ছোমালিয়া আৰু য়েমেনৰ বিপজ্জনক সাগৰত পুনৰবাৰ মূৰ দাঙি উঠিছে জলদস্যুই। দুটা পৃথক ভয়ানক কাণ্ডত সশস্ত্ৰ জলদস্যুই কমেও ২২ জন ভাৰতীয় নাৱিককে ধৰি দুখন মালবাহী জাহাজ অপহৰণ কৰিছে। এই দ্বৈত আক্ৰমণে আফ্ৰিকাৰ ‘হৰ্ণ অফ আফ্ৰিকা’ সংলগ্ন আন্তঃৰাষ্ট্ৰীয় জলসীমাত সাধাৰণ বাণিজ্যিক জাহাজৰ সুৰক্ষাৰ ওপৰত পুনৰ গুৰুতৰ প্ৰশ্নৰ উত্থাপন কৰিছে।
প্ৰথমটো ঘটনাত ইৰিত্ৰিয়াৰ পতাকা থকা তেল আৰু ৰাসায়নিক টেংকাৰ ‘এম.টি.ছিবু ১’ য়েমেনৰ উপকূলৰ পৰা মাত্ৰ ৩০ নটিকেল মাইল দূৰত এডেন উপসাগৰত যাত্ৰা কৰাৰ সময়তে আক্ৰমণৰ বলি হৈছিল। ছয়জন অস্ত্ৰধাৰী জলদস্যুই জাহাজখনৰ নিয়ন্ত্ৰণ লয়।
জাহাজখনত মুঠ ২০ জন ক্ৰু মেম্বাৰ আছে, ইয়াৰে ১৬ জন ভাৰতীয়। বাকীসকলৰ এজন ছিৰিয়া, এজন চুডান আৰু এজন ইৰাকৰ। আনজন ক্ৰু মেম্বাৰৰ পৰিচয় এতিয়াও জানিব পৰা হোৱা নাই। সামুদ্ৰিক প্ৰশাসন সঞ্চালকালয়ৰ এক প্ৰতিবেদন অনুসৰি এতিয়াৰ বাবে ক্ৰু মেম্বাৰসকল সুৰক্ষিত। তেওঁলোকক কাম কৰাৰ সুযোগ দিয়া কোম্পানীটোক ই-নেভিক পৰ্টেলৰ জৰিয়তে সময়ে সময়ে বাতৰিৰ আপডেট দিবলৈ নিৰ্দেশ দিয়া হৈছে।
দ্বিতীয়টো কাণ্ড সংঘটিত হৈছে ছোমালিয়াৰ পুণ্টলেণ্ডৰ উপকূলত। তাত আঠজন জলদস্যুই কেমেৰুণৰ পতাকা থকা মালবাহী জাহাজ ‘M/V LUTUF’ অপহৰণ কৰে। জাহাজখনত থকা ১০ জন ক্ৰুৰ ভিতৰত ৬ জন ভাৰতীয় নাৱিক। ইয়াৰ উপৰিও এজন তুৰ্কী, এজন জৰ্জিয়ান আৰু দুজন ছাৰ্বিয়ান নিৰাপত্তাৰক্ষী আছে।
জানিব পৰা মতে, ‘পোলাৰ মুভমেণ্ট শ্বিপিং’ৰ মালিকানাধীন জাহাজখনে মোগাদিছুত থকা তুৰ্কীৰ সামৰিক প্ৰশিক্ষণ কেন্দ্ৰৰ বাবে অস্ত্ৰ-শস্ত্ৰ, যোগাযোগ ব্যৱস্থা আৰু উপগ্ৰহ সঁজুলি কঢ়িয়াই লৈ আনিছিল। জানিব পৰা মতে, এই জলদস্যুৰ দলটোৱে পূৰ্বতে ‘M/V Sword’ নামৰ এখন জাহাজ অপহৰণৰ লগত জড়িত আছিল।
এই দুটা ঘটনাৰ পিছতে নাৱিকসকলৰ সুৰক্ষা আৰু অপহৰণ কৰা জাহাজসমূহৰ বৰ্তমানৰ অৱস্থাক লৈ চিন্তিত হৈ পৰিছে কূটনৈতিক আৰু সামুদ্ৰিক নিৰাপত্তা মহল। অপহৃত ২২ জন ভাৰতীয়ৰ পৰিয়ালৰ সদস্যই এতিয়া চৰম উদ্বিগ্নতাৰ মাজত কটাবলগীয়া হৈছে। আন্তঃৰাষ্ট্ৰীয় উদ্ধাৰ সংস্থা আৰু সংশ্লিষ্ট দেশসমূহৰ প্ৰশাসনে পৰিস্থিতি নিয়ন্ত্ৰণৰ বাবে কাম কৰি আছে।
