প্ৰধানমন্ত্ৰী নৰেন্দ্ৰ মোদীৰ যোৱা ২৩ জুলাইৰ এটা ভিডিঅ’ কিছু সময়ৰ বাবে আঁতৰাই দিয়া কাৰ্যৰ বাবে ফেচবুকৰ স্বত্বাধিকাৰী প্ৰতিষ্ঠান মেটাৰ মুৰব্বী মাৰ্ক জুকাৰবাৰ্গক ক্ষমা খুজিবলৈ দাবী জনাইছে যোগাযোগ আৰু তথ্য প্ৰযুক্তি বিষয়ক সংসদীয় স্থায়ী সমিতিয়ে। ইয়াৰ লগতে এই ঘটনাৰ বাবে দায়ী ব্যক্তিৰ বিৰুদ্ধে শীঘ্ৰে ব্যৱস্থা গ্ৰহণ কৰিবলৈকো দাবী জনোৱা হৈছে।
বিজেপিৰ সাংসদ নিশিকান্ত ডুবেৰ নেতৃত্বাধীন সমিতিখনৰ মতে, ১৪০ কোটি ভাৰতীয়ৰ প্ৰতিনিধিত্ব কৰা প্ৰধানমন্ত্ৰীগৰাকীৰ ভিডিঅ’ ডিলিট কৰাটো এক অতি গুৰুতৰ বিষয়। সমিতিখনৰ তৰফৰ পৰা সকীয়াই দিয়া হৈছে যে, যদি ফেচবুকে এই বিষয়ত দায়ীসকলৰ বিৰুদ্ধে ব্যৱস্থা গ্ৰহণ নকৰে, তেন্তে তথ্য প্ৰযুক্তি আইনৰ ৭৯নং ধাৰাৰ অধীনত মেটাক দিয়া ‘ছেফ হাৰ্বাৰ’ সুৰক্ষা বাতিল কৰাৰ কথাও বিবেচনা কৰা হ’ব। মাৰ্ক জুকাৰবাৰ্গে ক্ষমা খুজিবই লাগিব, নহ’লে এই সুৰক্ষা প্ৰত্যাহাৰ কৰা হ’ব বুলি সমিতিৰ মুৰব্বী ডুবেয়ে স্পষ্টভাৱে কৈছে।
স্মৰ্তব্য যে, ‘ছেফ হাৰ্বাৰ’ সুৰক্ষা নীতি বাতিল কৰা হ’লে ছ’চিয়েল মিডিয়া প্লেটফৰ্মসমূহৰ বিৰুদ্ধে পোনপটীয়া আইনী ব্যৱস্থা গ্ৰহণ কৰাটো সহজ হৈ পৰিব। উল্লেখ্য যে, যোৱা ২৩ জুলাইত প্ৰধানমন্ত্ৰী নৰেন্দ্ৰ মোদীয়ে নিট-ইউজি ২০২৬ ৰ প্ৰশ্নকাকত ফাদিল আৰু ইয়াৰ পৰৱৰ্তী ছাত্ৰ প্ৰতিবাদৰ প্ৰসংগত ইনষ্টাগ্ৰাম আৰু ফেচবুকত এটি ভিডিঅ’ বাৰ্তা আপল’ড কৰিছিল। নতুন প্ৰজন্মক উদ্দেশ্যি দিয়া এই প্ৰথমটো পোনপটীয়া বাৰ্তাত তেওঁ দোষীৰ বিৰুদ্ধে কঠোৰ আইনী ব্যৱস্থা গ্ৰহণৰ প্ৰতিশ্ৰুতি দিছিল। পিছে মেটাই ফেচবুকত এই ভিডিঅ’টো প্ৰায় চাৰি ঘণ্টা ধৰি সীমাবদ্ধ কৰি ৰাখে। অৱশ্যে পৰৱৰ্তী সময়ত তীব্ৰ প্ৰতিক্ৰিয়াৰ সৃষ্টি হোৱাত ইয়াক পুনৰ মুকলি কৰি দিবলৈ বাধ্য হয়।
চলিত সপ্তাহৰ আৰম্ভণিতে সংসদীয় সমিতিৰ সৈতে হোৱা এখন বৈঠকত মেটাৰ বিষয়াসকলে চৰকাৰৰ কঠোৰ প্ৰশ্নৰ সন্মুখীন হ’বলগীয়া হয়। প্ৰধানমন্ত্ৰীৰ ভিডিঅ’টো আঁতৰোৱাৰ আঁৰত “কাৰিকৰী বিজুতি” থকা বুলি কোম্পানীটোৱে দাবী কৰি ক্ষমা বিচাৰে যদিও তথ্য প্ৰযুক্তি মন্ত্ৰালয়ে মেটাৰ এই স্পষ্টীকৰণ “যুক্তিযুক্ত নহয়” বুলি উল্লেখ কৰে।
তদুপৰি ইনষ্টাগ্ৰামৰ পৰিশোধিত বিজ্ঞাপনসমূহত শিশু যৌন নিৰ্যাতনৰ সামগ্ৰী প্ৰদৰ্শন হোৱাক লৈ মেটা বৰ্তমান চৰকাৰৰ কঠোৰ নিৰীক্ষণৰ মাজত আছে। এই গুৰুতৰ বিষয়টোক লৈ যোৱা মাহত চৰকাৰে কোম্পানীটোলৈ এখন জাননীও প্ৰেৰণ কৰিছিল। ইয়াৰ সমান্তৰালভাৱে, সংসদীয় সমিতিখনে গুগল, ইউটিউব, এক্স, ফেচবুক, হোৱাটছএপ, ইনষ্টাগ্ৰাম আৰু স্নেপচেট আদি সকলো ছ’চিয়েল মিডিয়া প্লেটফৰ্মক CSAM সম্পৰ্কীয় নীতি-নিয়মসমূহ কঠোৰভাৱে মানি চলিবলৈ সকীয়াই দিছে। অন্যথা এই প্লেটফৰ্মসমূহে কঠোৰ আইনী ব্যৱস্থাৰ সন্মুখীন হ’বলগীয়া হ’ব বুলি স্পষ্ট কৰি দিয়া হৈছে।
নেচনেল ক্ৰাইম ৰেকৰ্ডছ ব্যুৰ’ৰ পৰিসংখ্যাই এই ক্ষেত্ৰত এক ভয়াবহ ছবি দাঙি ধৰিছে। ২০২৪ বৰ্ষত শিশুৰ বিৰুদ্ধে ৰুজু হোৱা মুঠ ১,২৩৮ টা চাইবাৰ অপৰাধৰ ভিতৰত ১,০৯৯ টা গোচৰেই হৈছে শিশুৰ সৈতে জড়িত যৌন উত্তেজক সামগ্ৰী প্ৰকাশ বা প্ৰেৰণ কৰাৰ অপৰাধ। তথ্য অনুসৰি, সামগ্ৰিকভাৱে শিশুৰ বিৰুদ্ধে সংঘটিত অপৰাধৰ হাৰ ৫.৮ শতাংশ বৃদ্ধি পাই ১.৮৭ লাখ স্পৰ্শ কৰিছেগৈ। আনহাতে, ২০২০ চনৰ পৰা পৰ্যবেক্ষণ কৰিলে দেখা যায় যে শিশুৰ লগত জড়িত অপৰাধৰ হাৰ উদ্বেগজনকভাৱে প্ৰায় ৪৬ শতাংশলৈ বৃদ্ধি পাইছে।
