গুণোৎসৱৰ পৰীক্ষা বাতিলেৰে চৰকাৰে আওপকীয়াকৈ মানি ল’লে নেকি কাইলৈৰ অসম বন্ধ? এই প্ৰশ্নই এতিয়া সকলো স্তৰৰ অসমীয়াৰ মনত খুন্দিয়াই গৈছে।
বিশেষকৈ যোৱা ২৩ অক্টোবৰত অসমৰ খিলঞ্জীয়া লোকৰ অৰ্ধ শতাধিক সংগঠনে দিয়া অসম বন্ধ ব্যৰ্থ কৰিবলৈ চৰকাৰে যি তৎপৰতা আৰু দৃঢ় পদক্ষেপ লৈছিল তাৰ বিপৰীত স্থিতিত দেখা গৈছে ৩ নৱেম্বৰত বাঙালী সংগঠনে আহ্বান জনোৱা অসম বন্ধৰ ক্ষেত্ৰত। আনহাতে অসম বিজেপিয়েও ২৩ অক্টোবৰৰ বন্ধ ব্যৰ্থ কৰিবলৈ অসমৰ ৰাইজক আহ্বান জনাই সংবাদমেল দিছিল।
উল্লেখযোগ্য যে ১ নৱেম্বৰত তিনিচুকীয়াত সংঘটিত নাৰকীয় হত্যাকাণ্ডৰ প্ৰতিবাদত কাইলৈ, অৰ্থাৎ ৩ নৱেম্বৰত বৰাকৰ বহুকেইটা সংগঠনে ১২ ঘণ্টীয়া অসম বন্ধৰ আহ্বান জনাইছে।
কিন্তু ব্ৰহ্মপুত্ৰ উপত্যকাত বিশেষ প্ৰভাৱ নথকা বৰাকৰ বাঙালী সংগঠনকেইটাই অসম বন্ধৰ আহ্বান জনাবলৈ পালে কি নাপালে চৰকাৰৰ সৰ্বশিক্ষা বিভাগে কাইলৈৰ গুণোৎসৱ পৰীক্ষা বাতিল কৰি পিছুৱাই ৫ তাৰিখে পাতিবলৈ অসমৰ সকলো জিলাৰ উপায়ুক্তলৈ জাননী প্ৰেৰণ কৰিলে। (মন কৰিব লগীয়া যে সকলো জিলাৰ পৰিৱৰ্তে ১৭খন জিলাতহে গুণোৎসৱৰ পৰীক্ষা চলি আছে)।
ইয়াৰ জৰিয়তে আওপকীয়াকৈ চৰকাৰে কাইলৈৰ বন্ধটো মানি লৈছে অথবা সমৰ্থন জনাইছে। ইয়াকে লৈ সংবাদ মাধ্যম, ছ’চিয়েল মিডিয়াত তীব্ৰ প্ৰতিক্ৰিয়াৰ সৃষ্টি হৈছে। একাংশৰ অভিযোগ, এইদৰেই নিজৰ নীতিৰ জৰিয়তে সমাজত খোদ চৰকাৰেই বৈষম্যৰ ভাব বিয়পাই আছে।
তিনিচুকীয়াৰ ঘটনাটোক সকলো সচেতন অসমীয়াই গৰিহণা দিছে যদিও চৰকাৰৰ এই স্থিতিত ক্ষুভিত হৈছে জাতীয় ভাবৰ দল-সংগঠন, ব্যক্তি।
আনহাতে উচটনিমূলক মন্তব্য দিয়া বুলি যিকেইজন অসমীয়া লোকৰ বিৰুদ্ধে অভিযোগ উঠিছে তেওঁলোকক আৰক্ষীয়ে সোধা-পোছা কৰাৰ লগতে আজি জিতেন দত্ত আৰু মৃণাল হাজৰিকাক গ্ৰেপ্তাৰ কৰিছে। কিন্তু ‘অসমীয়াক ঘৰে ঘৰে সোমাই পিটিম বুলি কোৱা বাঙালী সংগঠনৰ নেতা সুৰজিত সৰকাৰ বা বিধায়ক শিলাদিত্যক এতিয়ালৈকে সোধা-পোছাৰ বাবেও মতা নাই, যদিও তেওঁলোকৰ বিৰুদ্ধেও গোচৰ দিয়া হৈছে।
পৰীক্ষা পূৰ্ব নিৰ্ধাৰিত সূচীমতেই হ’ব বুলি পুনৰ জাননী
আনহাতে সংবাদ মাধ্যম আৰু ছ’চিয়েল মিডিয়াত তীব্ৰ প্ৰতিক্ৰিয়াৰ পিছতে কেইঘণ্টামানৰ ভিতৰতে চৰকাৰে স্থিতি সলনি কৰিবলৈ বাধ্য হোৱা বুলি জানিব পৰা গৈছে।
এটা অসমৰ্থিত সূত্ৰই জনোৱামতে, শেহতীয়াকৈ চৰকাৰে পূৰ্বৰ স্থিতি সলাই পৰীক্ষা আগৰ সূচীমতেই অনুষ্ঠিত কৰিবলৈ ৰাজ্যৰ সকলো জিলাৰ উপায়ুক্তলৈ পত্ৰ প্ৰেৰণ কৰা হৈছে।
জানিব পৰামতে, পূৰ্বৰ জাননীখন জাৰি কৰা সৰ্বশিক্ষা মিশ্যনৰ মিশ্যন ডাইৰেক্টৰেই এইখন জাননীও জাৰি কৰিছে। অৱশ্যে শিক্ষকসকলৰ একাংশক ফোন কৰাত তেওঁলোকলৈ প্ৰথমটো বাৰ্তাহে ম’বাইলত গৈছে, দ্বিতীয়খন জাননীৰ কথা তেওঁলোক অৱগত নহয়।
