কাজিৰঙা ৰাষ্ট্ৰীয় উদ্যানৰ উদ্যোগত বিশ্ব প্ৰকৃতি নিধি (WWF), ভূমি, আৰণ্যক আৰু কৰবেট ফাউণ্ডেশ্যনৰ সহযোগত আজিৰ ২ অক্টোবৰৰ পৰা আৰম্ভ হৈছে ৬৪ সংখ্যক ৰাষ্ট্ৰীয় বন্যপ্ৰাণী সপ্তাহৰ কাৰ্যসুচী৷
আজি বোকাখাতৰ জেডিএছজি মহাবিদ্যালয়ৰ সভাকক্ষত বন্যপ্ৰাণী সংৰক্ষণ সপ্তাহৰ উদ্বোধনী অনুষ্ঠান অনুষ্ঠিত হয়৷ অনুষ্ঠানৰ আৰম্ভণিতে গান্ধী জয়ন্তী উপলক্ষে বোকাখাতৰ সহকাৰী আয়ুক্ত শান্তনু গগৈ আৰু বোকাখাতৰ জেডিএছজি বিদ্যালয়ৰ সহকাৰী অধ্যাপক গোপিকানন্দ শইকীয়াই বন্তি প্ৰজ্বলন কৰাৰ লগতে মহত্মা গাlন্ধীৰ প্ৰতিচ্ছবিত পুষ্প অৰ্পণ কৰে৷
সহকাৰী আয়ুক্ত শান্তনু গগৈয়ে আনুষ্ঠানিক ভাৱে ৬৪ সংখ্যক বন্যপ্ৰাণী সপ্তাহ উদ্বোধন কৰে ৷ আৰম্ভণিতে মহাবিদ্যালয়খনৰ গান্ধীয়ান ষ্টাডি চেন্টাৰৰ সঞ্চালক অতুল বেজবৰুৱাৰ পৰিচালনাত ছাত্ৰ-ছাত্ৰী সকলে ‘ৰাম ভজন’ পৰিবেশন কৰে৷ আদৰণি ভাষণ প্ৰদান কৰে কাজিৰঙা ৰাষ্ট্ৰীয় উদ্যানৰ সহকাৰী বন সংৰক্ষক ঋতুপৱন বৰাই৷
উদ্বোধনী অনুষ্ঠানত বন্যপ্ৰাণী সপ্তাহৰ বিষয়ে বিস্তৃত ভাৱে বৰ্ণনা কৰে কাজিৰঙাৰ গৱেষণা বিষয়া ৰবীন্দ্ৰ শৰ্মাই৷ ৰাষ্ট্ৰীয় বন্যপ্ৰাণী সপ্তাহৰ উদ্বোধনী অনুষ্ঠানত বোকাখাত প্ৰেছ ক্লাবৰ সভাপতি ভৱানন্দ কলিতা, বোকাখাত মইনা পাৰিজাতৰ সুৰেন্দ্ৰ নাথ গগৈ, জেডিএছজি মহাবিদ্যালয়ৰ প্ৰাক্তন অধ্যক্ষ ড৹ বাবুলাল মোৰ, কাজিৰঙাৰ সহকাৰী বন সংৰক্ষক পালভে বিজয়, বিশ্ব প্ৰকৃতি নিধিৰ ত্ৰিদিপ শৰ্মা, আৰণ্যকৰ আৰিফ হোছেইন, কৰবেট ফাউণ্ডেশ্যনৰ দীপজ্যোতি শইকীয়া আৰু ৱাইল্ড লাইফ ট্ৰাষ্ট অব ইণ্ডিয়াৰ শুভময় ভট্টচাৰ্য উপস্থিত থাকে৷
গোলাঘাট জিলাৰ ‘অনাৰেৰী ৱাইল্ড লাইফ ৱাৰ্ডেন’ উত্তম শইকীয়াই আঁত ধৰা এই উদ্বোধনী অনুষ্ঠানতে বিশিষ্ট শিল্পী দুলাল বৰাক ‘কৰবেট ফাউণ্ডেশ্যন’ আৰু কাজিৰঙা কৰ্তৃপক্ষৰ তৰফৰ পৰা মানপত্ৰ আৰু গামোচাৰে সম্বৰ্ধনা জনোৱা হয়৷
উদ্বোধনী অনুষ্ঠানত জেডিএছজি মহাবিদ্যালয় আৰু চন্দ্ৰ নাথ বেজবৰুৱা মহাবিদ্যালয়ৰ ছাত্ৰ ছাত্ৰীয়েও নিজৰ মনোভাৱ ব্যক্ত কৰে৷ অনুষ্ঠানৰ শেষত সহকাৰী বন সংৰক্ষক বিজয় পালভে উদ্যোক্তাৰ হৈ সকলোকে ধন্যবাদ জ্ঞাপন কৰে ৷