বিয়াৰ প্ৰতিশ্ৰুতি দি এগৰাকী চিকিৎসা বিজ্ঞানৰ ছাত্ৰীৰ সৈতে একাধিকবাৰ শাৰীৰিক সম্পৰ্ক স্থাপন কৰাৰ অভিযোগ। তাৰ পিছত মাৰপিট, বিয়াৰ পৰা আঁতৰি যোৱা আৰু আনকি হত্যাৰ ভাবুকি দিয়াৰো অভিযোগ উঠিছে বংগৰ ক্ৰিকেটাৰ অভিষেক পোড়েলৰ বিৰুদ্ধে। এই অভিযোগৰ ভিত্তিত অৱশেষত আৰক্ষীয়ে গ্ৰেপ্তাৰ কৰিছে আইপিএলত দিল্লী কেপিটেলছৰ হৈ খেলা ক্ৰিকেটাৰগৰাকীক। দমদম থানাৰ অন্তৰ্গত ইমামী চিটিৰ পৰা তেওঁক গ্ৰেপ্তাৰ কৰে হুগলী গ্ৰামীণ আৰক্ষীয়ে। এগৰাকী চিকিৎসা ছাত্ৰীয়ে দাখিল কৰা অভিযোগৰ ভিত্তিত কলকাতা উচ্চ ন্যায়ালয়ৰ নিৰ্দেশৰ পিছতে এই পদক্ষেপ গ্ৰহণ কৰে আৰক্ষীয়ে।
অভিযোগকাৰিণীৰ দাবী অনুসৰি, বিগত প্ৰায় তিনি বছৰ ধৰি অভিষেক পোড়েলৰ সৈতে তেওঁৰ প্ৰেমৰ সম্পৰ্ক আছিল। আৰম্ভণিতে দুয়োৰে মাজৰ সম্পৰ্ক ভালেই আছিল। কিন্তু যোৱা বছৰৰ পৰা সম্পৰ্কত ফাট মেলিবলৈ আৰম্ভ কৰে। অভিযোগ অনুসৰি, সেই সময়ৰ পৰাই অভিষেকে তেওঁৰ পৰা ক্ৰমে দূৰত্ব বজাই ৰাখিবলৈ আৰম্ভ কৰে।
যুৱতীগৰাকীৰ অভিযোগ, অভিষেকে তেওঁক বিয়াৰ প্ৰতিশ্ৰুতি দি একাধিকবাৰ শাৰীৰিক সম্পৰ্ক স্থাপন কৰিছিল। কিন্তু পিছলৈ বিয়াৰ প্ৰতিশ্ৰুতি পালন কৰিবলৈ অস্বীকাৰ কৰে। ইয়াৰ লগতে তেওঁক শাৰীৰিকভাৱে নিৰ্যাতন কৰাৰ আৰু ভয়-ভাবুকি দিয়াৰো অভিযোগ উত্থাপন হৈছে।
অভিযোগকাৰীয়ে যোৱা জুন মাহত প্ৰথমবাৰৰ বাবে আৰক্ষীৰ কাষ চাপে। তেওঁ দাখিল কৰা অভিযোগত ধৰ্ষণ, শাৰীৰিক নিৰ্যাতন আৰু অপৰাধমূলক ভাবুকিৰ কথা উল্লেখ কৰে। ইয়াৰ পিছতে আৰক্ষীয়ে গোচৰ ৰুজু কৰি তদন্ত আৰম্ভ কৰে।
এফআইআৰত থকা অভিযোগ অনুসৰি, ঘটনাটো ইয়াতেই শেষ নহয়। যুৱতীগৰাকীয়ে দাবী কৰিছে যে অভিষেকে তেওঁক জোৰকৈ আবদ্ধ কৰি ৰাখিছিল। কেইবাদিনো তেওঁক খাবলৈ দিয়া হোৱা নাছিল আৰু বাহিৰৰ পৃথিৱীৰ সৈতে সম্পৰ্ক বিচ্ছিন্ন কৰি ৰখা হৈছিল। ইয়াৰ ফলত তেওঁ শাৰীৰিকভাৱে অত্যন্ত দুৰ্বল হৈ পৰিছিল বুলি অভিযোগত উল্লেখ কৰা হৈছে।
এফআইআৰৰ বৰ্ণনা অনুসৰি, যুৱতীগৰাকী ইমানেই দুৰ্বল হৈ পৰিছিল যে ঠিকমতে খোজ কাঢ়িবও পৰা নাছিল। অৱশ্যে ইয়াৰ পূৰ্বে সংবাদমাধ্যমৰ আগত ক্ৰিকেটাৰ অভিষেক পোড়েলে তেওঁৰ বিৰুদ্ধে উত্থাপিত অভিযোগসমূহ সম্পূৰ্ণ ভিত্তিহীন বুলি দাবী কৰিছিল।
জুন মাহত অভিযোগ লাভ কৰাৰ পিছতে আৰক্ষীয়ে তদন্ত আৰম্ভ কৰে। এগৰাকী আৰক্ষী বিষয়াই সংবাদ সংস্থা পিটিআইক জনোৱা অনুসৰি, আৰক্ষীয়ে অভিযোগ লাভ কৰাৰ পিছত ইতিমধ্যে তদন্ত আৰম্ভ কৰিছিল। পিছত গোচৰটো কলকাতা উচ্চ ন্যায়ালয়লৈ যায়। আদালতে বিষয়টোত কঠোৰ স্থিতি গ্ৰহণ কৰি অভিষেক পোড়েলক শীঘ্ৰে গ্ৰেপ্তাৰ কৰিবলৈ আৰক্ষীক নিৰ্দেশ দিয়ে।
কলকাতা উচ্চ ন্যায়ালয়ৰ নিৰ্দেশৰ পিছতে হুগলী গ্ৰামীণ আৰক্ষীয়ে অভিযান চলায়। আৰক্ষী অধীক্ষক কুণৱাৰ ভূষণ সিঙৰ নেতৃত্বত আৰক্ষীৰ এটা দলে দমদমৰ ইমামী চিটিৰ পৰা অভিষেক পোড়েলক গ্ৰেপ্তাৰ কৰে।
ইফালে ক্ৰিকেটৰ পথাৰত অভিষেক পোড়েলৰ উত্থান আছিল যথেষ্ট উল্লেখযোগ্য। ২০২১-২২ ছিজনত বংগৰ হৈ প্ৰথম শ্ৰেণীৰ ক্ৰিকেটত অভিষেক ঘটে তেওঁৰ। এতিয়ালৈকে তেওঁ ৩২খন প্ৰথম শ্ৰেণীৰ মেচ আৰু ২৩খন লিষ্ট ‘এ’ মেচ খেলিছে। ভাৰত ‘এ’ দলৰ হৈ ব্ৰিটেইন আৰু অষ্ট্ৰেলিয়াও ভ্ৰমণ কৰিছে।
২০২৩ চনৰ পৰা আইপিএলত দিল্লী কেপিটেলছৰ হৈ খেলি আহিছে বাঁওহতীয়া বেটাৰগৰাকীয়ে। যোৱা ছিজনত চাৰিটা ইনিংছত তেওঁৰ বেটৰ পৰা আহিছিল ১০৮ ৰান। ক্ৰিকেটাৰগৰাকীৰ গ্ৰেপ্তাৰৰ পিছত তেওঁ কেৰিয়াৰ কি হ’ব তাকে লি চৰ্চা চলিছে।
