বিশ্বকাপৰ স্বপ্নভংগ ভাৰতীয় মহিলা দলৰ; অষ্ট্ৰেলিয়াৰ হাতত পৰাস্ত হৈ গ্ৰুপৰ পৰাই ল’লে বিদায়

গুৰুত্বপূৰ্ণ মেচখনত ২০ অভাৰত ১৭০ ৰান কম হৈ পৰিল। অৱশেষত অষ্ট্ৰেলিয়াৰ হাতত পৰাস্ত হৈ গ্ৰুপ পৰ্যায়ৰ পৰাই বাহিৰ হ’ল! ষ্টেডিয়ামৰ অন্যতম দৰ্শক বিৰাট কোহলীৰ সন্মুখত ভাৰতৰ মহিলা দলৰ বিশ্বকাপৰ সপোন চূৰমাৰ হৈ পৰিল। শ্বেন ৱাৰ্ণৰ দেশৰ দলটোৱে মেচখন অনায়াসে ৬ উইকেটত জয়লাভ কৰে। ফলত তেওঁলোকে গ্ৰুপত শীৰ্ষস্থান দখল কৰি ছেমি ফাইনেলত প্ৰৱেশ কৰে। আনহাতে দক্ষিণ আফ্ৰিকাই দ্বিতীয় দল হিচাপে শেষ চাৰিটা স্থানত স্থান লাভ কৰে।

ইংলেণ্ডৰ বতৰত প্ৰথমে বেটিং কৰাৰ সিদ্ধান্তৰ বাবে ভাৰতে ভূগিবলগীয়া হ’ল। পুৱা ডাৱৰীয়া পৰিস্থিতিত বেটিং কৰাটো কঠিন হৈ পৰিছিল। ফলত ভাৰতীয় দলৰ বেছিভাগ বেটছমেনে ৰান সংগ্ৰহ কৰিলে যদিও দিনটোৰ শেষত লেহেমীয়া স্ক’ৰব’ৰ্ডে বিপৰ্যয় কঢ়িয়াই আনিলে। কিন্তু ছফী মলিনেক্সৰ দলটোৱে পিছত বেটিং কৰিবলৈ নমাৰ সময়ত ৰ’দৰ পৰিৱেশৰ সুযোগ পাইছিল।

শ্বেফালীয়ে ৩৪ ৰানত আউট হয়। ৩৮ ৰানৰ অন্তত ৰান আউট হয় স্মৃতি। আনহাতে, জেমিমাই ২৮টা বলত ৩৪ ৰান সংগ্ৰহ কৰে। যিটো টি-২০ ক্ৰিকেটত স্থবিৰতাৰ নিদৰ্শন। অধিনায়ক হৰমনপ্ৰীতৰ যুঁজে ভাৰতক ১৭০ ৰানলৈ লৈ যায়। তেওঁ ২৭টা বলত ৫৬ ৰানৰ দৰ্শনীয় ইনিংছ খেলে। যদিও যি ঘটিবলগীয়া আছিল সেয়া ইতিমধ্যে ঘটি গৈছিল।

তথাপিও যেতিয়া অষ্ট্ৰেলিয়াৰ প্ৰথমটো উইকেট (জৰ্জিয়া বল) দলীয় ৪ ৰানত পৰিল ভাৰতীয় অনুৰাগীসকল আশা জাগি উঠিছিল । আনকি ৯ অভাৰ আৰু ১ টা বলত তিনিটা উইকেট পৰিল, আৰু তেওঁলোকৰ মুঠ ৰান হ’ল ৬৮। কিন্তু তাতেই গোটেই যুঁজখনৰ অন্ত পৰিল।

ফিবি লিচফিল্ড আৰু বেথ মুনীক আউট কৰাৰ পিছত পেৰী আৰু গাৰ্ডনাৰে এক গুৰুত্বপূৰ্ণ পাৰ্টনাৰশ্বিপ গঢ়ি তোলে। তেওঁলোকৰ ১০০ ৰানৰ পাৰ্টনাৰশ্বিপে অষ্ট্ৰেলিয়াক জয় আনি দিয়ে। পেৰীয়ে ৩৮টা বলত ৫৬ ৰান সংগ্ৰহ কৰি আউট হয় যদিও গাৰ্ডনাৰে ২৯টা বলত ৫৩ ৰান সংগ্ৰহ কৰি অপৰাজিত হৈ থাকে।

শেষত এটা অভাৰ বাকী থকা অৱস্থাত ৬ উইকেটত জয়ী হয় অষ্ট্ৰেলিয়া। অৱশ্যে কেৱল বিৰাট কোহলিয়ে নহয়, অনুষ্কা শৰ্মা, শিখৰ ধাৱন আৰু ৰবি শাস্ত্ৰীয়েও ইংলেণ্ডৰ খেলপথাৰত ভাৰতৰ শোচনীয় পৰাজয়ৰ সাক্ষী হৈছিল।

পৰাজয়ৰ দুখৰ মাজতো একমাত্ৰ সান্তনাটো আছিল দেওবাৰে ঝুলন গোস্বামীৰ অভিলেখ ভংগ কৰি মহিলাৰ আন্তঃৰাষ্ট্ৰীয় ক্ৰিকেটত সৰ্বাধিক উইকেট দখলকাৰী হিচাপে পৰিগণিত হয় দীপ্তি শৰ্মা। এতিয়া তেওঁৰ উইকেটৰ সংখ্যা ৩৫৬।

সংক্ষিপ্ত স্কোৰঃ

ভাৰতঃ ১৭০/৪ (হৰমন ৫৬, স্মৃতি ৩৮, শ্বেফালী ৩৪, জেমিমা ৩৪, ছফী ৪৬/২)

অষ্ট্ৰেলিয়াঃ ১৭২/৪ (পেৰী ৫৬, গাৰ্ডনাৰ ৫৩, শ্ৰী ৩২/২)

অষ্ট্ৰেলিয়াই ৬ উইকেটত জয়লাভ কৰে।