অসমৰ উদ্যোগ মন্ত্ৰী চন্দ্ৰমোহন পাটোৱাৰীয়ে অশোক কাগজকল পুনৰ মুকলি কৰা হ’ব বুলি বৰপেটাত মন্তব্য কৰে। অশোক কাগজকলটো কাৰ্যক্ষম কৰি তুলিবলৈ আমাৰ চৰকাৰে যথেষ্ট গুৰত্ব প্ৰদান কৰিছে। আৰু ইয়াৰ বাবে আমি সকলো যাৱতীয় ব্যৱস্থা গ্ৰহণ কৰিছো।
মন্ত্ৰীগৰাকীয়ে বৰপেটা ভ্ৰমণৰ সময়ত সাংবাদিকৰ সৈতে হোৱা সাক্ষাতত এই মন্তব্য কৰা দেখা যায়। তেওঁ লগতে কয় নলবাৰী জিলাৰ অতিকৈ গুৰুত্বপূৰ্ণ অঞ্চল টিহুত এটা বৃহৎ মৰাপাট উদ্যোগ আৰু নতুনকৈ বস্ত্ৰ উদ্যোগ এটা স্থাপন কৰা হ’ব।
বস্ত্ৰ আৰু মৰাপাট উদ্যোগ দুটাৰ প্ৰসংগত মন্ত্ৰী পাটোৱাৰীয়ে কয় যে ইতিমধ্যে এই উদ্যোগ দুটাৰ বাবে কলকাতাৰ পৰা উদ্যোগপতি আহি মটি চাই গৈছে আৰু আশা কৰা হৈছে তেওঁলোকে অতি শীঘ্ৰে উদ্যোগ দুটা স্থাপন কৰিব।
মন্ত্ৰীগৰাকীয়ে লগতে কয় যে পতঞ্জলী, ডাবৰ আদিৰ দৰে বৃহৎ বৃহৎ কোম্পানীয়ে আজি অসমত উদ্যোগ স্থাপন কৰি নিৰ্মাণ কাৰ্য চলাই গৈছে। ইয়ে অসমত এক উদ্যোগীকৰণৰ বাতাবৰণৰ সৃষ্টি হোৱাত সহায় কৰিছে। ভৱিষ্যতে আৰু অধিক বৃহৎ বৃহৎ কোম্পানী সমূহে অসমলৈ আহি উদ্যোগ স্থাপন কৰিব বুলিও অসম চৰকাৰৰ মন্ত্ৰীগৰাকীয়ে উল্লেখ কৰে।
উল্লেখযোগ্য যে মন্ত্ৰী পাটোৱাৰীয়ে জনসম্পৰ্ক যাত্ৰাৰ অংশৰূপে উপস্থিত হৈছিল বৰপেটা সত্ৰৰ ইতিহাস গ্ৰন্থ প্ৰণেতা, শিল্পী-সাহিত্যিক-সাংবাদিক গোকুল পাঠকৰ ঘৰত। ‘বৰপেটাৰত্ন’ শিল্পী পাঠকে মন্ত্ৰী পাটোৱাৰীক অশোক কাগজকলটো পুনৰ মুকলি কৰিবলৈ অনুৰোধ জনোৱাৰ লগতে ৰাজ্যত বৃদ্ধি পোৱা নিবনুৱাসকলক সংস্থাপনৰ ব্যৱস্থা কৰি দিবলৈ আহ্বান জনায়।
