শিল্পী আৰু ছাত্ৰ সংগঠনৰ বাক্স্বাধীনতা দমন কৰাৰ চেষ্টা চলোৱাৰ অভিযোগ তুলি মুখ্যমন্ত্ৰী ড° হিমন্ত বিশ্ব শৰ্মাক তীব্ৰ সমালোচনা কৰিছে ভাৰতৰ ছাত্ৰ ফেডাৰেচন চমুকৈ এছ এফ আইৰ অসম ৰাজ্যিক সমিতিয়ে। শুকুৰবাৰে মুখ্যমন্ত্ৰীয়ে সংবাদমেলত কৰা মন্তব্যক ‘স্বৈৰাচাৰী, প্ৰতিশোধমূলক আৰু গণতান্ত্ৰিক মূল্যবোধবিৰোধী’ আখ্যা দিছে ছাত্ৰ সংগঠনটোৱে।
শনিবাৰে প্ৰকাশ কৰা এক প্ৰেছ বিবৃতিত এছ এফ আইয়ে কয় যে ৰাজনৈতিক আদৰ্শ আৰু দলমত নিৰ্বিশেষে অসমৰ প্ৰতিগৰাকী শিল্পীৰ সৃষ্টিশীল আৰু গণতান্ত্ৰিক অধিকাৰ অক্ষুণ্ণ থাকিব লাগিব। কোন শিল্পীয়ে কি ছবি আঁকিব অথবা কেনেদৰে নিজৰ সৃষ্টিশীলতা প্ৰকাশ কৰিব, সেই কথা নিৰ্ধাৰণ কৰাৰ অধিকাৰ মুখ্যমন্ত্ৰীক সংবিধানে দিয়া নাই বুলি সংগঠনটোৱে মন্তব্য কৰে।
চিত্ৰশিল্পী মাৰ্শ্বেল বৰুৱাকে ধৰি সকলো চিত্ৰশিল্পী, কবি আৰু সাহিত্যিকৰ শিল্প স্বাধীনতাৰ পক্ষত এছ এফ আই সদায় থিয় হৈ থাকিব বুলিও বিবৃতিটোত কোৱা হৈছে। মুখ্যমন্ত্ৰীয়ে বিভিন্ন ছবিত জুবিন গাৰ্গক বিশেষ ধৰণৰ টুপী পিন্ধোৱা বুলি কৰা মন্তব্যৰো বিৰোধিতা কৰে সংগঠনটোৱে।
এছ এফ আইৰ মতে, জুবিন গাৰ্গে নিজেই তেনে টুপী পৰিধান কৰি চে গুৱেভাৰাৰ সৈতে নিজৰ আদৰ্শগত সংযোগ প্ৰকাশ কৰিছিল। জুবিন গাৰ্গ, চে গুৱেভাৰা আৰু বিষ্ণুপ্ৰসাদ ৰাভাৰ সমাজবাদী চিন্তাধাৰাৰ প্ৰতি মুখ্যমন্ত্ৰী ভীত বুলি অভিযোগ কৰি সংগঠনটোৱে কয় যে জুবিন গাৰ্গৰ ছবি অথবা তেওঁলৈ ন্যায়ৰ দাবী সম্বলিত প’ষ্টাৰৰ প্ৰতিও চৰকাৰে অসহিষ্ণু মনোভাব প্ৰদৰ্শন কৰিছে।
“জুবিন সত্তাৰ ওপৰত যেতিয়াই আক্ৰমণ হ’ব, তেতিয়াই এছ এফ আইয়ে তাৰ বিৰুদ্ধে দৃঢ়তাৰে সংগ্ৰাম আগুৱাই নিব,” বিবৃতিটোত সংগঠনটোৱে উল্লেখ কৰে।
নৱনিৰ্মিত উৰণ সেতুৰ দেৱালত ছবি অংকন অথবা শ্লোগান লিখিলে এছ এফ আইৰ কৰ্মীক গ্ৰেপ্তাৰ কৰা হ’ব বুলি মুখ্যমন্ত্ৰীয়ে দিয়া কথিত ভাবুকিকো সংগঠনটোৱে গৰিহণা জনায়। এছ এফ আইয়ে উৰণ সেতু প্ৰকল্পক সমৰ্থন কৰিলেহে ছবি অংকনৰ অনুমতি দিয়া হ’ব বুলি মুখ্যমন্ত্ৰীয়ে কৰা মন্তব্য অত্যন্ত প্ৰতিশোধমূলক আৰু গণতান্ত্ৰিক মূল্যবোধৰ পৰিপন্থী বুলি বিবৃতিটোত কোৱা হৈছে।
সংগঠনটোৱে স্পষ্ট কৰি দিয়ে যে এছ এফ আইয়ে উন্নয়নমূলক প্ৰকল্প অথবা সাধাৰণভাৱে উৰণ সেতু নিৰ্মাণৰ বিৰোধিতা নকৰে। কিন্তু দীঘলীপুখুৰী উৰণ সেতু নিৰ্মাণৰ নামত অঞ্চলটোৰ সেউজ আৱৰণৰ প্ৰতি ভাবুকি সৃষ্টি হোৱাৰ বাবেহে বিভিন্ন ছাত্ৰ সংগঠন, নাগৰিক সমাজ আৰু শিল্পী জুবিন গাৰ্গৰ সৈতে এছ এফ আইয়ে প্ৰতিবাদ কৰিছিল।
সংগঠনটোৰ দাবী, নাগৰিকৰ প্ৰতিবাদৰ বাবেই চৰকাৰে উৰণ সেতুখনৰ নক্সা সলনি কৰিবলৈ বাধ্য হৈছিল আৰু দীঘলীপুখুৰীৰ মূল সেউজ আৱৰণ ৰক্ষা পৰিছিল। অৱশ্যে নক্সা সলনি কৰাৰ পিছতো নিৰ্মাণৰ বাবে স্থানান্তৰ কৰা গছসমূহৰ এজোপাও ৰক্ষা নপৰা বুলি সংবাদমাধ্যমত প্ৰকাশিত খবৰৰ কথাও বিবৃতিটোত উল্লেখ কৰা হয়।
উৰণ সেতুত এছ এফ আইয়ে ছবি অংকন কৰিলে ৰাষ্ট্ৰীয় নিৰাপত্তা আইন চমুকৈ NSA প্ৰয়োগ কৰা হ’ব বুলি মুখ্যমন্ত্ৰীয়ে ভাবুকি দিয়াৰ অভিযোগ তুলি সংগঠনটোৱে প্ৰশ্ন কৰে—অসমত আইন আৰু আদালতৰ ওপৰত মুখ্যমন্ত্ৰীৰ ইচ্ছাই এতিয়া চূড়ান্ত সিদ্ধান্ত হৈ পৰিছে নেকি?
“ছবি অংকন কৰাৰ অধিকাৰ সকলোৰে আছে। অসম মুখ্যমন্ত্ৰী অথবা তেওঁৰ পৰিয়ালৰ ব্যক্তিগত সম্পত্তি নহয়। মুখ্যমন্ত্ৰীৰ ৰঙা চকুলৈ এছ এফ আইয়ে ভয় নাখায়,” বিবৃতিটোত কোৱা হৈছে। জুবিন গাৰ্গৰ ছবি অংকনৰ লগতে সকলো শিল্পীৰ শিল্প স্বাধীনতা ৰক্ষাৰ বাবে সংগঠনটোৱে আন্দোলন অব্যাহত ৰাখিব বুলিও ঘোষণা কৰে।
ইয়াৰ লগতে ৰাজহুৱা শিক্ষা ব্যৱস্থা ৰক্ষাৰ আন্দোলনো কোনো ভাবুকিয়ে বন্ধ কৰিব নোৱাৰে বুলি এছ এফ আইয়ে কয়। সংগঠনটোৰ অভিযোগ অনুসৰি, চৰকাৰী পুঁজিৰ অভাৱত ঐতিহ্যমণ্ডিত কটন বিশ্ববিদ্যালয়ত স্নাতকোত্তৰ পাঠ্যক্ৰমত নামভৰ্তি বন্ধ কৰাৰ বিৰুদ্ধে প্ৰতিবাদ কৰিলে NSA প্ৰয়োগ কৰা হ’লেও সংগঠনটোৱে সেই পৰিস্থিতিৰ সন্মুখীন হ’বলৈ সাজু।
বিগত দহ বছৰত ৰাজ্যত প্ৰায় ১২ হাজাৰ চৰকাৰী বিদ্যালয় বন্ধ হোৱা বুলি দাবী কৰি এছ এফ আইয়ে কয় যে চৰকাৰী বিদ্যালয়, মহাবিদ্যালয় আৰু বিশ্ববিদ্যালয় ৰক্ষাৰ সংগ্ৰাম গ্ৰেপ্তাৰৰ ভাবুকিৰে স্তব্ধ কৰিব পৰা নাযায়।
“এছ এফ আইৰ কৰ্মীক কাৰাগাৰত বন্দী কৰিব পাৰি, কিন্তু স্বাধীনতা, গণতন্ত্ৰ আৰু সমাজতন্ত্ৰৰ আদৰ্শক কাৰাবন্দী কৰিব নোৱাৰি,” বুলি উল্লেখ কৰি সংগঠনটোৱে অন্যায়, দমন আৰু শিক্ষাবিৰোধী নীতিৰ বিৰুদ্ধে আন্দোলন অব্যাহত ৰখাৰ ঘোষণা কৰে।
