ৰাজ্যৰ চৰকাৰী বিদ্যালয়সমূহৰ পুতৌলগা অৱস্থাৰ বুজ ল’বলৈ ৰাজস্থানলৈ যোৱাৰ কথা ঘোষণা কৰিছিল কক্ৰোচ জনতা পাৰ্টিৰ অন্যতম আহ্বায়ক আশুতোষ ৰাংকাই। কিন্তু এই ঘোষণাৰ কেইঘণ্টামানৰ পাছতেই ৰাজস্থানৰ বিজেপি চৰকাৰে এক নিৰ্দেশনা জাৰি কৰি বিদ্যালয়সমূহত যিকোনো বিদ্যালয়ৰ বাহিৰৰ লোকৰ প্ৰৱেশ নিষিদ্ধ কৰিছে।
উল্লেখ্য যে, কেইদিনমান পূৰ্বে চিজেপিৰ প্ৰধান অভিজিৎ দীপকেয়ে সমগ্ৰ দেশৰ চৰকাৰী বিদ্যালয়সমূহৰ মানদণ্ড উন্নত কৰাৰ দাবীৰে ‘স্কুল ঠিক কৰোঁ’ নামৰ এক কাৰ্যসূচী ঘোষণা কৰিছিল। এই কাৰ্যসূচীৰ অংশ হিচাপেই আশুতোষে ৰাজস্থান ভ্ৰমণৰ সিদ্ধান্ত লয়। দেওবাৰে ছ’চিয়েল মিডিয়াত তেওঁ লিখে, “জয়পুৰ, আজমেৰ, যোধপুৰ, উদয়পুৰ, ঢোলপুৰ, ভৰতপুৰ আৰু কোটাসহ ৰাজস্থানৰ বিভিন্ন প্ৰান্তৰ পৰা মই স্কুলৰ অৱস্থা চাবলৈ অনুৰোধ লাভ কৰিছোঁ। স্কুলৰ সমস্যা সমাধানৰ ক্ষেত্ৰত কৰ্তৃপক্ষৰ কোনো আগ্ৰহ নাই। সেয়ে মই আগন্তুক কেইদিনমানৰ ভিতৰত এই সকলোবোৰ ঠাইলৈ যাম।”
আশুতোষৰ এই পোষ্টৰ পাছতেই ৰাজস্থানৰ স্কুল শিক্ষা বিভাগৰ সঞ্চালক ললিত কুমাৰে এখন নিৰ্দেশনা প্ৰকাশ কৰে। নিৰ্দেশনাটোত কোৱা হৈছে যে, অভিভাৱকৰ অনুপস্থিতিত স্কুলৰ অধ্যক্ষ বা প্ৰধান শিক্ষকসকলেই ছাত্ৰ-ছাত্ৰীৰ অভিভাৱকৰ ভূমিকা পালন কৰে। সেয়েহে শিক্ষাৰ্থীৰ সুৰক্ষা, নিৰাপত্তা আৰু গোপনীয়তাৰ প্ৰতি লক্ষ্য ৰাখি বিদ্যালয়ত বাহিৰাগতৰ প্ৰৱেশত নিষেধাজ্ঞা আৰোপ কৰা হৈছে। চৰকাৰী কামত নিয়োজিত লোকৰ বাহিৰে আন কোনো লোকে প্ৰধান শিক্ষকৰ অনুমতি নোলোৱাকৈ স্কুলৰ ভিতৰত সোমাব নোৱাৰিব। আনকি অনুমতি নোলোৱাকৈ স্কুল চৌহদত ফটো তোলাৰ ওপৰতো কঠোৰ নিষেধাজ্ঞা আৰোপ কৰা হৈছে।
প্ৰসংগক্ৰমে, যোৱা বৃহস্পতিবাৰে পশ্চিমবংগৰ বাঁকুৰা জিলাৰ ইন্দাস অঞ্চলত চিজেপিৰ ‘স্কুল ঠিক কৰোঁ’ কাৰ্যসূচীত অংশ লৈ এখন প্ৰাথমিক বিদ্যালয়ৰ পাঠদানৰ অৱস্থা চাবলৈ গৈছিল শ্বেখ আব্দুল হাফিজ নামৰ এজন যুৱক। অভিযোগ অনুসৰি, সেইদিনা নিশাই হাফিজৰ পিতৃ শ্বেখ মহম্মদ মাফিকক কেইজনমান বিজেপি কৰ্মীয়ে প্ৰহাৰ কৰি হত্যা কৰে। নিহতৰ পত্নীৰ অভিযোগৰ ভিত্তিত আৰক্ষীয়ে ইতিমধ্যে এজন বিজেপি নেতাসহ আঠজনক গ্ৰেপ্তাৰ কৰিছে।
