আজি উজান বজাৰৰ বিবেকানন্দ কেন্দ্ৰত বিশিষ্ট বুদ্ধিজীৱি ‘ড০ হীৰেন গোহাঁই বাস্তৱৰ চেতনা আৰু স্বপ্ন’ নামৰ এখন গ্ৰন্থ উন্মোচনী সভা অনুষ্ঠিত হয়। ক্ৰান্তিকাল প্ৰকাশনে প্ৰকাশ কৰি উলিওৱা গ্ৰন্থখন উন্মোচন কৰে বিশিষ্ট কবি, সমালোচক হৰেকৃষ্ণ ডেকাই।
গ্ৰন্থ উন্মোচনী সভাখনৰ সভাপতিত্ব কৰে বিশিষ্ট লেখিকা নিৰুপমা বৰগোহাঞিয়ে। গ্ৰন্থখনৰ প্ৰকাশক হৈছে কৈলাস ৰাজখোৱা। অনুষ্ঠানত হৰেকৃষ্ণ ডেকাৰ উপৰি ৰাণী গোহাঞি, ড০ গোহাঁইৰ সহপাঠী ললিত বৰুৱা আৰু জ্যেষ্ঠ সাংবাদিক অজিত কুমাৰ ভূঞা উপস্থিত থাকে।
গ্ৰন্থখনৰ সম্পাদক প্ৰভাত বৰাই ভাষণত কয় যে ড০ গাহাঁইৰ সময়োচিত সকিয়নিলৈ মন-কাণ নিদিয়াৰ বাবে অসমৰ বহুতো ক্ষতি সাধন হৈছে। তেওঁ ড০ গোহাঁইক এটা অনুষ্ঠান হিচাপে অভিহিত কৰাৰ লগতে বহুতো অনুষ্ঠানৰ নিৰ্মাতা বুলিও অভিহিত কৰে৷ তদুপৰি অসমীয়াই এইগৰাকী চিন্তাবিদক পৰ্যাপ্ত মূল্যায়ন কৰিব পৰা নাই বুলিও তেওঁ খেদ প্ৰকাশ কৰে।
গ্ৰন্থ উন্মোচক হৰেকৃষ্ণ ডেকাই কয় যে আজি উন্মোচিত হোৱা এহেজাৰ পৃষ্ঠাৰ গ্ৰন্থখনৰ ওজন কম কিন্তু গ্ৰন্থখনৰ অন্তৰ্নিহিত কথাৰ ওজন বেছি। তেওঁ আৰু কয় যে পঢ়ি থকা দিনবোৰত তেওঁ Walt Whitmanৰ ওপৰত এটা মনোজ্ঞ প্ৰবন্ধ লিখিছিল৷ ড০ গোহাঁইৰ কবি হিচাপে থকা প্ৰতিভাৰ কথাও তেওঁ উল্লেখ কৰে।
আনহাতে সভাত বিশিষ্ট সাংবাদিক অজিত কুমাৰ ভূঞায়ো ড০ গোহাঁইৰ সম্পৰ্কত তাৎপৰ্যমূলক মন্তব্য দাঙি ধৰি এসময়ত ড০ গোহাঁইৰ মূৰত আঘাত কৰি মগজুটো নষ্ট কৰি দিব বিচৰা হৈছিল বুলি উল্লেখ কৰে। গোহাঁইক এগৰাকী সমাজ তত্ববিদ হিচাপে অভিহিত কৰি ভূঞাই উল্লেখ কৰি কয় তেওঁ কোনো বামপন্থী দল-সংগঠনৰ সদস্য নহয়।
ইফালে ড০ গোহাঁইয়ে নিজৰ ওপৰত এখন প্ৰশস্তিগ্ৰন্থৰ বিপৰীতে এখন মূল্যায়ন হোৱা বাবে সন্তোষ প্ৰকাশ কৰে৷ পূৰ্বে এগৰাকী বক্তাই তেখেতক ‘ভণ্ড’ নহয় বুলি জোৰ দি কোৱাৰ উদ্ধৃতি আনি ৰস কৰি কয় যে তেওঁ সৰধৰ্মিনীৰ প্ৰতি ভণ্ড।
তেওঁ বহু বছৰ পূৰ্বে অসম ‘Witch’s Cauldron’ লৈ ৰূপান্তৰিত হ’ব বুলি ভৱিষ্যতবাণী কৰাৰ কথা উল্লেখ কৰে। অসম আন্দোলনৰ সময়ত তেওঁক সমজুৱাভাৱে আচুতীয়া কৰাৰ কথা মনত পেলাই কয় যে আজি তেওঁ জীয়াই থকা সময়তে মানুহে তেওঁক আদৰি লোৱা কাৰ্যত সন্তোষ প্ৰকাশ কৰে।
সভানেত্ৰীৰ ভাষণত নিৰূপমা বৰগোহাঞিয়ে ড০ গোহাঁইক ওপৰোক্ত বক্তাসকলে ‘অসমৰ বিৱেক’ বুলি অভিহিত কৰাটোক সমৰ্থন কৰে।
