পশ্চিম এছিয়াত সাম্প্ৰতিক সময়ত উত্তেজনা হ্ৰাস পোৱাৰ ফলত আন্তঃৰাষ্ট্ৰীয় বজাৰত খাৰুৱা তেলৰ মূল্য হ্ৰাস পোৱাৰ পৰিপ্ৰেক্ষিতত দেশৰ সৰ্ববৃহৎ ব্যক্তিগত ইন্ধন বিক্ৰেতা প্ৰতিষ্ঠান নায়াৰা এনাৰ্জীয়ে বুধবাৰে, ১ জুলাইত পেট্ৰ‘লৰ মূল্য প্ৰতি লিটাৰত ৫ টকা আৰু ডিজেলৰ মূল্য প্ৰতি লিটাৰত ৩ টকাকৈ হ্ৰাস কৰিছে। যোৱা দুবছৰৰো অধিক সময়ৰ ভিতৰত ভাৰতত যিকোনো কোম্পানীৰ দ্বাৰা ইন্ধনৰ খুচুৰা মূল্য হ্ৰাস কৰাৰ এইটোৱেই হৈছে প্ৰথমটো ঘটনা।
পশ্চিম এছিয়াত সংঘাত হ্ৰাস পোৱাৰ সমান্তৰালভাৱে এক গুৰুত্বপূৰ্ণ সামুদ্ৰিক পথ মুকলি হোৱাৰ ফলত খাৰুৱা তেল আৰু তৰলীকৃত প্ৰাকৃতিক গেছৰ সৰবৰাহ পুনৰ স্বাভাৱিক হৈ পৰিছে। ইয়াৰ ফলশ্ৰুতিত যোগান ব্যাহত হোৱাৰ আশংকা হ্ৰাস পোৱাৰ বাবেই আন্তঃৰাষ্ট্ৰীয় বজাৰত খাৰুৱা তেলৰ মূল্য নিয়ন্ত্ৰণলৈ আহে। উদ্যোগটোৰ সূত্ৰই প্ৰকাশ কৰা অনুসৰি, সমগ্ৰ দেশত থকা নায়াৰাৰ সাত হাজাৰতকৈও অধিক ইন্ধন ষ্টেচনত এই সংশোধিত নিৰিখ কাৰ্যকৰী কৰা হৈছে। অৱশ্যে, স্থানীয় কৰ যেনে মূল্য সংযোজিত কৰৰ ওপৰত নিৰ্ভৰ কৰি বিভিন্ন ৰাজ্যত ইন্ধনৰ প্ৰকৃত মূল্যৰ তাৰতম্য ঘটিব পাৰে।
ব্যক্তিগত খণ্ডৰ প্ৰতিষ্ঠানটোৱে মূল্য হ্ৰাস কৰিলেও ৰাজহুৱা খণ্ডৰ ইন্ধন বিক্ৰেতা প্ৰতিষ্ঠানসমূহে বৰ্তমানলৈকে মূল্য অপৰিৱৰ্তিত ৰাখিছে। দেশৰ এক লাখৰো অধিক ইন্ধন ষ্টেচনৰ নব্বৈ শতাংশতকৈ অধিক নিয়ন্ত্ৰণ কৰা ৰাষ্ট্ৰায়ত্ত প্ৰতিষ্ঠান ইণ্ডিয়ান অইল কৰ্প‘ৰেচন, ভাৰত পেট্ৰ‘লিয়াম কৰ্প‘ৰেচন লিমিটেড আৰু হিন্দুস্তান পেট্ৰ‘লিয়াম কৰ্প‘ৰেচন লিমিটেডে মূল্য সংশোধনৰ কোনো কথা ঘোষণা কৰা নাই। দিল্লীত ইণ্ডিয়ান অইল কৰ্প‘ৰেচনৰ বিপণীসমূহত বৰ্তমানেও পেট্ৰ‘লৰ মূল্য প্ৰতি লিটাৰত ১০২.১২ টকা আৰু ডিজেলৰ মূল্য ৯৫.২০ টকাই হৈ আছে।
উল্লেখ্য যে, ইৰাণৰ সংঘাতৰ ফলত আন্তঃৰাষ্ট্ৰীয় বজাৰত তেলৰ মূল্য অস্বাভাৱিকভাৱে বৃদ্ধি পোৱাৰ সময়ত ইন্ধনৰ মূল্য বৃদ্ধি কৰা প্ৰতিষ্ঠানসমূহৰ ভিতৰত নায়াৰা অন্যতম আছিল। যোৱা ২৬ মাৰ্চত প্ৰতিষ্ঠানটোৱে পেট্ৰ‘ল আৰু ডিজেলৰ মূল্য ক্ৰমে ৫ টকা আৰু ৩ টকাকৈ বৃদ্ধি কৰিছিল। পৰৱৰ্তী সময়ত ৰাষ্ট্ৰায়ত্ত ইন্ধন প্ৰতিষ্ঠানসমূহেও মে‘ মাহৰ দ্বিতীয়াৰ্ধত কেইবালানিও সংশোধনৰ জৰিয়তে উচ্চ আন্তঃৰাষ্ট্ৰীয় মূল্যৰ সৈতে সংগতি ৰাখি পেট্ৰ‘ল আৰু ডিজেলৰ মূল্য প্ৰতি লিটাৰত ৭.৫০ টকাকৈ বৃদ্ধি কৰিছিল। নায়াৰাই বুধবাৰে কৰা মূল্যহ্ৰাসে কাৰ্যতঃ মাৰ্চ মাহৰ মূল্যবৃদ্ধিক প্ৰশমিত কৰিলে আৰু ই শেহতীয়াকৈ বিশ্বৰ তেলৰ বজাৰ স্থিৰ হোৱাৰ পাছত ভাৰতীয় গ্ৰাহকলৈ ইন্ধনৰ মূল্য হ্ৰাস পোৱাৰ প্ৰথমটো ইংগিত বহন কৰিছে।
শেহতীয়া পৰিস্থিতি সন্দৰ্ভত সূত্ৰই প্ৰকাশ কৰা অনুসৰি, শোধনাগাৰৰ কাম-কাজ পুনৰ স্বাভাৱিক হোৱাৰ পাছত নায়াৰা এতিয়া বজাৰৰ চাহিদা পূৰণ কৰিবলৈ সম্পূৰ্ণৰূপে সাজু হৈ উঠিছে আৰু দেশৰ উপভোক্তাৰ প্ৰয়োজনীয়তা পূৰণ কৰিবলৈ তেওঁলোকৰ সমগ্ৰ নেটৱৰ্কক সক্ৰিয় কৰি তুলিছে। বৰ্তমান প্ৰতিষ্ঠানটোৱে গুজৰাটৰ ভাডিনাৰত বাৰ্ষিক দুই কোটি টন উৎপাদন ক্ষমতাসম্পন্ন এক বৃহৎ তেল শোধনাগাৰ পৰিচালনা কৰি আছে।
