ওদালগুৰিৰ ভাৰত-ভুটান সীমান্ত এলেকাৰ আশে পাশে হাতী-মানুহৰ সংঘাত ক্ৰমাৎ বাঢ়ি অহাটো দেখা গৈছে। ৰাজনৈতিক মহলৰ সমৰ্থনপুষ্ট লোক, মূলসুঁতিলৈ উভতি অহা উগ্ৰপন্থী সংগঠনৰ সদস্য একাংশই বনাঞ্চলৰ ভূমি বেআইনীভাৱে দখল কৰি চাহ বাগিচা, পাম আদি খোলাৰ ফলত হাতীৰ বিচৰণভূমি সংকুচিত হৈ পৰিছে। খালিংদুৱাৰ সংৰক্ষিত বনাঞ্চল, বৰনদী বন্যপ্ৰাণী অভয়াৰণ্যত অবাধে গছ কটাৰ ফলত হাতীৰ জাক মানুহৰ বসতিপূৰ্ণ এলেকালৈ নামি আহিবলৈ বাধ্য হৈ পৰিছে।
অৱস্থা এনে পৰ্যায় পাইছেহি যে ভাৰত-ভুটান সীমান্তৰ ছামাৰং, ৰজাগড়, সুকলাই, ডিমাকুছি, আট্টাৰিখাত, ভুটীয়াচাং আদি এলেকাৰ বাসিন্দাসকলে হাতীৰ ভয়ত বিনিদ্ৰ ৰজনী পাৰ কৰিবলগীয়া হৈছে। এটা হাতীৰ জাকে আট্টাৰিখাত চাহ বাগিচাত আশ্ৰয় লৈ থকা বুলি জানিব পৰা গৈছে।
চৰকাৰী বিভাগ আৰু প্ৰকৃতিপ্ৰেমী বেচৰকাৰী সংগঠনৰ চেষ্টা সত্তেও হাতী মানুহৰ সংঘাত ৰোধ কৰিব পৰা নাই। হ্ৰাস পোৱা নাই হাতীৰ দ্বাৰা খেতিপথাৰ ধ্বংস, হাতীৰ আক্ৰমণত মানুহ হতাহত হোৱাৰ ঘটনা। বাঢ়ি গৈ আছে মানুহৰ হাততো হাতীৰ মৃত্যুৰ ঘটনা।
ওদালগুৰিৰ ধনশিৰি জিলাত ২০১২-১৩ চনৰ ভিতৰত ৮ টা হাতী মৃত্যু মুখত পৰিছে। ২০১৩-১৪ চনত ৭টা , ২০১৪-১৫ চনত ৭টা ২০১৬ চনত ৭টা হাতীৰ মৃত্যু ঘটিছে। আনহাতে ২০১৫-১৬ চনত হাতীৰ আক্ৰমণত ২১ জন লোকৰ মৃত্যু ঘটিছে আৰু ১২ জন আহত হৈছে।২০১৬ চনত হাতীৰ আক্ৰমণত ৯ জন লোকৰ মৃত্যু ঘটিছে আৰু ১২ জন আহত হৈছে।২০১৭ চনত হাতীৰ আক্ৰমণত ৭ জন লোকৰ মৃত্যু ঘটিছে আৰু মানুহৰ হাতত ৮টা হাতীৰ মৃত্যু ঘটিছে।
২০১৮ৰ এতিয়ালৈকে হাতী-মানুহৰ সংঘাতৰ ফলত ৬জন লোক আৰু ৩টা হাতীৰ মৃত্যু ঘটিছে।
কলাইগাঁৱৰ এগৰাকী বন্যপ্ৰাণী কৰ্মী নবজ্যোতি বৰুৱাই কৈছে যে মানুহৰ বৰ্ধিত জনসংখ্য আৰু বনাঞ্চল ধ্বংসৰ বাবেই হাতী-মানুহৰ সংঘাত বৃদ্ধি পাইছে। হাতীৰ খাদ্য সংকট হৈছে বুলিও তেওঁ ব্যক্ত কৰে। চৰকাৰে বিষয়টোৰ প্ৰতি আওকণীয়া মনোভাৱ প্ৰদৰ্শন কৰা বুলিও তেওঁ খেদ প্ৰকাশ কৰে।
বন্যপ্ৰাণী কৰ্মীগৰাকীয়ে আৰু কৈছে যে চৰকাৰে হাতী-মানুহৰ সংঘাত নহোৱা কৰাৰ বাবে এখন কমিটী গঠন কৰিব লাগে আৰু হাতীৰ বিচৰণভূমি আৰু সংৰক্ষিত বনাঞ্চলত কল আৰু কঠাল গছ, কিছু সংখ্যক বাঁহৰ প্ৰজাতি ৰোপণৰ এটা দীৰ্ঘম্যাদী আঁচনি গ্ৰহণ কৰিব লাগে।
