উত্তৰ প্ৰদেশৰ আগ্ৰাত এক অতি ভয়ংকৰ আৰু অমানৱীয় ঘটনা সংঘটিত হৈছে। বুধবাৰে এগৰাকী পাষাণ পিতৃয়ে চেলফি লোৱাৰ চলেৰে নিজৰ এবছৰীয়া কন্যাক দলঙৰ পৰা যমুনা নদীত পেলাই দিয়ে। ইয়াৰ পিছতে তেওঁ পত্নীকো নদীত পেলাই দিয়াৰ চেষ্টা কৰে বুলি অভিযোগ উঠিছে। বৰ্তমান আৰক্ষী আৰু ডুবৰীৰ দলে নিৰুদ্দেশ হোৱা শিশুটিৰ সন্ধানত অভিযান চলাই আছে।
জানিব পৰা মতে, এই জঘন্য ঘটনাটো আগ্ৰাৰ ছিকন্দ্ৰা আৰক্ষী থানাৰ অন্তৰ্গত আকবৰা যমুনা দলঙত সংঘটিত হৈছে। ৰিংকু আৰু তেওঁৰ পত্নী লক্ষ্মীয়ে কন্যাগৰাকীৰ সৈতে এখন মটৰচাইকেলেৰে আগ্ৰা চহৰলৈ ওলাই গৈছিল। কিন্তু বাটতে স্বামী-স্ত্ৰীৰ মাজত কোনো কথাক লৈ তীব্ৰ কাজিয়াৰ সৃষ্টি হয়।
পত্নী লক্ষ্মীয়ে জানিবলৈ দিয়া অনুসৰি, কাজিয়াৰ মাজতে ৰিংকুৱে দলঙৰ ওপৰত মটৰচাইকেলখন ৰখাই দিয়ে আৰু কন্যাৰ সৈতে এটা চেলফি ল’ব বিচাৰে বুলি কয়। তেওঁ দলঙৰ ৰেলিঙৰ ওচৰলৈ গৈ কন্যাৰ সৈতে ফটো তোলে আৰু লগে লগে কোনো একো বুজি উঠাৰ আগতেই নিষ্পাপ শিশুটিক যমুনা নদীত পেলাই দিয়ে।
এই ভয়ংকৰ কাণ্ড দেখি লক্ষ্মীয়ে যেতিয়া স্বামীৰ ফালে দৌৰি যায়, তেতিয়া ৰিংকুৱে পত্নীকো দলঙৰ পৰা পেলাই দিয়াৰ চেষ্টা কৰে। উপায়ন্তৰ হৈ লক্ষ্মীয়ে চিঞৰ-বাখৰ কৰাত আশে-পাশে থকা লোকসকল গোট খায়। লক্ষ্মীয়ে গোটেই ঘটনাটো বিৱৰি কোৱাৰ লগে লগে ক্ষুব্ধ ৰাইজে ৰিংকুক কৰায়ত্ত কৰি উত্তম-মধ্যম দিয়ে আৰু আৰক্ষীক চমজাই দিয়ে। ছ’চিয়েল মিডিয়াতো ৰাইজে ৰিংকুক প্ৰহাৰ কৰা এই ভিডিঅ’ ভাইৰেল হৈ পৰিছে।
ঘটনা সন্দৰ্ভত অভিযোগ লাভ কৰাৰ পিছতে পিএচি (PAC)ৰ ডুবৰীৰ দলে যমুনাত শিশুটিৰ সন্ধানত তীব্ৰ অভিযান আৰম্ভ কৰিছে যদিও বাতৰি লিখা পৰলৈকে শিশুটিৰ কোনো সন্ধান পোৱা নাই। ইতিমধ্যে ছিকন্দ্ৰা আৰক্ষী থানাত এটা গোচৰ ৰুজু কৰা হৈছে আৰু সমগ্ৰ ঘটনাটোৰ তদন্ত অব্যাহত আছে।
