বিশ্বকাপৰ পথাৰত পৰ্তুগালক শেষ ষোল্ললৈ লৈ গৈছে ক্ৰিষ্টিয়ানো ৰোনাল্ডোৱে। কিন্তু খেলপথাৰৰ এই সফলতাৰ মাজতো নিজৰ মানৱীয়তাৰে সকলোৰে দৃষ্টি আকৰ্ষণ কৰিছে পাঁচবাৰৰ বেলন ডি অৰ বিজয়ী তাৰকাগৰাকীয়ে।
ভেনিজুৱেলাৰ ভয়াবহ ভূমিকম্পত এখন ভৰি হেৰুওৱা এটি কণমানি অনুৰাগীৰ সপোন পূৰণ কৰি তেওঁ এতিয়া প্ৰশংসাত উপচি পৰিছে।
শেহতীয়াকৈ কেইবাটাও শক্তিশালী ভূমিকম্পই ভেনিজুৱেলাক জোকাৰি গৈছে। ইয়াৰ ফলত দেশখনৰ বিভিন্ন প্ৰান্তত ব্যাপক ক্ষয়ক্ষতি হৈছে। লা গুৱাইৰা প্ৰদেশৰ কিশোৰ আন্দ্ৰেছ মিয়েলেছো এই দুৰ্যোগৰ বলি হৈছিল। ভূমিকম্পত এখন ভৰি হেৰুৱাই তেওঁ বৰ্তমান চিকিৎসালয়ত চিকিৎসাধীন হৈ আছে।
এই কঠিন সময়তো আন্দ্ৰেছৰ এটা ইচ্ছা আছিল। বিশ্বকাপৰ ষ্টিকাৰ এলবামৰ বাবে তেওঁ নিজৰ প্ৰিয় ফুটবলাৰ ক্ৰিষ্টিয়ানো ৰোনাল্ডোৰ অফিচিয়েল ষ্টিকাৰ বিচাৰিছিল। সামাজিক মাধ্যমযোগে শিশুটিৰ এই হেঁপাহৰ কথা ৰোনাল্ডোৰ কাণত পৰেগৈ। ইয়াৰ পিছতে পৰ্তুগালৰ জাৰ্চি পিন্ধি তেওঁ এটি ব্যক্তিগত ভিডিঅ‘ বাৰ্তা প্ৰেৰণ কৰে।
ভিডিঅ‘ বাৰ্তাটোত ৰোনাল্ডোৱে কয়, হেল্ল‘ আন্দ্ৰেছ, তুমি কেনে আছা? তোমালৈ স্নেহৰ বাৰ্তা পঠিয়াবলৈকে মই এই ভিডিঅ‘টো বনাইছো। মই জানো যে তুমি মোৰ এজন ডাঙৰ অনুৰাগী। আশা কৰো তুমি অতি সোনকালে সুস্থ হৈ উঠা। মই বিচাৰো যে তুমি মোৰ এখন খেল চাবলৈ আহা, আমি একেলগে খেল উপভোগ কৰিম। তোমাক লগ পাবলৈ মই বাট চাই আছো। সাহস ৰাখিবা, বন্ধু।
সামাজিক মাধ্যম এক্সত সাংবাদিক গেবি আৰোচাই দিয়া তথ্য অনুসৰি, কেইজনমান উদাৰ দাতাৰ সহায়ত আন্দ্ৰেছে ইতিমধ্যে সেই আকাংক্ষিত বিশ্বকাপৰ ষ্টিকাৰটো হাতত পাইছে। কেৱল সিমানেই নহয়, ৰোনাল্ডোৰ স্বাক্ষৰ থকা এটা জাৰ্চিও উপহাৰ হিচাপে লাভ কৰিব আন্দ্ৰেছে।
উল্লেখ্য যে ৰোনাল্ডোৰ এই পদক্ষেপৰ পূৰ্বে তেওঁৰ সংগী জৰ্জিনা ৰড্ৰিগেজেও ভেনিজুৱেলাৰ ভূমিকম্পত ক্ষতিগ্ৰস্ত লোকসকলৰ বাবে সাহায্য সামগ্ৰী প্ৰেৰণ কৰিছিল।
