ধলা-শদিয়াৰ হত্যাকাণ্ডৰ প্ৰতিবাদত সদৌ অসম বাঙালী যুৱ ছাত্ৰ ফেডাৰেশ্বনে আজি পুৱাৰ পৰা আহ্বান জনোৱা অসম বন্ধৰ ফলত তামুলপুৰ মহকুমাৰ সাধাৰণ জনজীৱন ব্যাহত হৈ পৰে। আজি পুৱা বন্ধৰ সমৰ্থক সকলে বাক্সা জিলাৰ তামুলপুৰ মহকুমাৰ নাগ্ৰীজুলিত সমবেত হৈ নাগ্ৰীজুলি বজাৰ চকত টায়াৰ জ্বলাই গুৱাবাৰী-নাগ্ৰীজুলি-তামুলপুৰ পথছোৱা অৱৰোধ কৰে।
‘প্ৰতিবাদকাৰী সকলে আলফা গ’ বেক, অখিল গগৈক গ্ৰেপ্তাৰ কৰক, বাঙালী ঐক্য জিন্দাবাদ, অসম পুলিচ হাই হাই, বিজেপি মুর্দাবাদ, উই ৱাণ্ট জাষ্টিছ, বাঙালী বিৰোধী হুঁচিয়াৰ’ আদিকে ধৰি বিভিন্ন শ্ল’গান দি নাগ্ৰীজুলিৰ আকাশ-বতাহ কঁপাই তোলে।
বন্ধৰ সময়ছোৱাত নাগ্ৰীজুলি, গুৱাবাৰী, মাহেন্দ্ৰনগৰ, বিমালানগৰ, কাউলী, কাচুকাটা, ভোলাঝাৰ, বাঙালীপাৰা, দ্বাৰকুচি, তামুলপুৰৰ মহকুমা সদৰৰ ঘগ্ৰাচক, পূৰণ তামুলপুৰ চক, ডিমিলাপাৰ আদিকে ধৰি বৃহত্তৰ অঞ্চলটোত দোকান-পোহাৰ, বিত্তীয় প্ৰতিষ্ঠান আদি বন্ধ থকাৰ উপৰিও ব্যৱসায়িক যানবাহনৰ চলাচল বন্ধ হৈ পৰে আৰু অঞ্চলটোত স্বাভাৱিক জনজীৱন ব্যাহত হৈ পৰে।
অৱশ্যে তামুলপুৰ মটঙা চকত বন্ধৰ সময়ত কিছু সংখ্যক দোকান-পোহাৰ খোলা থকা দেখা যায়। ইপিনে আজি দিনৰ ভাগত তামুলপুৰ আৰক্ষী থানাৰ ভাৰপ্ৰাপ্ত বিষয়া অসীম বৰাৰ নেতৃত্বত অহা আৰক্ষীৰ এটা দলে তামুলপুৰৰ ৰাজপথত মটৰ চাইকেলেৰে আহি থকা অৱস্থাত অৰ্ধ শতাধিক বন্ধৰ সমৰ্থকক গ্ৰেপ্তাৰ কৰি তামুলপুৰ আৰক্ষী থানাত আবদ্ধ কৰি থয় আৰু বিয়লি ৫ বজাত তেওঁলোকক মুকলি কৰি দিয়ে।
ইফালে বন্ধৰ সময়ত গান্ধীবাৰী আৰক্ষী চকীৰ অধীনৰ লাতিবাৰী অঞ্চলত বন্ধৰ সমাৰ্থক সকলে দুই-এখন বাহনৰ ক্ষতি সাধন কৰা বুলিও জানিব পৰা গৈছে। তামুলপুৰ মহকুমাৰ ঠায়ে ঠায়ে বন্ধৰ সমৰ্থক আৰু বন্ধ বিৰোধীৰ মাজত দুই এটা সৰুসুৰা সংঘাতৰ সৃষ্টি হোৱা বুলিও খবৰ পোৱা গৈছে যদিও তেনে কোনো ডাঙৰ ঘটনা ঘটাৰ খবৰ বাতৰি লিখাৰ পৰলৈ পোহৰলৈ অহা নাই।
