৰ জনপ্ৰিয় আলোচনী ‘হোলা‘ই প্ৰকাশ কৰা এক প্ৰতিবেদনৰ মতে, আগন্তুক ছেপ্টেম্বৰ মাহত দুয়োগৰাকী তাৰকাই যুগ্ম জীৱনৰ পাতনি মেলিব পাৰে আৰু ইতিমধ্যে বিবাহ অনুষ্ঠানৰ পৰিকল্পনাও প্ৰায় চূড়ান্ত হৈ উঠিছে।
প্ৰায় এক দশক ধৰি একেলগে বসবাস কৰি অহা ৰোনাল্ডো আৰু জৰ্জিনা ২০১৬ চনৰ পৰা প্ৰেমৰ সম্পৰ্কত আৱদ্ধ হৈ আছে। তেওঁলোকৰ সংসাৰত বৰ্তমান পাঁচগৰাকী সন্তান আছে, যাৰ ভিতৰত দুগৰাকী সন্তানৰ মাতৃ হৈছে জৰ্জিনা। অনুৰাগীসকলৰ মাজত দীৰ্ঘদিন ধৰি তেওঁলোকৰ বিবাহক লৈ ব্যাপক উৎকণ্ঠা বিৰাজ কৰি আহিছিল। যোৱা বৰ্ষৰ আগষ্ট মাহত ৪১ বছৰীয়া পৰ্তুগীজ তাৰকাগৰাকীয়ে জৰ্জিনাক আনুষ্ঠানিকভাৱে বিয়াৰ প্ৰস্তাৱ দিছিল। জৰ্জিনায়ো সামাজিক মাধ্যমৰ জৰিয়তে এই প্ৰস্তাৱত সন্মতি প্ৰদান কৰাৰ কথা সদৰী কৰাৰ লগতে ৰোনাল্ডোৱে উপহাৰ হিচাপে প্ৰদান কৰা বহুমূলীয়া হীৰাৰ আঙঠিৰ আলোকচিত্ৰও প্ৰকাশ কৰিছিল।
পূৰ্বে এক সাক্ষাৎকাৰত ৰোনাল্ডোৱে ধেমালিৰ ছলেৰে মন্তব্য কৰিছিল যে তেওঁ বিশ্বকাপৰ পাছত বিবাহপাশত আৱদ্ধ হ‘ব বিচাৰে আৰু বিশ্বকাপৰ ট্ৰফী হাতত লৈ বিয়া কৰাবলৈ যোৱাৰ আশা পুহি ৰাখিছে। ফুটবল জীৱনৰ প্ৰায় শেষ পৰ্যায়ত উপনীত হোৱা তাৰকাগৰাকীৰ এই মন্তব্যই এতিয়া সংবাদ মাধ্যমত পুনৰ চৰ্চা লাভ কৰিছে।
বৰ্তমানলৈকে ৰোনাল্ডো বা জৰ্জিনা কোনেও স্পেনিছ আলোচনীখনৰ এই প্ৰতিবেদনৰ সন্দৰ্ভত কোনো আনুষ্ঠানিক প্ৰতিক্ৰিয়া প্ৰকাশ কৰা নাই বা খবৰটোক অস্বীকাৰো কৰা নাই। তেওঁলোকৰ এই নীৰৱতাই সংবাদ মাধ্যমত প্ৰকাশিত খবৰটোৰ সত্যতাক অধিক ঘনীভূত কৰি তুলিছে আৰু ই ফুটবল অনুৰাগীসকলৰ মাজত নতুন উন্মাদনাৰ সৃষ্টি কৰিছে। বিশ্বকাপৰ ব্যস্ততাৰ অন্ত পৰাৰ পাছত এই চৰ্চিত যুটীটোৱে বিবাহৰ আনুষ্ঠানিক দিন ঘোষণা কৰিব নে নাই, সেয়া পৰৱৰ্তী সময়ত লক্ষ্যণীয় হ‘ব।
