কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানৰ পদত্যাগৰ দাবীত চলি থকা আন্দোলনত এক মোক্ষম আঘাত। ‘ককৰোচ জনতা পাৰ্টি’ বা চিজেপিৰ প্ৰতিষ্ঠাপক অভিজিৎ দিপকে টাইফয়ডত আক্ৰান্ত হৈ চিকিৎসালয়ত ভৰ্তি হ’বলগীয়া হৈছে। কিন্তু গুৰুতৰভাৱে অসুস্থ হোৱাৰ পাছতো এই আন্দোলন স্তব্ধ হৈ নাযায় বুলি তেওঁ স্পষ্টকৈ জনাই দিছে। শনিবাৰে ছচিয়েল মিডিয়াত দিয়া এক ভিডিঅ’ বাৰ্তাত তেওঁ এই আন্দোলন চলাই নিয়াৰ কথা ঘোষণা কৰে।
শ্বেয়াৰ কৰা ভিডিঅ’ বাৰ্তাত অভিজিতে জনায় যে যোৱা কেইবাদিন ধৰি তেওঁ অসুস্থ অনুভৱ কৰি আছিল। সকলো পৰীক্ষা-নিৰীক্ষাৰ অন্তত তেওঁৰ দেহত টাইফয়ড ধৰা পৰে। বৰ্তমান তেওঁক চিকিৎসালয়ত আইভি ড্ৰিপ আৰু চেলাইন দি চিকিৎসকে পৰ্যবেক্ষণত ৰাখিছে। এই অসুস্থতাৰ মাজতো তেওঁ দেশৰ বিভিন্ন প্ৰান্তত অহিংস আৰু শান্তিপূৰ্ণভাৱে আন্দোলন চলাই থকা চিজেপি সমৰ্থকসকলক আন্তৰিক ধন্যবাদ জ্ঞাপন কৰে। সমৰ্থকসকলক অভিনন্দন জনাই চিজেপি প্ৰধানগৰাকীয়ে কয় যে সমৰ্থকসকলে যিদৰে সমগ্ৰ দেশত এই আন্দোলন বিয়পাই দিছে, তাৰ বাবে সকলোকে অভিনন্দন। তেওঁ লগতে কয় যে যিদৰে যুঁজ চলি আছে, অতি সোনকালেই কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানৰ পদত্যাগ আদায় কৰিব পৰা যাব বুলি তেওঁ নিশ্চিত।
ধাৰাবাহিক আৰু শান্তিপূৰ্ণ প্ৰতিবাদে তেওঁলোকৰ মূল লক্ষ্য পূৰণ কৰিব বুলি তেওঁ দৃঢ় বিশ্বাস কৰে। উল্লেখ্য যে, বিভিন্ন প্ৰতিযোগিতামূলক পৰীক্ষাত হোৱা অনিয়ম আৰু প্ৰশ্নকাকত ফাদিল কাণ্ডৰ বিৰুদ্ধে ক্ষোভ প্ৰকাশ কৰি চিজেপিৰ এই আন্দোলন আৰম্ভ হৈছিল। পৰীক্ষা ব্যৱস্থাৰ স্বচ্ছতা, নিযুক্তি আৰু প্ৰৱেশ পৰীক্ষাত সংস্কাৰৰ লগতে কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানৰ পদত্যাগৰ দাবী ইয়াত জনোৱা হৈছে। এই আন্দোলনত পৰিৱেশকৰ্মী তথা শিক্ষাবিদ সোণম ৱাংচুকৰ লগতে বহু বিশিষ্ট ব্যক্তিয়ে অংশগ্ৰহণ কৰি ২৬ দিনীয়া অনশন পালন কৰিছিল। আন্দোলনকাৰীৰ ওপৰত কোনো আইনী ব্যৱস্থা গ্ৰহণ নকৰা, সংসদত পৰীক্ষা ব্যৱস্থা সন্দৰ্ভত আলোচনা কৰা আৰু নিহত ছাত্ৰ-ছাত্ৰীৰ পৰিয়ালক ক্ষতিপূৰণ দিয়াৰ বিষয়ত কেন্দ্ৰীয় চৰকাৰে লিখিত আশ্বাস দিয়াৰ পাছত সোণম ৱাংচুকেই অনশন প্ৰত্যাহাৰ কৰে। কিন্তু কেন্দ্ৰই আশ্বাস দিলেও মন্ত্ৰীগৰাকীয়ে পদত্যাগ নকৰা পৰ্যন্ত দিল্লীৰ যন্তৰ মন্তৰত ককৰোচ জনতা পাৰ্টিয়ে নিজৰ প্ৰতিবাদ চলাই যাব বুলি স্পষ্টকৈ জানিবলৈ দিছে।
