হায়দৰাবাদ আইন বিশ্ববিদ্যালয়ৰ শিক্ষাৰ্থীসকলে মুখ্য ন্যায়াধীশক সমাৱৰ্তনলৈ আমন্ত্ৰণ জনোৱাৰ বিৰুদ্ধে প্ৰতিবাদ সাব্যস্ত কৰে। পুনৰ ঘটিছে একে ঘটনা। এইবাৰ ভাৰতৰ অন্যতম আগশাৰীৰ আইন শিক্ষানুষ্ঠান নেশ্যনেল ল স্কুল অৱ ইণ্ডিয়া ইউনিভাৰ্চিটি (এন এল এছ আই ইউ)ৰ বৰ্তমান আৰু প্ৰাক্তন ছাত্ৰ-ছাত্ৰীসকলে বিশ্ববিদ্যালয়খনৰ আগন্তুক সমাৱৰ্তন অনুষ্ঠানলৈ ভাৰতৰ মুখ্য ন্যায়াধীশ সূৰ্য কান্তক আমন্ত্ৰণ জনোৱাত আপত্তি প্ৰকাশ কৰিছে। একে সময়তে ভাৰতীয় বাৰ কাউন্সিলৰ অধ্যক্ষ মনন কুমাৰ মিশ্ৰক বিশ্ববিদ্যালয়ৰ অনুষ্ঠানলৈ আমন্ত্ৰণ জনোৱাতো ছাত্ৰ-ছাত্ৰীসকলে আপত্তি প্ৰকাশ কৰে।
শনিবাৰে এখন পত্ৰযোগে এন এল এছ আই ইউৰ বৰ্তমান আৰু প্ৰাক্তন ছাত্ৰ-ছাত্ৰীসকলে হায়দৰাবাদৰ নালছাৰৰ ছাত্ৰ-ছাত্ৰীৰ সৈতে “নিঃচৰ্ত সংহতি” প্ৰকাশ কৰে। এই ঘটনা সন্দৰ্ভত ভাৰতীয় বাৰ কাউন্সিলৰ অধ্যক্ষৰ নিৰ্দেশ (যিটো পিছত প্ৰত্যাহাৰ কৰা হয়)কো সমালোচনা কৰে। তেওঁলোকৰ শিক্ষানুষ্ঠানৰ সমাৱৰ্তন অনুষ্ঠানলৈ মুখ্য ন্যায়াধীশক আমন্ত্ৰণ জনোৱাৰ সিদ্ধান্তকো সমালোচনা কৰে।
ভাৰতীয় ৰাষ্ট্ৰীয় আইন বিদ্যালয় বিশ্ববিদ্যালয়ৰ প্ৰতিবাদ সাব্যস্ত কৰা ছাত্ৰ-ছাত্ৰীসকলে কয় যে সমাৱৰ্তন অনুষ্ঠানত কোন কোন উপস্থিত থাকিব সেয়া নহয়, ভাৰতৰ শীৰ্ষ আইন বিদ্যালয়সমূহৰ ছাত্ৰ-ছাত্ৰীসকলে কোনো ধৰণৰ নেতিবাচক প্ৰভাৱ বা তেওঁলোকৰ পেছাদাৰী ভৱিষ্যতৰ প্ৰতি ভয় নোহোৱাকৈ প্ৰভাৱশালী প্ৰতিষ্ঠান আৰু চৰকাৰী বিষয়াৰ সৈতে দ্বিমত পোষণ কৰাৰ স্বাধীনতা লাভ কৰিব নে নাই সেয়াহে ইয়াত মূল প্ৰশ্ন।
প্ৰসংগক্ৰমে হায়দৰাবাদৰ নেশ্যনেল একাডেমী অৱ লিগেল ষ্টাডিজ এণ্ড ৰিচাৰ্চ ইউনিভাৰ্চিটিৰ সমাৱৰ্তন অনুষ্ঠানত মুখ্য অতিথি হিচাপে মুখ্য ন্যায়াধীশ সূৰ্য্য কান্তক আমন্ত্ৰণ জনোৱা হৈছিল। ইয়াৰ বিৰোধিতা কৰিছিল ছাত্ৰ-ছাত্ৰীৰ এটা অংশই। ইয়াৰ আঁৰত আছিল মুখ্য ন্যায়াধীশগৰাকীৰ ‘ককৰোচ’ মন্তব্য। এই ঘটনাৰ বাবে ভাৰতীয় বাৰ কাউন্সিলে কঠোৰ সিদ্ধান্ত গ্ৰহণ কৰে। বিচিআইয়ে এক নিৰ্দেশনাত কয় যে ২০২৬ চনৰ হায়দৰাবাদ আইন বিশ্ববিদ্যালয়ৰ শ্ৰেণীৰ কোনো স্নাতক পৰৱৰ্তী নিৰ্দেশ নোহোৱালৈকে কোনো ৰাজ্যিক বাৰ কাউন্সিলত অধিবক্তা হিচাপে নামভৰ্তি কৰা নহ’ব। কিন্তু কেইঘণ্টামানৰ পিছত এই সিদ্ধান্ত বাতিল কৰা হয়।
বিচিআইৰ এই সিদ্ধান্তক লৈ খোদ মুখ্য ন্যায়াধীশ সূৰ্য কান্তেও ক্ষোভ প্ৰকাশ কৰে। এই সন্দৰ্ভত মুখ্য ন্যায়াধীশগৰাকীয়ে কয়, “এই (ছাত্ৰ-ছাত্ৰীৰ বিৰুদ্ধে শাস্তিমূলক ব্যৱস্থা) সম্পূৰ্ণ অনাকাংখিত। মইও এসময়ত ছাত্ৰ আছিলো। মই আন্দোলনত সক্ৰিয়ভাৱে অংশগ্ৰহণ কৰিছিলো। ঘটনাটো মোৰ আৰু ছাত্ৰ-ছাত্ৰীৰ মাজৰ বিষয়। ইয়াত হস্তক্ষেপ কৰিবলৈ তেওঁলোক কোন (বিচিআই)?”
ইয়াৰ সমান্তৰালকৈ উচ্চতম ন্যায়ালয়ে বিচিআইয়ে জাৰি কৰা অধিসূচনা সন্দৰ্ভত তেওঁলোকৰ পৰাও সঁহাৰি বিচাৰে। অৱশ্যে আন এখন বিশ্ববিদ্যালয়ৰ ছাত্ৰই মুখ্য ন্যায়াধীশৰ বিৰুদ্ধে আপত্তি কৰাৰ পিছত বিষয়টো ক’লৈ গতি কৰে সেয়া লক্ষ্যণীয় হ’ব।
