ৰাজস্থান উচ্চ ন্যায়ালয়ৰ ভাৰপ্ৰাপ্ত মুখ্য ন্যায়াধীশ সঞ্জীৱ প্ৰকাশ শৰ্মাৰ বিৰুদ্ধে গুৰুতৰ অভিযোগ উত্থাপন কৰিছে সৰ্বোচ্চ ন্যায়ালয়ৰ ন্যায়াধীশ সন্দীপ মেহতাই। এই সন্দৰ্ভত সৰ্বোচ্চ ন্যায়ালয়ৰ মুখ্য ন্যায়াধীশ সূৰ্য কান্তলৈ একেৰাহে তিনিখন চিঠি প্ৰেৰণ কৰিছে ন্যায়াধীশ মেহতাই। তেওঁৰ অভিযোগ, ৰাজস্থান উচ্চ ন্যায়ালয়ত বহু কাম নিয়ম ভংগ কৰি আৰু পক্ষপাতমূলকভাৱে চলি আছে। এনে পৰিস্থিতিত তৎকালীন ব্যৱস্থা গ্ৰহণৰ প্ৰয়োজন আছে বুলিও তেওঁ উল্লেখ কৰিছে।
সংবাদ সংস্থাৰ তথ্য অনুসৰি, ন্যায়াধীশ মেহতাই ২ আগষ্টত প্ৰথমখন চিঠি প্ৰেৰণ কৰে। চিঠিখনত ৰাজস্থান উচ্চ ন্যায়ালয়ৰ মুখ্য ন্যায়াধীশৰ বিৰুদ্ধে একাধিক নিৰ্দিষ্ট অভিযোগ উত্থাপন কৰা হয়। অভিযোগ অনুসৰি, আন ন্যায়াধীশৰ আসনত শুনানিৰ বাবে তালিকাভুক্ত গুৰুত্বপূৰ্ণ আৰু সংবেদনশীল গোচৰসমূহ নিয়ম মানি নচলাকৈ নিজৰ আসনলৈ স্থানান্তৰ কৰা হৈছে।
ন্যায়াধীশ মেহতাই অভিযোগ কৰে যে এনে কাৰ্যকলাপে ন্যায়ালয়ৰ কাম-কাজৰ স্বচ্ছতা আৰু ন্যায়পৰায়ণতাক লৈ গুৰুতৰ প্ৰশ্ন উত্থাপন কৰিছে। লগতে স্বজনপোষণ, ক্ষমতাৰ অপব্যৱহাৰ আৰু নিয়মক আওকাণ কৰাৰ দৰে অভিযোগো উত্থাপন কৰিছে তেওঁ। তেওঁৰ মতে, মুখ্য ন্যায়াধীশৰ এনে পদক্ষেপে ন্যায়ব্যৱস্থাৰ ওপৰত থকা জনসাধাৰণৰ বিশ্বাসত প্ৰভাৱ পেলাব পাৰে।
২ আগষ্টৰ পিছত ১০ আগষ্টতো ন্যায়াধীশ মেহতাই পুনৰ এখন চিঠি প্ৰেৰণ কৰে। তাৰ পিছত ১৭ আগষ্টত তেওঁ তৃতীয়খন চিঠি লিখে। এই চিঠিসমূহত কেৱল কোনো এটা গোচৰ বা কোনো এটা সিদ্ধান্তক লৈ নহয়, সমগ্ৰ ৰাজস্থান উচ্চ ন্যায়ালয়ৰ কাম-কাজৰ ধৰণক লৈ উদ্বেগ প্ৰকাশ কৰা হৈছে।
ন্যায়াধীশ মেহতাই সৰ্বোচ্চ ন্যায়ালয়ৰ মুখ্য ন্যায়াধীশৰ ওচৰত এই বিষয়ত কঠোৰ ব্যৱস্থা গ্ৰহণৰ আহ্বান জনোৱাৰ লগতে ৰাজস্থান উচ্চ ন্যায়ালয়ৰ মুখ্য ন্যায়াধীশক পদৰ পৰা আঁতৰোৱাৰ দাবীও উত্থাপন কৰা বুলি জানিব পৰা গৈছে। এজন উচ্চ ন্যায়ালয়ৰ ন্যায়াধীশে আন এজন উচ্চ ন্যায়ালয়ৰ মুখ্য ন্যায়াধীশৰ বিৰুদ্ধে এনেদৰে একেৰাহে লিখিত অভিযোগ দাখিল কৰা ঘটনা ভাৰতীয় ন্যায়ব্যৱস্থাত যথেষ্ট বিৰল।
সঞ্জীৱ প্ৰকাশ শৰ্মাই ইয়াৰ পূৰ্বেও ৰাজস্থান উচ্চ ন্যায়ালয়ত মুখ্য ন্যায়াধীশ হিচাপে কাম কৰিছিল। মাজতে তেওঁক হাৰিয়ানা উচ্চ ন্যায়ালয়লৈ বদলি কৰা হৈছিল। কিন্তু স্বাস্থ্যজনিত কাৰণ দেখুৱাই পুনৰ ৰাজস্থানলৈ উভতি আহিবলৈ ইচ্ছা প্ৰকাশ কৰাৰ পিছত তেওঁক আকৌ ৰাজস্থান উচ্চ ন্যায়ালয়লৈ বদলি কৰা হয়। এতিয়া তেওঁৰ বিৰুদ্ধে সৰ্বোচ্চ ন্যায়ালয়ৰ ন্যায়াধীশে উত্থাপন কৰা অভিযোগক কেন্দ্ৰ কৰি ন্যায়ব্যৱস্থাৰ ভিতৰতে ব্যাপক চৰ্চা আৰম্ভ হৈছে।
